SOKI likama moko esilá kokómela yo, tokanisi ete oyebi ndenge moto ayokaka na ntango wana: mpasi na motema, epai mosusu azali komona yango lokola ndɔtɔ, akómi na mobulu na makanisi; moto mosusu kutu akoki ata kobanda kolɔta bandɔtɔ ya mabe. Bato mosusu basilaka esengo mpe balɛmbaka makasi; ná mposa ya bomoi esilaka.

Soki likama esilá kokómela mpe yo, ekoki kozala oyokaki ete okómi mpenza na nsuka. Mbala mosusu mpe okanisaki ete bomoi na yo ezali lisusu na ntina moko te. Atako bongo, yebá ete Biblia elobi ete bomoi na yo ezali na ntina mpe epesi yo elikya ya bomoi ya malamu na mikolo ekoya.

Mosakoli 7:8 elobi: “Nsuka mpenza ya likambo eleki ebandeli na yango.” Ntango likama moko ekómeli yo, na abandeli okoki koyoka ete elikya nyonso esili. Kasi, soki obundibundi kaka, mokemoke okotɛlɛma, mpe nsukansuka okokóma lisusu na esengo.

Biblia elobi ete mokolo mosusu “makɛlɛlɛ ya kolela ekoyokana lisusu te . . . to makɛlɛlɛ ya komilelalela.” (Yisaya 65:19) Likambo wana ekosalema ntango Bokonzi ya Nzambe ekokómisa mabele paradiso. (Nzembo 37:11, 29) Makama ekobanda kosalema lisusu te. Basuvenire ya mabe mpe mpasi oyo yango etikaka na motema ekolimwa libela, mpo Nzambe alaki ete: “Makambo ya kala ekokanisama lisusu te, mpe ekoya na motema te.”​—Yisaya 65:17.

Kanisá naino: Nzambe akani “kopesa [yo] bomoi malamu na mikolo ezali koya mpe elikya,” elingi koloba bomoi ya kimya na mokili oyo ye moko akozala mokonzi na yango. (Yirimia 29:11) Koyeba likambo wana ekoki kosalisa yo omona ete bomoi na yo ezali kaka na ntina! Sally, mwasi oyo tolobelaki na lisolo ya liboso, alobi boye: “Kokanisa makambo kitoko oyo Bokonzi ya Nzambe ekosala ekoki kosalisa moto atikala mawamawa te mpo akutaná na makambo ya mabe mpe akende liboso.”

Yango wana tozali kolendisa yo oyekola makambo mosusu oyo Bokonzi ya Nzambe ekosala mpo na bato na mikolo ezali koya. Soki osali yango, okomona ete ata soki likama ekómelaki yo, bomoi na yo ezali kaka na ntina mpo oyebi ete mokolo mosusu makama ekozala lisusu te. Kutu, Biblia ezali kopesa batoli oyo ekoki kosalisa yo olɛmba nzoto te, ata ntango okutani na likama lelo oyo. Tótalela mwa bandakisa.