Rosie alobi: “Nazalaki kobanga mingi mpo na makanisi na ngai nazalaki komona ete makambo ekobeba, nzokande ekosalema bongo te.” Bavɛrsɛ nini ya Biblia esalisaki ye? Moko na yango ezalaki Matai 6:34: “Bómitungisa ata moke te mpo na mokolo oyo ekolanda, mpo mokolo oyo ekolanda ekozala na mitungisi na yango moko. Mokolo na mokolo ezali na mitungisi na yango.” Lelo oyo, Rosie alobaka ete maloba wana ya Yesu esalisaki ye atika kobanga mpo na makambo oyo ekoki kosalema na mikolo ezali koya. Abakisi: “Namilukelaki mindɔndɔ mingi mpo nazalaki kobanga mingi mpo na makambo oyo esalemaki te mpe oyo mbala mosusu ekokaki kosalema te.”

Yasmine mpe azalaki komitungisa mingi. Alobi: “Pɔsɔ na pɔsɔ nazalaki kolela mingi, mpe mikolo mosusu nazalaki kolala na butu te. Namonaki ete makanisi mabe ezalaki kosilisa ngai nzoto.” Vɛrsɛ nini ya Biblia esalisaki ye? Ezalaki 1 Petro 5:7 oyo elobi: ‘Bóbwakela [Nzambe] mitungisi na bino nyonso, mpo atyelaka bino likebi.’ Yasmine alobi: “Mikolo nyonso, nakobaki kobondela Yehova, mpe ayanolaki na mabondeli na ngai. Nayokaki lokola ete kilo monene oyo nazalaki komema elongwaki. Ntango mosusu, makanisi yango ya mabe eyelaka ngai; kasi sikoyo, nayebi oyo nakosala mpo na kobengana yango.”

Mwana mwasi moko na nkombo Isabella alobi: “Nakanisi ete momeseno ya kolalisa makambo ezali na makila, mpo tata na ngai mpe azali na yango. Na esika ya kosala makambo ya ntina, nalekisaka ntango nde na makambo oyo ezali na ntina mingi te, na ndakisa kozwa mopɛpɛ to kotala televizyo. Yango ezali momeseno moko mabe, mpo ebakisaka mitungisi mpe esalaka ete moto asala mosala ya malonga te.” Toli oyo ezali na 2 Timote 2:15 nde esalisaki ye; elobi: “Salá nyonso oyo ekoki na yo mpo ozala moto oyo andimami na miso ya Nzambe, mosali oyo azali koyoka nsɔni te mpo na mosala na ye.” Isabella alobi: “Nazalaki kosala makasi nalalisaka lisusu makambo te mpo nayokisa Yehova nsɔni te.” Likambo ya esengo, abongwanaki mingi.

Ndenge moko mpe, Kelsey, alobi: “Soki nazali na mosala ya kosilisa na dati moko boye, nazalaki kozela kaka soki mikolo etikala ya kotánga mpo nasilisa yango. Nazalaki kolela, kozanga mpɔngi, mpe kobanga. Ezalaki mpenza mabe mpo na ngai.” Toli oyo ezali na Masese 13:16 esalisaki Kelsey; elobi: “Moto nyonso ya ekɛngɛ akosala na boyebi, kasi moto oyo azali zoba akopalanganisa bozoba.” Amonisi liteya oyo azwaki ntango amanyolaki vɛrsɛ wana; alobi: “Moto ya bwanya abongisaka makambo liboso mpe amilɛngɛlaka. Lelo oyo, na biro na ngai, natyá kaye oyo nakomaka na molɔngɔ likambo mokomoko oyo nazali kokana kosala mokolo na mokolo, na esika ya kozela ete mikolo etikala ya kotánga mpo na kosala likambo yango.”

Kirsten alobi: “Mobali na ngai asundolaki ngai na bana minei oyo bazalaki naino mike.” Toli nini ya Biblia esalisaki ye? Ezali Masese 17:17, oyo elobi: “Moninga ya solosolo alingaka ntango nyonso, mpe azali ndeko oyo abotami mpo na ntango ya mpasi.” Kirsten alukaki lisalisi epai ya bandeko mosusu ya lisangá. Matomba nini azwaki? Alobi: “Baninga na ngai basalisaki ngai na ndenge mingi! Basusu bazalaki kotikela ngai bilei mpe bafolo liboso ya porte. Mbala misato mobimba, mwa ndambo ya bandeko basalisaki ngai ná bana na ngai tólongwa na ndako moko mpo na kokende kofanda na ndako mosusu. Ndeko moko asalisaki ngai nazwa mosala. Baninga na ngai bazalaki ntango nyonso kosalisa ngai.”

Delphine oyo tolobelaki liboso, azalaki mpe komiyoka ete asundolami. Ntango akanisaki ndenge oyo abungisaki nyonso, alobaki: “Nazalaki komona lokola ete bato mosusu bazali na bomoi ya esengo, kasi ngai nazalaki kaka ngai moko mpe nazalaki na esengo te.” Moko ya bavɛrsɛ oyo esalisaki ye ezalaki Nzembo 68:6: “Nzambe azali kofandisa na ndako bato oyo bazali kaka bango moko.” Delphine alobi: “Nayebaki ete ndako oyo vɛrsɛ yango elobeli ezalaki ndako ya elilingi. Nasosolaki ete Nzambe apesaka biso ndako ya elimo, elingi koloba esika ya libateli ya solosolo oyo esalisaka biso tóyoka esengo ya kozala elongo na baninga mpe bato oyo balingaka Yehova. Kasi nayebaki ete mpo na kokóma moninga ya basusu, nasengeli libosoliboso kokóma moninga ya Yehova. Vɛrsɛ oyo esalisaki ngai ezali Nzembo 37:4, oyo elobi: ‘Sepelá mingi mpenza na Yehova, mpe akopesa yo oyo motema na yo ezali kosɛnga.’”

Na nsuka, alobi: “Nasosolaki ete esengelaki ngai moko nakangama makasi na Yehova. Ye nde moninga oyo aleki malamu. Na nsima, nasalaki liste ya makambo ya malamu oyo nakokaki kosala elongo na basusu, mpo nakóma moninga ya bato oyo balingaka mpe Yehova. Nakómaki na momeseno ya koluka bizaleli ya malamu ya basusu, mpe koboya kokipe mabunga na bango.”

Ya solo, ata bandeko oyo basalelaka Nzambe bazali kaka bato ya kozanga kokoka. Batatoli ya Yehova mpe bakutanaka na mikakatano oyo bato nyonso bakutanaka na yango. Kasi batoli ya Biblia etindaka bato básala oyo bakoki mpo na kosalisa basusu. Kozala na baninga ya ndenge wana ezali malamu. Kasi, batoli ya Biblia ekoki mpe kosalisa moto ayika mpiko na mikakatano oyo ezali kosila te lelo, na ndakisa maladi oyo ezali kosila te to mawa makasi?