Boboto ekitisaka nkanda

NA EKÓLO Pays-Bas, mobange mwasi moko azalaki na esengo ata moke te ntango Batatoli mibale, George ná Manon, bakendaki kosakwela ye nsango malamu ya Bokonzi. Bayebisaki bango ete mobali ya liboso ya mwasi yango akufá; mobali oyo abalaki ye na nsima mpe akufaki, mwana na ye moko ya mobali akufaki, mpe ye moko azalaki na maladi ya mingai makasi na mikuwa. Atako akitaki mwa moke ntango bazalaki kosolola, azalaki kaka na boboto te.

Na nsima, George apesaki Manon likanisi ete bámemela mwasi yango bafololo mokolo bakozongela ye mpamba te azalaki komonana ete azali ye moko mpe azali nkandankanda. Ntango bazongaki, mwasi yango oyo nkombo na ye Rie asepelaki na likabo na bango. Kasi, na ngonga wana, akokaki koyamba bango te mpo básolola; na yango, bayokanaki bázongela ye mokolo mosusu. Ntango George ná Manon bazongaki mokolo oyo bayokanaki, bakutaki ye te. Atako bamekaki kozonga na bangonga mosusu, bakutaki ye kaka te. Kutu, bakómaki kokanisa ete azali kokima bango.

Nsukansuka, mokolo moko George akutaki Rie na ndako. Rie asɛngaki bolimbisi ndenge azalaki te mokolo oyo bayokanaki mpe ayebisaki bango ete azalaki na lopitalo. Abakisaki ete: “Kasi, bokoki koyeba te eloko oyo nasalaki nsima na bino. Nabandaki kotánga Biblia!” Basololaki malamu mokolo yango mpe babandaki boyekoli ya Biblia.

Ntango Rie azalaki koyekola Biblia, akómaki kobongwana mokemoke. Atikaki ezaleli ya nkandankanda mpe akómaki moto ya esengo mpe ya boboto. Atako azalaki kobima te, akómaki mbala moko koyebisa moto nyonso oyo ayei kotala ye makambo oyo azalaki koyekola. Maladi na ye ezalaki kopekisa ye ayanganaka mbala na mbala na makita, kasi azalaki kosepela mingi ntango bandeko basi ná mibali bazalaki koya kotala ye. Mokolo oyo akokisaki mbula 82, akendaki na liyangani ya zongazonga mpe azwaki batisimo mpo na komonisa ete amipesi na Nzambe.

Nsima ya mwa basanza, akufaki mpe na nsima, bamonaki mwa maloba akomaki ntango azalaki na bomoi. Kati na yango, alobelaki mpasi ya kozala yo moko ntango ozali mobange mpe amonisaki ntina ya kozala na boboto. Manon alobi ete: “Maloba yango esimbaki mpenza motema na ngai mpe nazali na esengo ndenge Yehova asalisaki biso tómonisela ye boboto.”

Ya solo, ndakisa ya Yehova ye moko ezali kotinda biso tózala na bolingo mpe boboto. (Ef. 5:1, 2) Mosala na biso ekobota mbuma soki tozali “kopesa ndakisa malamu ete tozali basaleli ya Nzambe . . . na boboto.”​—2 Ko. 6:4, 6.