LISEKWA ya Yesu ezali te mwa likambo moko boye ya kala oyo ezali na ntina te mpo na biso lelo oyo. Ntoma Paulo amonisaki ntina na yango ntango akomaki boye: “Kristo alamuki uta na bakufi, mbuma ya liboso ya baoyo balali na kati ya liwa. Mpo lokola liwa eyei na nzela ya moto moko, lisekwa ya bakufi eyei mpe na nzela ya moto moko. Mpo kaka ndenge bato nyonso bazali kokufa na kati ya Adama, bato nyonso mpe bakozongisama na bomoi na kati ya Kristo.”​—1 Bakorinti 15:20-22.

Yesu asekwaki mokolo ya 16 Nisana na mobu 33 ya ntango na biso, mokolo oyo na tempelo ya Yerusaleme, Bayuda bazalaki komemela Yehova Nzambe mbuma ya liboso oyo babuki mpo na mbala ya liboso. Ndenge Paulo abengi Yesu mbuma ya liboso, yango emonisi ete ekozala mpe na bato mosusu oyo bakosekwisama.

Maloba oyo Paulo alobaki na nsima emonisi mapamboli oyo lisekwa ya Yesu ememeli bato. Paulo alobaki boye: “Lokola liwa eyei na nzela ya moto moko, lisekwa ya bakufi eyei mpe na nzela ya moto moko.” Bato bakufaka mpo na lisumu mpe kozanga kokoka oyo bazwá epai ya Adama. Bomoi ya kokoka oyo Yesu apesaki mpo na kosikola bato, epesi bango likoki ya kolongwa na boombo ya lisumu mpe ya liwa na nzela ya lisekwa. Na Baroma 6:23, Paulo alobeli likambo yango na mokuse boye: “Lifuti oyo lisumu ezali kofuta ezali liwa, kasi likabo oyo Nzambe azali kopesa ezali bomoi ya seko na nzela ya Kristo Yesu Nkolo na biso.”

Yesu ye moko amonisaki ntina ya lisekwa mpe liwa na ye na bomoi na biso, na maloba oyo: “Mwana ya moto mpe asengeli kotombolama ndenge wana, mpo moto nyonso oyo azali kondimela ye azwa bomoi ya seko. Mpo Nzambe alingaki mokili mingi, yango wana apesaki Mwana na ye se moko oyo abotamaki, mpo moto nyonso oyo azali kondimela ye abomama te kasi azwa bomoi ya seko.”​—Yoane 3:14-16.

Kanisá naino bomoi ya seko oyo ezangi mpasi, minyoko mpe mawa! (Emoniseli 21:3, 4) Oyo nde elikya kitoko! Moto moko ya mayele alobeli yango boye: “Ndenge kaka nkunda emonisaka ete bomoi ezali mokuse, lisekwa mpe ezali komonisa ete liwa ekosuka.” Ya solo, lisekwa ya Yesu elimboli bomoi!