Otángaki na likebi masolo nyonso ya Linɔ́ngi ya Mosɛnzɛli ya mbula oyo? Meká naino koyanola na mituna oyo elandi:

Matomba nini tokozwa soki tozali kozwa ntango mpo na kosolola na Yehova, koyoka ye, mpe kokanisa ye?

Tokobanda kozwa bikateli ya malamu, tokokóma bateyi malamu, kondima na biso ekokóma lisusu makasi, mpe bolingo na biso mpo na Yehova ekokóma lisusu makasi.​—w22.01, nk. 30-31.

Soki toyekoli kotyela Yehova motema mpe bato oyo ye aponi mpo na kokamba, yango ekosalisa biso na nini?

Sikoyo nde ntango ya koyekola kotyela lolenge oyo Nzambe asalaka makambo motema mpe koboya kotya ntembe na malako mpe bikateli ya bankulutu. Ntango bolɔzi monene ekobanda, tokozala pene mpo na kotosa ata soki tokozwa malako oyo ekomonana ete ebongi te to mpe ezangá motó na makolo.​—w22.02, nk. 4-6.

Anzelu alingaki koloba nini ntango ayebisaki Zekaria likambo etali “nsinga ya nivo na lobɔkɔ ya [Guvɛrnɛrɛ] Zerubabele”? (Zek. 4:8-10)

Emonaneli yango elendisaki basaleli ya Nzambe ete bakosilisa kotonga tempelo mpe ekokokisa masɛngami ya Yehova.​—w22.03, nk. 16-17.

Ndenge nini tokoki kozala “ndakisa . . . na maloba”? (1 Tim. 4:12)

Tolobaka na boboto mpe na limemya na mosala ya kosakola, toyembaka na motema mobimba, topesaka biyano mbala na mbala na makita, tolobaka solo, tolendisaka basusu, mpe toboyaka kotɔnga basusu.​—w22.04, nk. 6-9.

Mpo na nini makambo oyo elobelami na Danyele mokapo 7 mpo na bibakata ya nyama minei (makonzi) eyokani na makambo oyo Emoniseli 13:1, 2 elobeli na nyama kaka moko?

Nyama mabe oyo Emoniseli 13 elobeli, ezali komonisa kaka te bokonzi moko boye, na ndakisa Roma. Kasi, ezali komonisa nde baguvɛrnema nyonso ya nguya oyo eyangeli bato.​—w22.05, lok. 9.

Wapi lolenge ya malamu ya komonisa ete totyelaka bosembo ya Yehova motema?

Soki moto moko afingi biso, asaleli biso mabe, to asaleli biso lisumu, tosengeli kosala makasi ya koboya kosilika mpe koboya kobomba nkanda na motema, tótika makambo nyonso na mabɔkɔ ya Yehova. Akolongola makambo nyonso ya mabe oyo eutá na lisumu.​—w22.06, nk. 10-11.

Likambo nini ndeko oyo azali kosala libondeli na makita ya lisangá asengeli kobosana te?

Asengeli te kobondela mpo na kopesa bandeko ya lisangá toli to kopesa mayebisi. Mingimingi na ebandeli ya makita, ezali na ntina te “koloba mingi.” (Mat. 6:7)​—w22.07, nk. 24-25.

Na ndenge nini “baoyo bazalaki kosala makambo ya mabe” bakozwa “lisekwa ya kosambisama”? (Yoa. 5:29)

Bakozwa te etumbu na kotalela makambo oyo basalaki na bomoi na bango liboso bákufa. Bakolandela bango malamumalamu na kotalela bizaleli mpe etamboli na bango nsima ya lisekwa na bango.​—w22.09, lok. 18.

Diskur nini ya kolendisa Joseph Rutherford asalaki na liyangani moko na sanza ya 09/1922?

Na liyangani moko na engumba Cedar Point, na etúká ya Ohio, na États-Unis, Joseph Rutherford alobaki boye: “Mokonzi azali koyangela! Bino nde bapalanganisi ya nsango na ye. Na yango, bósakola, bósakola, bósakola, Mokonzi mpe bokonzi na ye!”​—w22.10, nk. 3-5.

Na kotalela Yisaya mokapo ya 30, wapi lolenge misato oyo Nzambe asalisaka biso mpo tóyika mpiko?

Mokapo yango emonisi ete Nzambe (1) ayokaka mpe ayanolaka na mabondeli na biso, (2) apesaka biso litambwisi, mpe (3) apambolaka biso sikoyo mpe akopambola biso na mikolo ezali koya.​—w22.11, lok. 9.

Mpo na nini tokoki koloba ete maloba oyo ezali na Nzembo 37:10, 11, 29 ekokisamaki na ntango ya kala mpe ekokokisama na mikolo ezali koya?

Maloba ya Davidi emonisi mapamboli oyo ezalaki na Yisraele, na ndakisa na boumeli ya boyangeli ya Salomo. Yesu azalaki kolobela Paradiso oyo ekoya mpe azongelaki maloba ya vɛrsɛ 11. (Mat. 5:5; Luka 23:43)​—w22.12, nk. 8-10, 14.