Na lisolo na ye likoló ya ngomba, Yesu ayebisaki bayekoli na ye boye: “Bino bozali mungwa ya mabele; kasi soki mungwa esili elɛngi, ndenge nini elɛngi na yango ekozonga? Ezali lisusu na ntina moko te, kasi bakobwaka yango kaka libándá mpo bato bányata yango.” (Matai 5:13) Mungwa ebatelaka biloko mpo ebeba te. Na yango, mbala mosusu ndakisa wana oyo Yesu apesaki emonisi ete bayekoli na ye bakoki to basengeli kobatela elimo mpe bizaleli ya basusu.

Kasi, buku moko (The International Standard Bible Encyclopedia) elobi boye mpo na ndakisa ya mungwa oyo esili elɛngi, oyo Yesu apesaki: “Mungwa oyo bazalaki kozwa na etúká ya Mbu ekufá, ezalaki mbala mingi kobebisama na biloko mosusu; na yango mungwa ekokaki konyangwa soki esangani na biloko yango, mpe ezalaki kosilisa yango elɛngi.” Na yango, tomoni ntina oyo Yesu alobaki ete mungwa oyo ekómi ndenge wana “ezali lisusu na ntina moko te, kasi bakobwaka yango kaka libándá mpo bato bányata yango.” Buku yango ebakisi lisusu boye: “ Atako mungwa ya ba-Mbu mosusu elekaki mungwa ya Mbu ekufá na valɛrɛ mpo na basalite na yango, kozwa mungwa yango ezalaki mpasi te (bakokaki kolɔkɔta yango pembenipembeni ya libongo) mpe yango nde mungwa oyo bazalaki kosalela mingi na Palestine.”

Yesu apesaki ndakisa ya mwasi moko oyo azalaki na badrakimɛ 10 mpe nsima ya kobungisa moko, apelisaki mwinda mpe akɔmbɔlaki ndako na ye malamumalamu tii ntango amonaki yango. (Luka 15:8-10) Na ntango ya Yesu, drakimɛ moko ezalaki lifuti ya mokolo mobimba, boye, kobungisa mbongo oyo Yesu alobelaki, ezalaki kobungisa mbongo ebele. Ata bongo ezali na bantina mosusu oyo emonisi ete ndakisa wana oyo Yesu apesaki ezalaki mpenza ya makambo oyo esalemaka.

Babuku mosusu emonisi ete mbala mingi basi bazalaki kosalela mbongo ya ebende lokola biloko ya kolata na nzoto. Na yango, ekoki kozala ete Yesu azalaki kolobela mbongo ya ebende oyo ezalaki moko ya biloko ya kala ya valɛrɛ, ya libota ya mwasi. Ezala bongo to te, na ntembe te mwasi yango amitungisaki mpenza mpo na komona moko ya badrakimɛ na ye 10 oyo ebungaki.

Lisusu, bandako ya bato mingi na ntango ya Yesu etongamaki na ndenge oyo pole mpe molunge ekokaki kokɔta mingi mpenza. Soki ezalaki na bafenetre te, ezalaki kokɔta kaka moke. Mbala mingi bazalaki kozipa pavema na matiti to na mibimbi ya banzete mikemike ya kokauka ya ndenge na ndenge. Soki mbongo ya ebende ekwei, ezalaki mpasi komona yango. Moto moko ya mayele alobaki boye: “Na yango, soki eloko moko ya moke lokola mbongo ebungi na esika ya bongo, kopelisa mwinda mpe kokɔmbɔla ndako ezalaki lolenge eleki malamu mpo na komona yango.”