Biso nyonso tolingaka bápesa biso longonya

EZALAKI mokolo moko ya malamu mpenza mpo na mwana moko ya moke ya mwasi. Atako na mikolo mosusu azalaki kozwa etumbu, kasi na mokolo wana, amitambwisaki mpenza na lolenge esengeli. Nzokande na butu, nsima ya kolalisa ye na mbeto, mama na ye ayokaki ye abandi kolela. Ntango atunaki ye mpo na nini azali kolela, mwana azongiselaki ye na mongongo ya kolela ete: “Ngai, nazalaki mwana malamu te lelo?”

Motuna oyo ekɔtaki mpenza na motema ya mama na ye lokola mbeli. Ya solo, mama azalaka mbala mingi pene ya kopesa mwana na ye etumbu. Nzokande mokolo wana, atako ayebaki malamu ete mwana na ye asalaki makasi asala likambo ya mabe te, kasi abosanaki koyebisa ye ata mwa liloba moko oyo ekokaki kosepelisa ye.

Ezali bobele mwa bana ya basi te nde bazalaka na mposa bápesa bango longonya to báyebisa bango maloba oyo ekosepelisa bango. Biso nyonso tozwaka to mpe bapamelaka biso, yango wana tolingaka mpe bápesa biso longonya.

Toyokaka ndenge nini ntango moto moko apesi biso longonya na maloba oyo euti mpenza na motema na ye? Esepelisaka motema na biso mpe esalisaka biso tólekisa mokolo malamu, boye te? Na ntembe te, yango esalaka tómona ete ezali na bato oyo batyelaka biso likebi, mpe bamibanzabanzaka mpo na biso. Ezali kondimisa biso ete milende na biso ezali na ntina mpe ezali kotinda biso tósala lisusu malamu koleka na mikolo ezali koya. Yango wana, ezali likambo ya kokamwa te na komona ete kokumisa ndenge wana esalaka ete tólinga lisusu mingi moto oyo azwi ntango ya koyebisa biso mwa liloba moko ya kolendisa.​—⁠Masese 15:⁠23.

Yesu Klisto ayebaki malamu ntina ya kopesa longonya. Na lisese na ye ya batalanta, nkolo ya mosala (oyo emonisi Yesu Klisto ye moko) azali kokumisa na esengo mpenza mokomoko ya baombo mibale ya sembo mpe alobaki ete: “Longonya, moombo ya malamu mpe ya sembo.” Oyo nde likambo ya kolendisa! Ata soki makoki mpe mosala na bango ezalaki mpenza ndenge moko te, bango nyonso mibale bazwaki longonya ndenge moko.​—⁠Matai 25:​19-23.

Na bongo, tóbosana te mama ya mwana mwasi ya moke oyo. Biso tosengeli te kozela tii bato mosusu bálela liboso, nde na nsima tóya kopesa bango longonya. Na esika ya kosala bongo, tosengeli nde komityela mokano ya koluka na lolenge nyonso ntango oyo tosengeli kopesa basusu longonya. Ya solo, tozali na bantina ya kopesa basusu longonya oyo euti mpenza na motema mpe ebongi tósala yango na mabaku nyonso.