Delphine, oyo tolobelaki na lisolo oyo eleki, alobi ete mitungisi oyo azalaki na yango ezalaki kotinda ye amɛla masanga mingi. Biblia epekisi te komɛla masanga mwa moke; kasi elobi: “Kozala te kati na bamɛli minene ya vinyo.” (Masese 23:20) Komɛla masanga mingi ememelaka bato bamaladi ya makasi, ebebisaka to ekataka boyokani kati na bato, mpe ezali kosala ete mbula na mbula bamilio ya bato bákufa liwa ya mobesu. Bato bakoki kokima mikakatano mingi ya ndenge wana soki bazali kolanda batoli ya Biblia.

Delphine asalaki bongo. Lelo oyo, alobi: “Nayaki komona ete komɛla masanga mingi ezalaki te kosilisa mitungisi na ngai. Nalandaki toli ya bwanya oyo ezali na Bafilipi 4:6, 7, oyo elobi: ‘Bómitungisa ata na likambo moko te . . . kosɛnga na bino eyebana epai ya Nzambe.’ Butu nyonso, ntango makanisi ya mabe mpe mitungisi eyelaka ngai, nasɛngaka Yehova asalisa ngai. Nayebisaka ye mayoki na ngai nyonso, na ndakisa nkanda, mpasi na motema, kozanga elikya, mpe nabondelaka ye asalisa ngai nayeba makambo oyo nakoki kosala mpo namiyoka malamu. Ntango nalamukaka na ntɔngɔ, nasalaka makasi nabengana mayoki wana. Momeseno wana esalisaka ngai natya makanisi na bomoi oyo nazali na yango lelo, kasi te na oyo ya kala. Nazwaki ekateli ya kotika komɛla masanga, mpo kimya oyo nazwaki ezalaki mpenza na motuya mingi, yango wana nalingaki kobungisa yango te.”

Pite mpe ekobo ezali kati na makambo oyo epesaka bato mpasi na motema mpe mawa. Kasi batoli ya Biblia ekoki kosalisa biso tókima mikakatano yango na ndenge ekebisaka biso na makambo mosusu oyo ememaka na pite mpe ekobo, na ndakisa kozala seresere na moto oyo azali molongani na yo te mpe kotala pornografi. Elenge mobali moko na nkombo Samuel alobi: “Ezalaki mpasi te kokóma seresere na moto oyo azali molongani na yo te. Ntango mosusu, ata soki nazalaki kosepela mpenza te na mwana mwasi moko te, nakokaki komona ete azali kolinga ngai; yango ezalaki kosala ete nakóma na ye seresere.” Ata soki Samuel ye moko ayebaki yango te, mbala na mbala, bato bazalaki koloba na ye ete azalaka seresere na bana-basi mingi; nsukansuka, azwaki ekateli ya kozala seresere na bana-basi na nko. Kasi momeseno yango ebendelaki ye mindɔndɔ. Sikoyo, alobi: “Momeseno yango esalaki ngai mabe mingi, mpo ezalaki kotinda ngai naluka kaka matomba na ngai moko.”

Samuel atángaki lisolo moko oyo elobelaki bilenge, oyo ebimaki na site Internet na biso, jw.org. Na nsima, akanisaki Masese 20:11, oyo elobi: “Ata na misala na ye mwana mobali asalaka ete bato báyeba ye, soki mosala na ye ezali pɛto mpe elongobani.” Ndenge nini vɛrsɛ yango esalisaki ye? Samuel asosolaki ete kozala seresere na moto oyo azali molongani na yo te ezali pɛto te mpe ezali mabe. Alobi: “Nasosolaki mpe ete elenge oyo azali na momeseno ya kozala seresere na moto oyo azali molongani na ye te azali kokolisa bizaleli oyo ekokómisa ye molongani ya mabe. Nabandaki kokanisa ndenge mwasi oyo nakobala akomiyoka soki amoni ngai nakómi seresere na mwasi mosusu. Yango esalisaki ngai nayeba ete momeseno yango ezali likama. Atako ezali mpasi te kokwea na motambo yango, momeseno yango ezali mabe.” Samuel abongwanaki. Koboya kozala seresere na moto oyo azali molongani na ye te esalisaki mpe ye akima pite.

Antonio azalaki na likama monene koleka: akómaki moombo ya pornografi. Atako abalaki mwasi oyo ye azalaki kolinga mingi, mbala na mbala azalaki kokwea na motambo ya kotala pornografi. Alobi ete komanyola maloba oyo ezali na 1 Petro 5:8 esalisaki ye mingi. Vɛrsɛ yango elobi: “Bóbatela makanisi na bino, bókebaka. Monguna na bino, Zabolo, azali kotambola epai na epai lokola nkɔsi oyo ezali koganga mpe koluka kolya moto.” Antonio alobi: “Na mokili oyo, bililingi ya pornografi ezali bisika nyonso, mpe bililingi yango elongwaka na motó noki te. Vɛrsɛ yango esalisaki ngai mpenza nakanisa mpo na koyeba esika oyo komekama yango ezalaki kouta. Esengelaki namesana komikundola ete bililingi wana ya mbindo eutaka epai ya Zabolo. Sikoyo, nayebi ete kaka Yehova nde akoki kosalisa ngai ‘nabatela makanisi na ngai’ mpo nabunda etumba mpo na kolongola momeseno wana na bɔɔngɔ na ngai, na motema na ngai, mpe na libala na ngai.” Antonio azwaki lisalisi oyo asengelaki na yango, mpe nsukansuka atikaki momeseno wana ya mabe. Mpe yango esalisaki ye akima makama mosusu ya minene.

Tomoni polele ete Biblia epesaka batoli ya malamu oyo ekoki kosalisa biso tókima mikakatano ya makasi. Kasi tokoloba boni mpo na mikakatano oyo ezwá misisa na bomoi na biso mpe oyo tokokaka te kotika yango? Tótala ndenge oyo Liloba ya Nzambe ekoki kosalisa biso tósilisa ata mikakatano ya makasi ndenge wana.