Otángaki na likebi masolo nyonso ya Linɔ́ngi ya Mosɛnzɛli ya mbula oyo? Meká naino koyanola na mituna oyo elandi:

Ndakisa nini Yehova apesi na ndenge ya kosalela basi makambo?

Asalelaka bango makambo kozanga kopona bilongi, asepelaka mpe na mibali mingi koleka basi te. Nzambe ayokaka basi, atyaka likebi na mayoki mpe na makanisi na bango. Mpe atyelaka bango motema ete bakoki kosala mosala na ye. —w24.01, nk. 15-16.

Ndenge nini tokoki kosalela Baefese 5:​7, oyo elobi: “Bósala te ndenge bango basalaka”?

Ntoma Paulo akebisi biso ete tósala boninga te na bato oyo bakoki kosala ete ezala mpasi mpo na biso kotosa mibeko ya Nzambe. Baninga yango ya mabe ezali baoyo tolekisaka na bango ntango boye na miso to oyo tosololaka na bango na nzela ya Internet. —w24.03, nk. 22-23.

Masapo nini ya lokuta tosengeli kokeba na yango?

Tosengeli kokeba na masolo oyo euti na baninga oyo bazali na makanisi mabe te kasi batali te soki ezali solo, bamesaje oyo euti epai ya bato oyo toyebi te, mpe bapɛngwi oyo basalaka lokola basepeli na nsango na biso. —w24.04, lok. 12.

Makambo nini toyebi mpe nini toyebi te mpo na ndenge oyo Yehova akosambisa Salomo, bato oyo bakufaki na Sodoma ná Gomora mpe na Mpela?

Toyebi na bosikisiki te soki Yehova akatelaki bango etumbu ya kobebisama mpo na libela. Kasi, toyebi ete Yehova ayebi makambo nyonso mpe azali na motema mawa mingi. —w24.05, nk. 3-4.

Koyeba ete Nzambe azali “Libanga” ezali koteya biso nini? (Mib. 32:4)

Tokoki kozwa ekimelo epai ya Yehova. Azali moto ya kotyela motema, akokisaka ntango nyonso bilaka na ye. Mpe apikami makasi, bomoto na ye mpe mikano na ye ebongwanaka te. —w24.06, nk. 26-28.

Nini ekoki kosalisa yo omesana na lisangá ya sika?

Tyelá Yehova motema, akosalisa yo ndenge kaka asalisaki basaleli na ye na ntango ya kala. Boyá kokokanisa lisangá na yo ya sika na oyo ya kala. Omipesa na makambo ya lisangá ya sika, mpe salá makasi ozwa baninga ya sika. —w24.07, nk. 26-28.

Mateya nini tokoki kozwa na bandakisa misato oyo ezali na Matai mokapo 25?

Ndakisa ya bampate ná bantaba emonisi ntina ya kozala sembo mpe moyengebene. Ndakisa ya bangɔndɔ ya mayele mpe ya zoba emonisi ete tosengeli komonisa ete tomibongisi mpe tozali ekɛngɛ. Mpe ndakisa ya batalanta ezali koteya biso ntina ya kozala makasi na mosala mpe na molende. —w24.09, nk. 20-24.

Ndako ya kokɔtela ya tempelo ya Salomo ezalaki molai ndenge nini?

Na 2 Ntango 3:​4, bamaniskri mosusu ya kala elobi “mapeko 120,” oyo ezali komonisa ete ezalaki na bolai ya mɛtrɛ 53. Kasi baminiskri mosusu oyo ebongi kotyelama motema elobi “mapeko 20,” oyo esali mɛtrɛ 9. Emonani ete oyo bamaniskri yango elobi eyokani mpenza na bonene ya bifelo ya tempelo. —w24.10, lok. 31.

Kozala ‘mobali ya mwasi kaka moko’ elimboli nini mpo na mosaleli na misala? (1 Tim. 3:12)

Elimboli ete asengeli kobala kaka mwasi moko mpe kosala pite te. Lisusu, asengeli te kotyela mwasi mosusu likebi oyo ebongi te. —w24.11, lok. 19.

Mpo na nini tokoki koloba ete Yoane 6:53 ezalaki te ndakisa mpo na Bilei ya Mpokwa ya Nkolo?

Yoane 6:53 elobeli ntina ya kolya mosuni ya Yesu mpe komɛla makila na ye. Yesu alobaki maloba yango na mobu 32 T.B., na Galile, epai ya Bayuda oyo basengelaki komonisa kondima epai na ye. Nzokande, Yesu abandisaki Bilei ya Mpokwa ya Nkolo mbula moko na nsima na Yerusaleme. Kuna Yesu alobaki na baoyo bakoyangela elongo na ye na likoló. —w24.12, nk. 10-11.