Kosolola malamu ezalaka ntango baboti ná bana bazali kopesana makanisi mpe koyebisana ndenge oyo bazali komiyoka.

Kosolola malamu ekoki kokóma mokakatano, mingimingi soki esɛngi kosolola na bilenge. Buku moko (Breaking the Code) emonisi ete ntango bana bazali naino mike, bayebisaka baboti na bango makambo nyonso. Kasi soki bakómi bilenge, basololaka na baboti na bango lisusu mingi te, mpe baboti bayebaka lisusu te makanisi ya bana mpe ndenge oyo bazali komiyoka. Ata soki emonani lokola ete bana balingi kosolola na bino te, bóyeba ete na ntango wana nde ezali na ntina mingi kosolola na bango!

Sololáká na mwana na yo na ntango oyo alingi bósolola. Saláká yango, ata soki mwana asɛngi bósolola na butu makasi.

“Ntango mosusu, okoki kokanisa boye: ‘Sikoyo nde olingi tósolola? Nazalaki ná yo awa mokolo mobimba!’ Tosengeli nde kosepela ntango bana na biso balingi kofungolela biso mitema. Mpo yango nde likambo oyo moboti nyonso alingaka.”​—Lisa.

“Nalingaka kolala mingi, kasi mbala mingi oyo nasololaki malamu na bana na ngai ntango bazalaki naino bilenge ezalaki na butu makasi.”​—Herbert.

TOLI YA BIBLIA: “Moto na moto akoba koluka, litomba na ye moko te, kasi oyo ya moto mosusu.”​—1 Bakorinti 10:24.

Yoká mwana na yo na likebi. Tata moko alobi: “Ekómaka ete nakanisa makambo mosusu ntango bana na ngai bazali koloba. Bango moko bakomona ete nazali kokanisa makambo mosusu, nazali koyoka bango te!”

Soki televizyo to aparɛyi mosusu, na ndakisa telefone elongolaka likebi na yo, kangá yango to tyá yango mosika. Ntango mwana na yo azali koloba, yoká ye na likebi mpe monisá ete ozali kotya likebi na likambo oyo ezali kotungisa ye, ata soki emonani ete likambo yango ezali na ntina mingi te mpo na yo.

“Bana na biso basengeli komona ete ndenge oyo bazali komiyoka ezali na ntina mingi mpo na biso. Soki bamoni ete tokipaka makambo na bango te, bakoki kobombela biso makambo oyo bazali na yango na mitema to kokende koluka lisalisi epai ya bato mosusu.”​—Maranda.

“Kosilika te to kogangela mwana te, ata soki makanisi na ye ezali mpenza malamu te.”​—Anthony.

TOLI YA BIBLIA: “Bókeba na ndenge bozali koyoka.”​—Luka 8:18.

Sololáká na bana na yo na mabaku mosusu. Ntango mosusu, bana babangaka kosolola polele ntango moboti afandisi bango mpo básolola.

“Tosololaka mingi ntango tozali kotambola na motuka. Soki mwana afandi na mopanzi na ngai, tosololaka malamu koleka ntango tozali kotalana.”​—Nicole.

Ntango ya kolya ezali ntango mosusu ya malamu oyo baboti bakoki kosolola na bana.

“Ntango tozali kolya na mpokwa, mokomoko ayebisaka likambo nini ya mpasi mpe likambo nini ya esengo akutanaki na yango mokolo wana. Momeseno yango esalisaka biso tózala na bomoko mpe esalisaka mokomoko na biso ayeba ete soki akutani na mikakatano, bato ya kosalisa ye bakozanga te.”​—Robin.

TOLI YA BIBLIA: “Kowelaka koloba te, [mpe] koyokaka nkanda noki te.”​—Yakobo 1:19.