LISOLO YA BOYEKOLI 7
LOYEMBO 15 Tókumisa Mwana ya liboso ya Yehova!
Ndenge Yehova alimbisaka: Oyo yango elimboli mpo na yo
“Olimbisaka mpenza.”—NZ. 130:4.
NA MOKUSE
Kotalela maloba mosusu ya elilingi oyo ezali na Biblia ekosalisa biso tókóma lisusu na botɔndi mingi mpo na ndenge oyo Yehova alimbisaka mokomoko na biso.
1. Mpo na nini ezalaka mpasi koyeba oyo moto alingi koloba ntango alobi ete alimbisi?
“NALIMBISI YO.” Maloba yango ekoki kokitisa mpenza motema, mingimingi soki oyebi ete olobaki to osalaki likambo oyo epesaki moto mpasi! Kasi maloba yango, “nalimbisi yo,” elimbolaka mpenza nini? Na maloba yango, moto oyo opesaki mpasi alingi nde koloba ete boninga na bino ezongi mpenza? To alingi kaka koloba ete alingi lisusu te kolobela likambo oyo elekaki? Ntango moto alimbisi moninga, eyebanaka mpenza te soki elimboli nini.
2. Biblia emonisi nini mpo na ndenge oyo Yehova alimbisaka? (Talá mpe maloba na nse ya lokasa.)
2 Ndenge Yehova alimbisaka biso bato ya kozanga kokoka ekeseni mpenza na ndenge oyo tolimbisanaka biso na biso. Ndenge Yehova alimbisaka ekokani na mosusu te. Mokomi ya nzembo alobaki mpo na Yehova ete: “Olimbisaka mpenza, mpo bázala na nsɔmɔ na yo.” a (Nz. 130:4) Ya solo, Yehova ‘alimbisaka mpenza’; kolimbisa ya solo ezalaka epai na ye. Ye nde amonisi biso soki kolimbisa elimboli mpenza nini. Na bisika mosusu, mpo na kolobela ndenge Yehova alimbisaka, bakomi ya Biblia basalelaki liloba moko ya Ebre oyo basalelá yango te mpo na kolobela kolimbisa ya bato.
3. Ndenge oyo Yehova alimbisaka ekeseni na nini na ndenge oyo biso tolimbisaka? (Yisaya 55:6, 7)
3 Ntango Yehova alimbisi moto, lisumu ya moto yango elongwe. Boyokani oyo ebebaki ezongi mpenza malamu. Kolimbisa ya Yehova ezalaka mobimba mpenza mpe akakatanaka te kosala yango.—Tángá Yisaya 55:6, 7.
4. Ndenge nini Yehova asalisi biso tóyeba soki kolimbisa ya solo ezali nini?
4 Soki ndenge oyo Yehova alimbisaka ekeseni na ndenge biso tolimbisaka, ndenge nini biso bato ya kozanga kokoka tokoki kokanga mpenza ntina ya ndimbola na yango? Mpo na kosalisa biso, Yehova asaleli maloba ya elilingi mpo na kolobela ndenge oyo alimbisaka. Na lisolo oyo, tokotalela maloba yango mosusu ya elilingi. Ekomonisa biso ndenge oyo Yehova alongolaka lisumu, mpe na bongo azongisaka boyokani oyo lisumu ebebisaki. Kotalela bandakisa yango ekobakisa botɔndi na biso epai ya Tata na biso ya boboto mpe ya motema mawa, oyo amonisaka kolimbisa na ye na ndenge mingi.
YEHOVA ALONGOLAKA LISUMU
5. Yehova asalaka nini ntango alimbisi masumu na biso?
5 Mbala mingi, Biblia ekokanisaka masumu na mikumba ya kilo. Mokonzi Davidi alobelaki masumu na ye boye: “Mabunga na ngai eleki na motó na ngai; lokola mokumba moko ya kilo, ezali mpenza kilo oyo nakokoka komema te.” (Nz. 38:4) Kasi Yehova alimbisaka masumu ya baoyo babongoli motema. (Nz. 25:18; 32:5) Liloba ya Ebre oyo ebongolami na “kolimbisa” elimboli mpenzampenza “kotombola” to “komema.” Maloba yango emonisaka Yehova lokola mobali moko ya makasi oyo atomboli kilo ya lisumu oyo ezalaki na mapeka na biso mpe amemi yango mosika.
“Olimbisaki” (Nz. 32:5)
6. Yehova amemaka masumu na biso wapi?
6 Maloba mosusu ya elilingi emonisi ete Yehova amemaka masumu na biso mosika mpenza. Nzembo 103:12 elobi: “Kaka ndenge epai moi ebimaka ezali mosika mpenza na epai elalaka, ndenge yango nde atye mosika na biso ebele ya misala na biso ya kobuka mibeko.” Ngámbo ya ɛsti ezali mosika mpenza na wɛsti. Bangámbo yango ekutanaka te. Na maloba mosusu, Yehova amemaka masumu na biso mosika koleka ndenge oyo tokoki kokanisa. Yango emonisi ndenge Yehova alimbisaka mpenza!
“Kaka ndenge epai moi ebimaka ezali mosika mpenza na epai elalaka” (Nz. 103:12)
7. Biblia emonisi ete Yehova asalaka nini na masumu na biso? (Mika 7:18, 19)
7 Atako na ndenge ya elilingi Yehova amemaka masumu mosika na biso, ye moko abombaka yango? Te. Mokonzi Ezekiasi akomaki mpo na Yehova ete: “Obwaki masumu na ngai nyonso nsima ya mokɔngɔ na yo.” To, ndenge maloba na nse ya lokasa elobi, “olongoli masumu na ngai nyonso na miso na yo.” (Yis. 38:9, 17; msl.) Maloba yango ya elilingi emonisi ete Yehova azwaka masumu ya baoyo babongoli motema mpe abwakaka yango mpo amona yango te. Maloba yango ekokaki mpe kobongolama na: “Otaleli [masumu na ngai] lokola nde esalemaki te.” Biblia emonisi lisusu likanisi yango na maloba mosusu ya elilingi oyo ezali na Mika 7:18, 19. (Tángá.) Mokapo yango emonisi ete Yehova abwakaka masumu na biso na bozindo ya mbu. Na ntango ya kala, moto azalaki na likoki te ya kozwa lisusu eloko oyo babwaki na bozindo ya mbu.
“Obwaki masumu na ngai nyonso nsima ya mokɔngɔ na yo” (Yis. 38:17)
“Okobwaka masumu na bango nyonso na bozindo ya mbu” (Mika 7:19)
8. Toyekoli nini tii awa?
8 Na maloba ya elilingi oyo totaleli, toyekoli ete ntango Yehova alimbisi biso, alongoli biso kilo ya masumu na biso. Ya solo, kaka ndenge Davidi alobaki, “esengo na bato oyo balimbisi misala na bango ya kobuka mibeko mpe oyo bazipi masumu na bango; esengo na moto oyo Yehova akotánga lisumu na ye te.” (Rom. 4:6-8) Yango nde kolimbisa ya solo!
YEHOVA ABOMAKA MASUMU
9. Maloba nini ya elilingi Yehova asaleli mpo na kolimbola ndenge alimbisaka?
9 Yehova asaleli maloba mosusu ya elilingi mpo na kosalisa biso tómona malamu ndenge oyo, na nzela ya mbeka ya lisiko, abomaka masumu ya baoyo babongoli motema. Na ndenge ya elilingi, Biblia elobeli Yehova lokola nde asukolaka mpe apɛtolaka masumu yango. Yango esalaka ete moto oyo asalaki lisumu akóma pɛto. (Nz. 51:7; Yis. 4:4; Yir. 33:8) Yehova ye moko amonisi likambo oyo esalemaka; alobi: “Ata soki masumu na bino ezali motane makasi, ekokóma mpɛmbɛ lokola nɛjɛ; ata soki ezali motane lokola elamba ya motane makasi, ekokóma lokola lɛnɛ.” (Yis. 1:18) Ezalaka mpasi mpenza kolongola litɔnɔ (tache) ya motane makasi na elamba. Kasi, na maloba wana ya elilingi, Yehova amonisi ete akoki kosukola mpe kokómisa masumu na biso pɛto tii ekomonana lisusu te.
“Ata soki masumu na bino ezali motane makasi, ekokóma mpɛmbɛ lokola nɛjɛ” (Yis. 1:18)
10. Maloba nini ya elilingi Yehova asaleli mpo na komonisa bonene ya ndenge alimbisaka mpenza?
10 Ndenge tomonaki na lisolo oyo eleki, Biblia ekokanisi masumu na banyongo. (Mat. 6:12; Luka 11:4) Na yango, mbala nyonso oyo tosalelaka Yehova lisumu, ezalaka lokola tozali kobakisa banyongo. Tozali na nyongo na ye ebele mpenza! Kasi, ntango Yehova alimbisi biso, ezalaka lokola nde alongoli nyongo oyo akokaki kosɛnga ete tófuta ye. Asɛngaka biso te tófuta lisusu mpo na masumu oyo asilaki kolimbisa. Ndakisa yango emonisi ndenge motema ekitaka mpenza ntango Yehova alimbisi biso!
“Limbisá biso banyongo na biso” (Mat. 6:12, msl.)
11. Ntango Biblia elobi ete masumu na biso ‘ebomami,’ yango elimboli nini? (Misala 3:19)
11 Yehova asukaka kaka te na kolongola nyongo to masumu na biso; abomaka yango. (Tángá Misala 3:19.) Ntango balongoli nyongo moko, ezalaka lokola batye elembo monene ya X likoló ya motángo yango. Kasi, okoki kaka komona motángo oyo ezalaki wana. Kasi koboma makomi ezali ndenge mosusu. Mpo na kokanga ntina ya maloba yango ya elilingi, tosengeli komikundwela ete na ntango ya kala, bazalaki kosalela mai ya mokanda oyo basalá na karbone basangisá na kɔle mpe mai. Moto akokaki kopɔlisa elamba mpe kopangwisa makomi. Na yango, ntango nyongo ‘ebomami,’ elimwe mpenza. Makambo oyo ekomamaki ekokaki komonana lisusu polele te na miso. Makomi yango ezali lisusu te. Epesaka biso esengo na motema koyeba ete Yehova asukaka kaka te na kolongola masumu na biso, kasi abomaka yango mpe nyonso!—Nz. 51:9.
“Mpo masumu na bino ebomama” (Mis. 3:19)
12. Maloba ya elilingi oyo elobeli lipata monene elimboli nini mpo na biso?
12 Yehova asaleli mpe maloba mosusu ya elilingi mpo na komonisa ndenge abomaka masumu. Alobi boye: “Nakozipa misala na yo ya kobuka mibeko lokola nde ezipami na lipata mpe masumu na yo lokola nde na lipata moko monene.” (Yis. 44:22) Ntango Yehova alimbisi, ezalaka lokola nde asaleli lipata moko monene mpo na kozipa masumu na biso mpo emonana lisusu te.
“Nakozipa misala na yo ya kobuka mibeko lokola nde ezipami na lipata” (Yis. 44:22)
13. Tomiyokaka ndenge nini ntango Yehova alimbisi masumu na biso?
13 Bandakisa yango ezali koteya biso nini? Ntango Yehova alimbisi masumu na biso, tosengeli te kotikala na ngambo mpo na masumu yango bomoi na biso mobimba. Na nzela ya makila ya Yesu Kristo, banyongo na biso nyonso elongwaka. Ata soki tokokaki kotala na esika oyo ekomamaki, ekomonana lisusu te. Soki tobongoli motema na masumu na biso mpe Yehova alimbisi biso, ezalaka lokola nde tosalaki masumu yango te; yango nde matomba ya kolimbisa ya solo oyo eutaka epai ya Yehova.
YEHOVA AZONGISAKA BOYOKANI YA MALAMU
Ndenge Yehova alimbisaka epesaka biso nzela ya kozala na boyokani malamu ná ye (Talá paragrafe 14)
14. Mpo na nini tokoki kondimela Yehova ntango alobi ete alimbisi biso? (Talá mpe bililingi.)
14 Kolimbisa ya solo oyo eutaka epai ya Yehova epesaka biso nzela ya kozala na boyokani malamu ná ye. Esalisaka biso tóboya komiyoka ntango nyonso ete tomemi ngambo. Tobangaka te ete mbala mosusu Yehova akangelá biso nkanda mpe alukaka ndenge ya kopesa biso etumbu. Likambo ya bongo ekoki kosalema te. Mpo na nini tokoki kondimela Yehova ntango alobi ete alimbisi biso? Yehova ayebisaki mosakoli Yirimia ete: “Nakolimbisa libunga na bango, mpe nakokanisa lisumu na bango lisusu te.” (Yir. 31:34) Ntoma Paulo mpe azongelaki maloba yango, ete: “Nakokanisa lisusu te masumu na bango.” (Ebr. 8:12) Kasi yango elimboli mpenza nini?
“Nakokanisa lisumu na bango lisusu te” (Yir. 31:34)
15. Na ndenge nini Yehova akanisaka lisusu masumu na biso te?
15 Na Biblia, maloba “kokanisa lisusu” elimbolaka kaka te kozongisa na makanisi to komikundwela likambo. Kasi, ekoki mpe kopesa likanisi ya kosala likambo. Mosali-mabe oyo babakaki na nzete pembeni ya Yesu alobaki na ye: “Yesu, kanisá ngai ntango okokóma na Bokonzi na yo.” (Luka 23:42, 43) Moto yango azalaki kosɛnga kaka te ete Yesu akanisa ye na ntango wana. Eyano ya Yesu emonisaki ete akosala likambo mpo na mosali-mabe yango, akosekwisa ye. Na yango, ntango Yehova alobi ete akanisaka lisusu masumu na biso te, alingi koloba ete akosala biso eloko te mpo na yango. Akopesa biso etumbu te na nsima mpo na masumu oyo asilaki kolimbisa.
16. Biblia emonisi ete tokómaka ndenge nini ntango Yehova alimbisi biso?
16 Biblia esaleli maloba mosusu ya elilingi mpo na kosalisa biso tóyeba bonsomi oyo tozwaka ntango Yehova alimbisi biso. Lokola tozali bato ya kozanga kokoka mpe tobendamaka na masumu, Biblia ebengi biso “baombo ya lisumu.” Kasi ntango Yehova alimbisi biso, tokómaka lokola baombo oyo ‘basikolami na lisumu.’ (Rom. 6:17, 18; Em. 1:5) Ya solo, ntango Yehova alimbisi biso, epesaka biso esengo mpo toyokaka ete tolongwe na boombo.
“Bosikolamaki na lisumu” (Rom. 6:18)
17. Na ndenge nini tobikaka ntango Yehova alimbisi biso? (Yisaya 53:5)
17 Tángá Yisaya 53:5. Maloba ya elilingi ya nsuka oyo tokotalela ekokanisi biso na bato oyo bazali na maladi oyo ebomaka. Na lisalisi ya mbeka ya lisiko oyo Yehova apesaki na nzela ya Mwana na ye, Biblia elobeli biso lokola bato oyo babiki. (1 Pe. 2:24) Lisiko esali ete boyokani na biso elongo na Yehova ezonga malamu; boyokani yango ebebaki mpo na maladi ya elimo, elingi koloba lisumu. Ndenge kaka moto oyo abiki na maladi asepelaka mpenza, biso mpe tosepelaka ntango tobiki na elimo mpe tozongi na boyokani malamu ná Yehova mpo alimbisi biso.
“Tobiki mpo na bampota na ye” (Yis. 53:5)
NDENGE YEHOVA ALIMBISAKA: OYO YANGO ELIMBOLI MPO NA BISO
18. Makambo nini toyekoli nsima ya kotalela maloba ya elilingi oyo elobeli ndenge Yehova alimbisaka? (Talá mpe etanda “Ndenge oyo Yehova alimbisaka biso.”)
18 Makambo nini toyekoli nsima ya kotalela maloba ya elilingi ya Biblia oyo elobeli ndenge Yehova alimbisaka? Toyekoli ete ntango Yehova alimbisaka, asalaka lokola nde masumu yango esalemaki te mpe azongelaka yango te. Yango esalisaka biso tózala na boyokani malamu ná ye, Tata na biso ya likoló. Lisusu, tomoni ete kolimbisa ya Yehova ezali likabo. Alimbisaka biso mpo na bolingo na ye mpe boboto monene na ye, oyo amoniselaka bato ya masumu. Ezali te lotomo oyo bato basengeli na yango.—Rom. 3:24.
19. (a) Tosengeli kozala na botɔndi mpo na likambo nini? (Baroma 4:8) (b) Tokolobela nini na lisolo oyo elandi?
19 Tángá Baroma 4:8. Mokomoko na biso asengeli kozala na botɔndi ndenge Yehova azali Nzambe oyo ‘alimbisaka mpenza’! (Nz. 130:4) Kasi, mpo alimbisa biso tosengeli kosala likambo moko ya ntina. Yesu alobaki: “Soki bozali kolimbisa bato mabunga na bango te, Tata na bino mpe akolimbisa mabunga na bino te.” (Mat. 6:14, 15) Na yango, ezali polele ete tosengeli komekola Yehova na oyo etali kolimbisa. Ndenge nini tokoki kosala yango? Lisolo oyo elandi ekomonisa biso oyo tosengeli kosala.
LOYEMBO 46 Totɔndi yo, Yehova
a Makomi ya libosoliboso ya Ebre esaleli liloba “bolimbisi,” oyo emonisi ete kaka yango nde ezali kolimbisa ya solo, atako ezali na balolenge mosusu ya kolimbisa. Mabongoli mingi ya Biblia ebimisi te likanisi yango ya ntina, kasi Biblia Libongoli ya Mokili ya Sika ebimisi likanisi yango, ebongoli Nzembo 130:4 na ndenge oyo ekeseni na mabongoli mosusu.
