Motuna yango ebimi mpo Yesu alakaki mosali-mabe oyo abomamaki elongo na ye, bomoi na paradiso na mikolo ezali koya. Yesu ayebisaki ye boye: “Ya solo nazali koyebisa yo lelo: Okozala na ngai na Paradiso.” (Luka 23:43) Simbá ete Yesu alobaki te esika oyo paradiso yango ekozala. Yesu alingaki nde koloba ete mosali-mabe wana akozala ná ye na likoló?

Tótala naino soki mosali-mabe wana akokisaki masɛngami mpo na kokende likoló. Baoyo bazali na elikya ya bomoi na likoló basengeli kobatisama na mai mpe na elimo santu; na ndenge yango, bakómaka bayekoli ya Yesu oyo babotami na elimo santu. (Yoane 3:3, 5) Lisusu, basengeli koyokanisa bomoi na bango na mibeko ya Nzambe mpe komonisa bizaleli lokola bosembo mpe motema mawa. (1 Bakorinti 6:9-11) Basengeli mpe kotikala sembo epai ya Nzambe mpe Kristo tii na nsuka ya bomoi na bango awa na mabele. (Luka 22:28-30; 2 Timote 2:12) Kaka soki bakokisi masɛngami wana nde bakomonisa ete babongi kosekwisama mpe kozwa mokumba monene oyo ezali kozela bango na likoló, elingi koloba kozala banganga-nzambe mpe bakonzi mpo na koyangela bato elongo na Kristo na boumeli ya mbula nkóto.​—Emoniseli 20:6.

Nzokande, mosali-mabe wana azalaki moto mabe bomoi na ye mobimba mpe akufaki kaka lokola moto mabe. (Luka 23:32, 39-41) Toboyi te, amonisaki limemya ntango ayebisaki Yesu: ‘Kanisá ngai ntango okokɔta na bokonzi na yo.’ (Luka 23:42) Ata bongo, akómaki te moyekoli ya Yesu oyo abatisami na elimo santu mpe na bomoi na ye mobimba amonisaki te ete azalaki moto malamu mpe ya sembo. Okanisi ete ebongaki mpenza Yesu apesa ye elaka ya koyangela na likoló elongo na bayekoli na ye oyo batikalaki sembo bomoi na bango mobimba?​—Baroma 2:6, 7.

Na ndakisa: Soki moto moko oyo ayibaki mbongo na yo asɛngi yo bolimbisi, mbala mosusu okomona malamu olimbisa ye. Yango elingi nde koloba ete okotikela ye mokumba ya kotambwisa mombongo na yo to kobatela libota na yo? Mikumba ya boye, okopesa yango kaka na baoyo otyelaka mpenza motema. Ndenge moko mpe, baoyo bazali na elikya ya bomoi na likoló basengeli kosala makambo oyo ekomonisa ete babongi kotyelama motema ete bakotosa mibeko ya Nzambe ntango bakoyangela bato. (Emoniseli 2:10) Atako amonisaki mwa bosembo na nsuka ntango ayebisaki Yesu akanisa ye, yango emonisi te ete akokisaki masɛngami.

Kasi, Yesu ayebisaki mosali-mabe wana te ete akozala na ye na likoló kaka na mokolo wana? Ekoki kozala bongo te, mpo Yesu ye moko amataki na likoló mokolo wana te. Kutu, “azalaki na kati ya mabele” elingi koloba mikolo misato na kati ya nkunda. (Matai 12:40; Marko 10:34) Ata mpe nsima ya lisekwa na ye, atikalaki na mabele mikolo 40 liboso amata na likoló. (Misala 1:3, 9) Na yango, mosali-mabe akokaki te kozala ná Yesu na likoló mokolo wana.

Kasi, mosali-mabe wana alingaki kokɔta na paradiso oyo wapi? Nsima ya lisekwa, akozala na paradiso na mabele, oyo Yesu akoyangela. (Misala 24:15; Emoniseli 21:3, 4) Mpo na koyeba makambo mosusu etali paradiso mpe makambo oyo Nzambe azali kosɛnga, sololá na Motatoli nyonso ya Yehova.