Mpo na nini bato bamemyaka lisusu basusu te?
KOMEMYA BASUSU EZALI NA NTINA
Komemya basusu epekisaka matata ebima mpe esalaka ete likambo ya mabe oyo esalemi eya ndongo te.
-
Lisese moko ya Biblia elobi: “Eyano ya boboto ekitisaka nkanda makasi, kasi liloba oyo epesaka mpasi ematisaka nkanda.” (Masese 15:1) Maloba mpe misala oyo ezangi boboto epelisaka mɔtɔ, mpe mbala mingi ebimisaka makama.
-
Yesu alobaki: “Monɔkɔ elobaka nde makambo oyo etondi na motema.” (Matai 12:34) Maloba ya kotyola oyo moto abimisi, ekoki kobomba likambo ya monene na motema na ye. Ekoki komonisa ndenge oyo atalelaka bato ya lopɔsɔ mosusu, ekólo mosusu, mboka mosusu, to bato oyo lolenge ya bomoi na bango ekeseni na oyo ya ye.
Ankɛtɛ moko oyo basalaki epai ya bato koleka 32000 na bikólo 28 emonisi ete 65% ya bato balobaki ete kozanga limemya oyo ezali komonana na mokili lelo oyo etikalá komonana te.
OYO OKOKI KOSALA
Ezala na kelasi to na mosala, pesáká bato nyonso limemya—ata soki botalelaka makambo ndenge moko te. Luká makambo oyo ekoki koyokanisa bino, yango ekosalisa yo oboya kolobaka mabe to kosambisaka basusu.
Oyo olingi básalela yo, salelá yango mpe basusu. Soki ozali kosalela bato makambo na bosembo mpe na boboto, mbala mosusu bango mpe bakosalela yo kaka bongo.
Limbisáká basusu. Kolandela kaka te maloba to mabe oyo moto asali yo, mindimisá ete ntango mosusu asali yango na nko te.
OYO BATATOLI YA YEHOVA BASALAKA
Ezala na bisika ya mosala to bipai bafandaka, Batatoli ya Yehova bamonisaka limemya epai ya bato nyonso.
Toteyaka makambo ya Biblia ofele na bato nyonso, kasi totindaka bato na makasi te bándima makanisi na biso. Tosalaka makasi tósalela batoli ya Biblia na ndenge toteyaka bato nsango na biso “na boboto mpe na limemya makasi.”—1 Petro 3:15; 2 Timote 2:24.
Toboyaka koponapona bilongi mpe na makita na biso ya lisangá toyambaka bato ya bisika nyonso oyo balingi koyekola makambo ya Biblia. Toyokanaka malamu na bato nyonso mpe ‘tokumisaka bato ya ndenge nyonso.’—1 Petro 2:17.
Totosaka bakonzi ya mboka na bisika tofandaka. (Baroma 13:1) Totosaka mibeko ya leta mpe tofutaka mpako. Atako tokɔtaka te na makambo ya politiki, totosaka bikateli oyo moto na moto azwaka na makambo yango.
