Mbula nkóto oyo tobandi ekozala na kimya?

MOKOLO ya 14 Sɛtɛmbɛ 1999, makita minene esalemaki na Paris mpe na New York, mpo na mbula oyo bato basengeli kozala na elimo ya kimya na mokili mobimba. Likita monene ya ONU (Assemblée générale) elobaki ete mobu 2000 nde ekozala mbula oyo esengeli kolendisa bato bázala na elimo ya kimya. Federico Mayor, mokambi ya kala ya UNESCO, asɛngaki mpenza ete ‘bálendisa elimo yango ya kimya mpe bámonisa bato na mokili mobimba ete makambo ya mobulu ezali malamu te.”

Na UNESCO, balobaka ete “lokola bitumba ebandaka na makanisi ya bato, esengeli mpe kobanda kotonga makambo oyo ezali kolendisa kimya na makanisi ya bato.” Yango wana, UNESCO emityeli mokano ya kolendisa elimo ya kimya na “kelasi, na kopesana makanisi mpe na kosalisana.” Federico Mayor alobaki ete ekoki kaka te kozala “moto ya kimya to moto oyo aboyaka bitumba, kasi esengeli kozala moto oyo atyaka kimya.”

Ezali mawa na komona ete mobu 2000 ezalaki na kimya te. Makambo oyo ezali koleka na ntango na biso, bakisa mpe makambo oyo esalemaki na mobu 2000, emonisi mpenza ete moto azali na makoki te ya kosilisa bitumba mpe mobulu ata soki asali milende mingi.

Kasi, tokoki komona mpenza ete mateya ememaka kimya. Eleki mbula soki 2 700, mosakoli Yisaya alobaki boye: “Bana na yo nyonso bakolakisama na [Yehova], mpe [kimya, NW] ya bana na yo ekozala monene.” (Yisaya 54:13, Biso nde totɛngisi makomi) Yisaya asakolaki ete ekozala na ntango moko oyo bato bauti na bikólo nyonso bakolanda losambo ya pɛto ya Yehova Nzambe mpo na koyekola banzela na Ye. Matomba ekozala nini? “Bakotula mipanga na bango ete mizala bitimweli, mpe makonga na bango ete mazala bikateli na matiti. Libota moko bakotombwela libota mosusu mopanga te, bakoyekola etumba lisusu mpe te.” (Biso nde totɛngisi makomi, Yisaya 2:2-4) Batatoli ya Yehova, bazali kolanda esakweli yango mpe bazali koteya bato na mokili mobimba, mpe mosala yango esalisi bamilio ya bato bátika bolingo ya ekólo mpe koyina bato ya loposo mosusu, makambo oyo ebimisaka bitumba.

Nsukansuka, bitumba ekozala lisusu te ntango Bokonzi ya Nzambe ekoyangela, Bokonzi oyo ekotya kimya na mabele mobimba. (Nzembo 72:7; Danyele 2:44) Na ntango yango nde, maloba ya mokomi ya nzembo ekokokisama ete: “Yaká kotala misala ya [Yehova] oyo asali bikamwiseli kati na mokili. Ye akosukisa bitumba kino nsuka na mokili.”​—Nzembo 46:8, 9.