1. Matomba nini tozwaka ntango toyebisaka basusu ndenge toyebaki “solo”?

 “NDENGE nini oyebaki solo?” Toyebi ete oyanolaka na motuna wana mbala na mbala. Ezalaka motuna ya libosoliboso oyo bandeko na biso bakristo batunaka biso ntango tolingi koyebana na bango. Tolingaka koyeba ndenge bandeko na biso ya basi mpe ya mibali bayekolaki koyeba Yehova mpe kolinga ye, mpe tolingaka koyebisa bango ndenge biso mpe toyebaki solo. (Rom. 1:11) Masolo yango esalisaka biso tóbosana te ndenge tolingaka kozala Batatoli ya Yehova. Lisusu, tokómaka na ekateli ya makasi ya “kokoba kotambola na kati ya solo,” elingi koloba, kokoba kozala na bomoi oyo ekosala ete Yehova apambola biso mpe andima biso.​—3 Yoa. 4.

2. Tokolobela nini na lisolo oyo?

² Na lisolo oyo, tokolobela mwa bantina oyo etindaka biso tólinga solo. Na nsima tokolobela ndenge tokoki kokoba komonisa ete tolingaka likabo wana ya motuya mingi. Na ntembe te, yango ekosala ete tózala lisusu na botɔndi mingi mpo na makambo oyo Yehova asalá mpo na kobenda biso na solo. (Yoa. 6:44) Ekokómisa mpe makasi mposa na biso ya koyebisa basusu solo.

3. Wapi ntina oyo eleki nyonso oyo esalaka ete tólinga solo?

³ Tolingaka solo mpo na bantina mingi. Likambo eleki ntina, tolingaka Yehova Nzambe, Mobandisi ya solo. Na nzela ya Liloba na ye, Biblia, toyaki koyeba ye kaka te lokola Mokeli ya likoló mpe ya mabele oyo azali na nguya nyonso, kasi mpe lokola  Tata na biso ya likoló oyo alingaka biso, oyo azali na boboto mpe atyelaka biso likebi. (1 Pe. 5:7) Toyebi ete Nzambe na biso azali na ‘motema mawa mpe na ngɔlu, ayokaka nkanda noki te mpe atondi na motema boboto mpe na solo.’ (Kob. 34:6) Yehova alingaka boyengebene. (Yis. 61:8) Esalaka ye mpasi komona ndenge tozali konyokwama mpe azalaka na mposa makasi ya kosilisa bampasi nyonso na ntango oyo ebongi. (Yir. 29:11) Tozali mpe kozela na mposa makasi mokolo wana ya kitoko mpenza! Yango ezali moko ya bantina oyo tolingaka Yehova mingi mpenza!

4-5. Mpo na nini ntoma Paulo akokanisaki elikya na biso na longo?

⁴ Wapi ntina mosusu oyo esalaka ete tólinga solo? Solo ememelaka biso matomba mingi mpenza. Tózwa ndakisa moko mpamba. Solo ya Biblia epesi biso mpe elikya mpo na mikolo ezali koya. Mpo na komonisa ete elikya yango ezali na motuya mingi, ntoma Paulo akomaki boye: “Elikya oyo tozali na yango ezali lokola longo mpo na molimo, ezali makasi mpe ngwi.” (Ebr. 6:19) Kaka ndenge longo etɛlɛmisaka masuwa, elikya na biso mpe oyo esimbami na Biblia ekoki kosalisa biso tóyika mpiko na komekama oyo tozali kokutana na yango na bomoi.

⁵ Ntoma Paulo azalaki kolobela mingimingi elikya ya kokende likoló oyo bakristo oyo batyami mafuta na elimo bazalaka na yango. Kasi maloba na ye etaleli mpe bakristo oyo bazali kozela na mposa makasi kofanda na mabele oyo ekokóma paradiso. (Yoa. 3:16) Ya solo, koyekola makambo etali elikya ya bomoi ya seko esali ete bomoi na biso ezala na ntina.

6-7. Ndenge nini Yvonne azwaki matomba na koyekola mateya ya solo oyo etali avenire?

⁶ Tózwa ndakisa ya ndeko mwasi moko na nkombo Yvonne. Akolaki na libota ya Batatoli ya Yehova te, mpe ntango azalaki naino mwana azalaki kobanga liwa. Abosanaka te maloba oyo atángaki mokolo moko, oyo elobi: “Kolala kolamuka ezali momeseno te.” Yvonne alobi: “Maloba yango ezalaki kokimisa ngai mpɔngi mpe nazalaki kokanisa avenire. Nazalaki koloba ete ‘bomoi esengeli kozala kaka boye te. Mpo na nini nazali awa na mokili?’ Nazalaki kobanga liwa!”

⁷ Na nsima, ntango akómaki elenge, Yvonne akutanaki na Batatoli ya Yehova. Alobi boye: “Nakómaki kondima ete nakoki kozala na elikya ya kozala na bomoi ya seko na Paradiso awa na mabele.” Ndenge nini koyekola solo esalisaki ndeko na biso ya mwasi? Abakisi boye: “Mpɔngi ekimaka ngai lisusu te na butu mpo na komitungisa mpo na avenire to liwa.” Ndenge okoki kokanisa yango, solo ezali na motuya mingi na miso ya Yvonne, mpe azalaka na esengo mingi mpo na koyebisa basusu elikya na ye mpo na mikolo ezali koya.​—1 Tim. 4:16.

8-9. (a) Na ndakisa moko oyo Yesu apesaki, ndenge nini moto moko amonisaki ete azalaki kozwa na valɛrɛ eloko ya motuya oyo amonaki? (b) Ndenge nini otalelaka solo na bomoi na yo?

⁸ Solo ya Biblia esangisi mpe nsango malamu ya Bokonzi ya Nzambe. Yesu akokanisaki solo ya Bokonzi na eloko ya motuya oyo ebombami. Ndenge Matai 13:44 emonisi yango, Yesu alobaki boye: “Bokonzi ya likoló ezali lokola eloko ya motuya oyo ebombami na elanga, oyo moto moko akuti mpe abombi yango; mpe na esengo, akei kotɛka biloko oyo azali na yango mpe asombi elanga yango.” Yebá ete moto yango azalaki koluka eloko yango ya motuya te. Kasi ntango amonaki yango, asalaki makasi mpo azwa yango. Yango wana, atɛkaki biloko nyonso oyo azalaki na yango. Mpo na nini? Mpo ayebaki valɛrɛ ya eloko yango ya motuya. Ezalaki na motuya koleka eloko nyonso oyo asengelaki kosundola.

 ⁹ Ezali ndenge wana nde omiyokaka mpo na solo? Tondimi ete omiyokaka bongo! Toyebi ete eloko moko te oyo mokili elaki kopesa biso ekoki kokokana na esengo oyo tozwaka na kosalela Yehova lelo oyo, mpe elikya ya bomoi ya seko na mikolo ezali koya na nse ya boyangeli ya Bokonzi ya Nzambe. Libaku malamu oyo tozali na yango ya kozala na boyokani malamu ná Yehova eleki mosika milende nyonso oyo tosengeli kosala. Esengo monene oyo tozali na yango ezali ya ‘kosepelisa ye mpenza.’​—Kol. 1:10.

10-11. Nini etindaki Michael asala mbongwana na bomoi na ye?

¹⁰ Mingi na biso tosalaki milende mpenza mpo Yehova andima biso. Bato mosusu batiká mosala ya lokumu oyo bazalaki na yango na mokili. Basusu mpe batiká kolanda bozwi. Basusu mpe, ntango bayaki koyeba Yehova, batiká bizaleli ya mabe oyo bazalaki na yango liboso. Yango nde makambo Michael asalaki. Akolaki te na libota ya Batatoli ya Yehova. Ntango azalaki elenge, ayekolaki lisano ya karate. Alobi boye: “Ezalaki na ntina mingi mpo nazala makasi na nzoto. Na ntango moko boye, nazalaki komimona lokola elombe oyo bakoki kolonga te.” Kasi ntango abandaki koyekola Biblia, Michael ayekolaki ndenge Yehova atalelaka mobulu. (Nz. 11:5) Yoká makambo oyo Michael alobi mpo na babalani oyo bazali Batatoli ya Yehova oyo bazalaki koyekola na ye Biblia, alobi boye: “Bayebisaki ngai ata mokolo moko te ete nasengelaki kotika lisano ya karate; bakobaki kaka koteya ngai mateya ya Biblia.”

¹¹ Wana Michael akómaki koyeba makambo mingi etali Yehova, akómaki lisusu kolinga ye mingi. Mingimingi motema mawa oyo Yehova amoniselaka basaleli na ye nde esimbaki motema ya Michael. Kendekende, Michael ayaki koyeba ete asengelaki kozwa ekateli mpo abongola makambo mosusu na bomoi na ye. Alobi boye: “Nayebaki ete kotika lisano ya karate esengelaki kozala likambo eleki mpasi oyo nasalá naino te. Kasi nayebaki mpe ete ekosepelisa Yehova, mpe nandimaki ete kosalela ye ezali na motuya koleka eloko mosusu nyonso.” Michael azwaki na motuya mingi solo oyo amonaki, mpe yango etindaki ye asala mbongwana monene na bomoi na ye.​—Yak. 1:25.

12-13. Ndenge nini solo ya Biblia esalisaki Mayli?

¹² Mpo na komonisa ete solo ezali na motuya mingi, Biblia ekokanisi yango na mwinda oyo ezali kongɛnga na kati ya molili. (Nz. 119:105; Ef. 5:8) Ndeko mwasi Mayli, na Azerbaïdjan, azwaka na motuya mingi ndenge Liloba ya Nzambe esalisaki ye. Akolaki na libota oyo basangani na yango basambelaka na lingomba moko te. Tata na ye azalaki Mizilma, mpe mama na ye Moyuda. Alobi boye: “Ata mokolo moko te natyaki ntembe ete Nzambe azalaka te, kasi nazalaki na mituna oyo nazalaki komituna. Nazalaki komituna boye: ‘Mpo na nini Nzambe akelaki bato, mpe mpo na nini moto asengeli konyokwama bomoi na ye mobimba mpe na nsima anyokwama lisusu seko na seko na lifelo?’ Lokola bato bazalaki koloba ete likambo nyonso oyo esalemaka ezali mokano ya Nzambe, nazalaki komituna boye: ‘Nzambe atambwisaka bato mpe nsima asepelaka komona bango bazali konyokwama?’”

¹³ Mayli akobaki koluka biyano na mituna na ye. Kendekende, andimaki koyekola Biblia mpe akómaki Motatoli ya Yehova. Alobi boye: “Biyano ya Biblia ebongolaki ndenge na ngai ya kotalela bomoi. Bandimbola ya malamu mpenza oyo nazwaki na Liloba ya Nzambe epesi ngai kimya ya motema.” Ndenge moko na Mayli, biso nyonso tokumisaka Yehova, “moto oyo abengaki biso tólongwa  na molili tókɔta na pole na ye ya kokamwa.”​—1 Pe. 2:9.

14. Ndenge nini tokoki lisusu kolinga mingi solo? (Talá mpe etanda “ Biloko mosusu oyo tokoki kokokanisa na solo ya Biblia.”)

¹⁴ Oyo ezali kaka mwa bandakisa oyo emonisi ete solo ezali na motuya mingi. Na ntembe te okoki kokanisa ebele ya bandakisa mosusu. Ekozala malamu osala programɛ ya koyekola bandakisa yango yo moko mpo na koyeba bantina mosusu oyo tosengeli kolinga solo! Ntango tozali kolinga lisusu solo mingi, tokozwa mabaku mingi ya komonisa ete tolingaka yango.

15. Ndenge nini tokoki komonisa ete tolingaka solo?

¹⁵ Tokoki komonisa ete tolingaka solo ntango totángaka Biblia mpe mikanda oyo elimbolaka Biblia mbala na mbala. Longola yango, ezala mbula boni tozali na kati ya solo, tozalaka ntango nyonso na makambo mingi ya koyekola. Nimero ya liboso ya Linɔ́ngi ya Mosɛnzɛli elobaki boye: “Mateya ya solo ezali lokola fololo oyo ebombami na kati ya matiti. Soki olingi komona fololo yango, osengeli koluka yango na likebi. . . . Soki olingi kozwa solo, osengeli kosala makasi mpenza. Mpe soki omoni  yango, kosuka kaka wana te. . . . Kobá kolukaluka fololo mosusu.” Koyekola ezalaka pɛtɛɛ te, kasi ezali na ntina mingi.

16. Na kotalela Masese 2:4-6, mayele nini ya koyekola omonaka ete ebimisaka matomba mpo na yo?

¹⁶ Biso nyonso te nde tolingaka kotánga mpe koyekola. Kasi Yehova azali kosɛnga biso ‘tókoba koluka’ mpe ‘tókoba kolukaluka’ mpo na koyeba solo na mozindo. (Tángá Masese 2:4-6.) Ntango tosalaka milende ya bongo, tozwaka ntango nyonso matomba. Na oyo etali boyekoli na ye moko ya Biblia, ndeko Corey alobi ete atyaka makanisi na ye na vɛrsɛ moko na mbala moko. Alobi boye: “Natángaka banɔti nyonso, natalaka mitindami nyonso mpe nasalaka bolukiluki mosusu. . . . Koyekola ndenge wana esalisaka ngai nayeba makambo mingi mpenza!” Ezala tosalelaka mayele ya ndenge wana to mosusu, tomonisaka ete tozali na botɔndi mpo na solo ntango tosalaka milende mpe tozwaka ntango mpo na koyekola yango.​—Nz. 1:1-3.

17. Na kotalela Yakobo 1:25, kosalela solo na bomoi na biso elimboli nini?

¹⁷ Ya solo, toyebi ete esuki kaka te na koyekola solo. Mpo tózwa matomba mpenza, tosengeli kosalela solo na bomoi na biso, elingi koloba, kosalela makambo oyo tozali koyekola. Na ndenge wana nde solo ekomemela biso esengo ya solosolo. (Tángá Yakobo 1:25.) Ndenge nini tokoki komindimisa ete tozali kosalela solo na bomoi na biso? Ndeko mobali moko apesi likanisi ya komitalelaka biso moko mpo na koyeba bisika oyo tozali kosala malamu mpe bisika oyo tosengeli kobongisa na bomoi na biso. Ntoma Paulo alobaki boye: “Ezala tokei liboso ndenge nini, tókoba kaka kotambola na molɔngɔ na nzela moko wana.”​—Flp. 3:16.

18. Mpo na nini tosalaka makasi mpo na “kokoba kotambola na kati ya solo”?

¹⁸ Kanisá naino matomba oyo eutaka na milende oyo tosalaka mpo na “kokoba kotambola na kati ya solo”! Tosukaka kaka te na kobongisa bizaleli na biso moko, kasi tosepelisaka mpe Yehova ná bandeko na biso bakristo. (Mas. 27:11; 3 Yoa. 4) Na ntembe te, yango nde bantina oyo eleki malamu ya kolinga solo mpe kosalela yango na bomoi na biso!