LIMEMYA EZALI NA NTINA NA LIBOTA

• Buku moko Les couples heureux ont leurs secrets—Les sept lois de la réussite [Sɛkɛlɛ ya mabala ya esengo—Mibeko nsambo] elobi ete ntango mwasi ná mobali bazali kopesana limemya, yango ekosala ete bámoniselana lolango “kaka te na makambo ya minene kasi mpe na makambo ya mikemike ya mokolo na mokolo.”

• Bolukiluki emonisi ete bana oyo batosaka basusu bakómaka na valɛrɛ mingi na miso ya bato, bazalaka na boyokani ya malamu mpenza ná baboti na bango, mpe banyokwamaka mingi te na makanisi.

 OYO OKOKI KOSALA

Bólobela makambo oyo bokosala elongo na libota. Ya liboso, moto nyonso ayeba soki komonisa “limemya” na libota na bino esɛngi nini. Ya mibale, bókoma polele bizaleli oyo moto nyonso na libota asengeli komonisa mpe bizaleli oyo bosengeli koboya. Ya misato, bólobela ndenge ya kokokisa mokano yango na libota mpo ete ezala bino moko, ata mpe bana na bino, báyeba oyo basengeli kosala mpo na komoniselana limemya.

Zalá ndakisa. Olobelaka bato ya libota na yo mabe mpo na bolembu na bango? Otyolaka bango soki bapesi makanisi na bango na likambo moko boye? To, okataka bango maloba?

Toli: Salá makasi omoniselaka molongani to bana na yo limemya ata ntango basali likambo oyo ekoki kosala ete omonisela bango yango te.

Zalá na boboto ntango ozali koboya likanisi ya moninga. Boyá maloba lokola, “ozalaka kaka bongo” to “ntango nyonso.” Na ndakisa, “ozongaka ntango nyonso na retare.” Maloba ya ndenge wana ekoki kozokisa bato ya libota na yo mpe kopelisa mɔtɔ.