Oyo ezali nimero ya boyekoli!

Tobongisi lisusu nimero ya boyekoli mpo emonana kitoko koleka mpe esalisa yo mingi na koyekola solo ya Liloba ya Yehova.​—Nz. 1:2; 119:97.

Eleki sikoyo mbula minei banda tobandaki kobimisa Linɔ́ngi ya Mosɛnzɛli ya bato nyonso mpe Linɔ́ngi ya Mosɛnzɛli ya boyekoli mpo na biso moko Batatoli ya Yehova mpe bayekoli ya Biblia oyo bazali kokola malamu.

Ndeko moko oyo aumeli mingi na lisangá akomaki boye: “Ntango natángaki nimero ya liboso ya boyekoli ya Linɔ́ngi ya Mosɛnzɛli, namonaki ete ezali kitoko mingi mpe esimbaki mpenza motema na ngai. Elimbolaki mateya ya Biblia na mozindo mpe na maloba oyo ekɔtaki mpenza na motema na ngai. Matɔndi mingi mpo na ebongiseli wana ya sika.” Ndeko mobali mosusu akomaki boye: “Nasepelaka kolekisa bangonga mingi na kotánga nimero ya boyekoli ná Biblia na ngai Rbi8 pembeni.” Tokanisi ete yo mpe oyokaka ndenge wana.

Ndenge oyebi yango, Linɔ́ngi ya Mosɛnzɛli ebimaka banda mobu 1879, mpe soki ezali kokoba tii lelo oyo, ezali na lisalisi ya elimo mpe lipamboli ya Yehova. (Zek. 4:6) Na boumeli ya mbula 133 oyo esali, ezipeli ya zulunalo yango ebongwanaki mbala mingi. Na 2012, ezipeli ya nimero mokomoko ya boyekoli ekozala na liyemi moko kitoko oyo ekomonisa bandeko oyo bazali kosakola; yango ekokundwela biso mokumba oyo Nzambe apesá biso ya kopesa litatoli malamumalamu mpo na Bokonzi ya Yehova. (Mis. 28:23) Na lokasa 2, okokuta fɔtɔ oyo basalelaki liyemi yango mpe mwa maloba oyo kolimbola likambo oyo ezali kosalema mpe esika nini ezali kosalema. Yango ekobanda kokundwela biso nyonso ete basaleli ya Yehova bazali kosakola nsango malamu “na mabele mobimba esika bato bafandi.”​—Mat. 24:14.

Makambo nini mosusu ebongwani na nimero ya boyekoli? Etanda ya bozongeli ekómi na ebandeli ya lisolo ya boyekoli. Yango ekomonisa yo makanisi ya ntina oyo osengeli koluka ntango ozali kotánga mpe koyekola lisolo yango. Atako bongo, batambwisi ya Boyekoli ya Linɔ́ngi ya Mosɛnzɛli bakokoba kotuna mituna yango na nsuka ya boyekoli. Okomona ete bisika oyo etikalaka mpamba na mipanzi ya lokasa ekómi mwa monene mpe ete nimero ya lokasa mpe ya paragrafe ekómi mwa monene.

Ndenge nimero oyo emonisi yango, motó ya likambo moko ya sika oyo elobi “Biloko oyo tosalelá kala,” ebakisami mpo na komonisa makambo minene oyo esalemá na lisolo ya Batatoli ya Yehova na ntango na biso. Longola yango, masolo ya bomoi ya bandeko ekobanda kobima na banimero mosusu na motó ya likambo oyo elobi “Bamipesaki na bolingo na bango moko.” Yango ekomonisa esengo oyo bandeko bazwaki na ndenge bakendaki kosakola na bisika oyo basakoli ya Bokonzi bazalaki mingi te.

Tiká ete osepelaka mpenza na ntango oyo okobanda kolekisa na koyekola Liloba ya Nzambe na lisalisi ya zulunalo oyo.

Babimisi

[Elilingi na lokasa 3]

1879

[Elilingi na lokasa 3]

1895

[Elilingi na lokasa 3]

1931

[Elilingi na lokasa 3]

1950

[Elilingi na lokasa 3]

1974

[Elilingi na lokasa 3]

2008