“Mpo na koyebisa nkombo ya Yehova”

NA MOKILI mobimba, bato basepelaka na bazulunalo Linɔ́ngi ya Mosɛnzɛli mpe Lamuká! mpo elobelaka makambo ya elimo mpe eteyaka malamu. Likambo yango emonani na mokanda elandi, oyo motángi moko na France auti kokomela biso:

“Nazali elenge mwasi, nauti na Afrika mpe natángi kelasi mingi te. Kala mingi te, nakómaki kotánga bazulunalo na bino. Lokola masolo na yango ebendaka ngai, nazali komona sikoyo ntina ya koyeba kotánga. Mpo na bino nde nayebi maloba mingi lisusu mpe nakómi kokoma mokanda na bafoti mingi te.

“Nazali kokamwa ndenge bolobelaka makambo nyonso oyo etali bato, mabelé mpe Mozalisi. Masolo yango ezalaka polele mpenza mpe etindaka moto akóma na mposa makasi ya kotánga. Moto mosusu te azali na likoki ya koteya bato ya lolenge nyonso na mbala moko boye.

“Nazali mpe kokamwa ntango nazali komona ete nyonso wana bozali kosala yango mpo na koluka mbongo te, kasi kaka mpo na koyebisa nkombo ya Yehova. Nayebi ete azali kosepela na bino mpe napesi bino matɔndi. Tiká bókoba kozwa makasi epai ya Mozalisi mpo bóteyaka.”

Lelo oyo, Batatoli ya Yehova bazali kokoba mosala na bango ya koteya Biblia na mikili 235. Linɔ́ngi ya Mosɛnzɛli ebimaka na minɔkɔ 148 mpe Lamuká! na minɔkɔ 87. Bazulunalo yango ebimisamaka te mpo na kokumisa moto moko boye. Toli ya Biblia mpe makambo ya lelo, oyo ezwamaka kati na yango, ekomamaka mpo na kokumisa Mozalisi, oyo alobi boye: “Ngai, Yehova, nazali . . . ye oyo azali koteya yo mpo ozwa litomba.” (Yisaya 48:​17, NW) Tiká ete ozwa litomba na kotángáká mokolo na mokolo Makomami Mosantu elongo na bazulunalo yango oyo elimbolaka Biblia.