Yesu alobaki ete “bato ya nzoto kolɔngɔnɔ bazalaka na mposa ya monganga te, kasi nde bato oyo bazali kobɛla.” (Matai 9:12) Na ndenge yango alingaki koloba ete Makomami epekisi te koluka lisalisi ya minganga. Na yango, Batatoli ya Yehova bandimaka nkisi mpe lisalisi ya minganga. Balingaka kozala na nzoto kolɔngɔnɔ mpe na bomoi molai. Kutu, ndenge moko na Luka mokristo moko ya siɛklɛ ya liboso, Batatoli ya Yehova mosusu bazali minganga.​—Bakolose 4:14.

Nzokande, Batatoli ya Yehova bandimaka te lisalisi ya monganga oyo eyokani te na mitinda ya Biblia. Na ndakisa, baboyaka bázongisa bango makila mpo Biblia epekisi kozongisa makila mpo moto abika. (Ebandeli 9:4; Balevi 17:1-14; Misala 15:28, 29) Liloba ya Nzambe epekisi mpe lisalisi ya monganga oyo ezali kosɛnga kosalela “misala ya maji,” to misala ya bilimo mabe.​—Yisaya 1:13; Bagalatia 5:19-21.

Minganga mingi basalelaka bankisi oyo ezali kobuka te mitinda ya Biblia. Bankisi yango oyo Batatoli bandimaka ezalaka mbala mingi malamu koleka oyo ebukaka mibeko ya Nzambe.

Toboyi te, bato bazalaka na makanisi ndenge na ndenge na oyo etali kosalisa nzoto. Nkisi oyo ekoki kosalisa moto mosusu, ekoki te kosalisa oyo mosusu. Na yango, bato oyo bazali koluka koyeba maladi oyo bazali na yango mpe nkisi oyo ekoki kosalisa bango, bakoki mpe koluka likanisi ya monganga mosusu.​—Masese 14:15.

Batatoli nyonso te nde bakozwa ekateli ndenge moko na likambo etali lisalisi ya monganga. Na makambo oyo Biblia epesi mobeko te, Liloba ya Nzambe ezali kotikela mokristo mokomoko asalela lisosoli na ye. (Baroma 14:2-4) Na yango, moto na moto asengeli koluka koyeba nkisi nyonso oyo balingi kopesa ye mpe kondimisama ete eyokani na lisosoli na ye oyo eteyami na Biblia.​—Bagalatia 6:5; Baebre 5:14.

Motatoli asengeli kotalela ekateli nyonso oyo alingi kozwa lokola sofɛlɛ oyo alingi kokatisa esika oyo mituka ezali mingi mpe banzela ekutaná. Soki alandi kaka mituka oyo ezali liboso na ye mpe amikɔtisi na nzela yango, akoki kosala aksida. Sofɛlɛ ya mayele akokitisa vitɛsi mpe kotala malamu liboso akatisa. Ndenge moko mpe, Batatoli bawelaka te kozwa bikateli na makambo etali nkisi ya monganga, bandimaka mpe te nkisi kaka mpo bato mingi bazali kosalela yango. Kutu, bakanisaka malamumalamu mpo na nkisi oyo basengeli kopona mpe batalelaka batoli ya Biblia liboso ya kozwa ekateli.

Batatoli ya Yehova bazalaka mpenza na botɔndi mpo na mosala makasi oyo minganga basalaka mpe ndenge oyo bamipesaka mpo na kosalisa bato. Bazalaka mpe na botɔndi mpo na lisungi ya malamu oyo bato yango bapesaka.