Kokanisa Yesu Kristo
“Bókoba kosala boye mpo na kokanisa ngai.”—LUKA 22:19.
Ntina oyo bato mosusu basalaka fɛti ya Noele.
Basusu balobaka ete basalaka fɛti ya Noele “mpo na” Yesu. Basalaka fɛti yango mpo na kokanisa mbotama na ye.
Mokakatano ezali wapi?
Banzembo mpe makambo mingi oyo basalaka na fɛti ya Noele eyokanaka mpenza te na makambo oyo etali Yesu Kristo. Bamilio ya bato oyo basalaka fɛti yango bandimelaka Yesu te; bamosusu bandimaka kutu te ete azalaki awa na mabele. Mpo na bato ya mimbongo, Noele ekómá fɛti ya kosala bapiblisite ya biloko na bango kasi te mpo na kokanisa Yesu.
Toli nini ya Biblia ekoki kosalisa?
“Mwana ya moto ayaki . . . kopesa molimo na ye lisiko na esika ya bato mingi.” (Marko 10:45) Na ntembe te, Yesu alobaki maloba oyo totángi na ebandeli ya lisolo oyo na mokolo ya kobotama na ye te, kasi nde na mpokwa liboso akufa. Na mpokwa yango, apesaki etinda ete básalaka mwa molulu mpo na kokanisaka liwa na ye. Kasi, mpo na nini Yesu alingaki ete bayekoli na ye bákanisaka liwa na ye na esika ya kokanisa mbotama na ye? Mpamba te bomoi oyo apesaki lokola mbeka epesi bato ya botosi libaku ya kozwa bomoi ya seko. Biblia elobi ete “lifuti oyo lisumu ezali kofuta ezali liwa, kasi likabo oyo Nzambe azali kopesa ezali bomoi ya seko na nzela ya Kristo Yesu Nkolo na biso.” (Baroma 6:23) Na yango, mbula nyonso, na mokolo oyo Yesu akufaki, bayekoli na ye bakanisaka ye te lokola mwana moke, kasi nde lokola “mobikisi ya mokili.”—Yoane 4:42.
“Kristo mpe anyokwamaki mpo na bino, atikeli bino ndakisa mpo bólanda matambe na ye malamumalamu.” (1 Petro 2:21) Lokola Yesu azalaki moto ya kokoka mpe ya mayele, mpo na kokumisa mpe kokanisa ye, osengeli koyekola bizaleli na ye. Kanisá mpe na mozindo ndenge oyo Yesu amonisaki motema mawa, motema molai mpe mpiko mpo na kosala oyo ezali malamu, luká mpe mabaku ya komekola ye na bomoi na yo.
“Bokonzi ya mokili ekómi bokonzi ya Nkolo na biso mpe ya Kristo na ye, mpe akoyangela libela na libela.” (Emoniseli 11:15) Ntango ozali kokanisa Yesu Kristo, talelá makambo oyo azali kosala sikoyo. Yesu azali koyangela lokola Mokonzi na likoló. Liloba ya Nzambe esakolaki boye mpo na Yesu: “Akosambisa na boyengebene mpenza bato oyo bazangá, mpe akopamela na kolongobana mpo na bolamu ya bato ya komikitisa oyo bazali na mabele.” (Yisaya 11:4) Bizaleli wana nyonso ya kitoko ezali nde epai ya Mokonzi moko ya nguya, kasi epai ya mwana oyo abotami sika te.
