Ntoma Paulo akomelaki Timote oyo azalaki nkulutu lokola ye ete: “Liboso ya Nzambe, ya Kristo Yesu mpe ya baanzelu oyo baponami, nazali kopesa yo mitindo ete olanda malako oyo kozanga kokanisela bato mabe, mpe kopona elongi ya moto te.”—1 Tim. 5:21.

Liboso, tólobela naino baoyo bazali te na kati ya baanzelu oyo baponami. Ezali polele ete ezali te bato 144000. Ntango Paulo akomelaki Timote, lisekwa ya bakristo oyo batyami mafuta na elimo mpo na kokende na likoló ebandaki naino te. Lokola bantoma mpe bakristo mosusu oyo batyami mafuta na elimo bakómaki naino te bikelamu ya elimo, “baanzelu oyo baponami” ekokaki kozala bango te.—1 Ko. 15:​50-54; 1 Tes. 4:13-17; 1 Yoa. 3:2.

Longola yango, “baanzelu oyo baponami” bakokaki te kozala baanzelu oyo batombokaki na ntango ya Mpela. Baanzelu wana bamityaki na ngámbo ya Satana mpe bakómaki bademo, mpe Yesu atɛmɛlaki bango. (Eba. 6:2; Luka 8:30, 31; 2 Pe. 2:4) Na mikolo ekoya, bakokangama na libulu mozindo na boumeli ya mbula 1000 mpe na nsima bakobomama mpo na libela elongo na Zabolo.—Yuda 6; Em. 20:1-3, 10.

Na yango, “baanzelu oyo baponami,” oyo Paulo alobelaki, esengeli kozala baanzelu na likoló oyo bazalaki kopesa ‘Nzambe ná Kristo Yesu’ mabɔkɔ, bato mibale oyo vɛrsɛ yango elobeli mpe.

Ezali na bankóto na bankóto ya baanzelu ya sembo. (Ebr. 12:22, 23) Tosengeli kokanisa te ete bango nyonso bazalaka na mokumba moko na ntango moko. (Em. 14:17, 18) Tóbosana te ete na libaku moko, anzelu moko nde azwaki mokumba ya koboma basoda 185000 ya limpinga ya Asiri. (2 Bak. 19:35) Mbala mosusu baanzelu ebele nde bazwá mokumba ya ‘kolongola na Bokonzi [ya Yesu] nyonso oyo ebɛtisaka libaku mpe bato oyo babukaka mibeko.’ (Mat. 13:39-41) Ekoki kozala ete basusu ‘bayanganisaka esika moko bato oyo ye aponá’ kuna na likoló. (Mat. 24:31) Mpe basusu bazwi mitindo ya ‘kobatela biso na banzela na biso nyonso.’—Nz. 91:11; Mat. 18:10; talá mpe Matai 4:11; Luka 22:43.

Emonani ete “baanzelu oyo baponami,” oyo 1 Timote 5:21 elobeli, ezalaki baanzelu oyo bazwaki mokumba moko ya ntina mingi na boyokani na basaleli ya Nzambe. Na mokapo yango, Paulo apesaki toli ya bwanya epai ya bankulutu, baoyo lisangá ebongi kopesa limemya. Na ngámbo na bango, bankulutu basengelaki kokokisa mikumba na bango “kozanga kokanisela bato mabe, mpe kopona elongi ya moto” mpe basengelaki te kozwa ekateli to kokata likambo moko kozanga kokanisa na mozindo. Ntina monene oyo basengelaki kolanda toli ya Paulo oyo ekomami na litambwisi ya elimo ya Nzambe ezali ete bazali kosala “liboso ya Nzambe, ya Kristo Yesu mpe ya baanzelu oyo baponami.” Na yango ezali polele ete baanzelu mosusu bazali na mikumba oyo etali lisangá, na ndakisa kobatela yango, kotambwisa mosala ya kosakola, mpe kopesa Yehova lapolo.—Mat. 18:10; Em. 14:6.