Komikitisa elimboli kozala na lolendo te. Moto ya komikitisa amonaka te ete aleki basusu. Moto ya komikitisa ayebaka ete azali moto ya masumu mpe ezali na makambo mosusu oyo akokoka kosala te.

Moize atikaki te ete bokonzi ekómisa ye lolendo. Mbala mingi, emonanaka polele soki moto azali na komikitisa to te soki azwi mwa bokonzi. Robert Ingersoll, molobi moko ya siɛklɛ ya 19, alobaki boye mpo na likambo yango: “Bato mingi bakoki koyikela mikakatano mpiko. Kasi, soki olingi oyeba mpenza ndenge moto azalaka, pesá ye bokonzi.” Soki ezali bongo, boye Moize atiká ndakisa malamu ya komikitisa. Ndenge nini?

Moize azwaki bokonzi mingi mpo Yehova apesaki ye mokumba ya kokamba Bayisraele. Kasi, bokonzi yango ekómisaki Moize lolendo te. Na ndakisa, talá ndenge asalaki ntango bamemelaki ye likambo moko ya mpasi oyo etalaki lotomo ya kozwa libula. (Mitángo 27:1-11) Ezalaki likambo moko monene, mpo ekateli oyo esengelaki kozwama esengelaki kosalelama libota na libota.

Moize asalaki nini? Akanisaki ete lokola azalaki kokamba Bayisraele, abongaki mpenza kozwa ekateli na likambo yango? Atyelaki nde makoki na ye motema, eksperiansi na ye, to boyebi oyo azalaki na yango mpo ayebaki ndenge oyo Yehova akanisaka?

Mbala mosusu moto ya lolendo alingaki kosala bongo. Kasi Moize asalaki bongo te. Biblia eyebisi biso boye: ‘Moize amemaki likambo yango liboso ya Yehova.’ (Mitángo 27:5) Kanisá naino! Ata nsima ya kokamba ekólo Yisraele na boumeli ya mbula soki 40, Moize amityelaki motema te kasi atyelaki nde Yehova motema. Awa tomoni polele komitikisa ya Moize.

Moize amonaki te ete kaka ye nde asengeli kozala na bokonzi. Asepelaki ntango Yehova apesaki mpe Bayisraele mosusu mokumba ya kozala basakoli. (Mitángo 11:24-29) Ntango bokilo na ye ayebisaki ye akabola mokumba na ye ná bato mosusu, na komikitisa nyonso Moize asalelaki toli yango. (Kobima 18:13-24) Ntango akómaki pene ya kokufa, atako azalaki kaka makasi, Moize asɛngaki Yehova ete apona moto oyo akokamba Bayisraele nsima na ye. Ntango Yehova aponaki Yosua, Moize apesaki elenge yango mabɔkɔ na motema mobimba, alendisaki Bayisraele bálanda litambwisi ya Yosua tii na mokili ya ndaka. (Mitángo 27:15-18; Kolimbola Mibeko 31:3-6; 34:7) Na ntembe te, Moize amonaki yango libaku malamu kokamba Bayisraele na makambo ya losambo. Kasi, atyaki te bokonzi na ye na esika ya liboso, alukaki nde bolamu ya basusu.

Tosengeli te kotika bokonzi to makoki oyo tobotamá na yango ezala na esika ya liboso. Kobosana te: Mpo Yehova apesa biso mikumba, tosengeli kotya komikitisa na esika ya liboso kasi te makoki na biso. (1 Samwele 15:17) Soki tozali mpenza na komikitisa, tokosala makasi tólanda toli oyo ya Biblia: “Tyelá Yehova motema na yo mobimba mpe kondimela mayele na yo moko te.”​—Masese 3:5, 6.

Ndakisa ya Moize eteyi mpe biso tozwaka te bokonzi na biso na valɛrɛ mingi.

Tokozwa matomba soki tolandi ndakisa ya komikitisa ya Moize? Ezali mpenza bongo! Soki tozali na komikitisa ya solosolo, ekosala ete bato oyo bazali zingazinga na biso batungisama te, mpe básepela na biso. Likambo eleki ntina, Yehova akosepela na biso mpo ye moko azalaka na ezaleli wana ya kitoko mpenza. (Nzembo 18:35) “Nzambe atɛmɛlaka bato ya lolendo, kasi amoniselaka bato ya komikitisa boboto monene.” (1 Petro 5:5) Oyo nde ntina monene ya komekola komikitisa ya Moize!