Biyano na mituna ya Biblia
Moto akoki kozala na bomoi ya seko?
Nini mpenza ekoki kolongola biso na boombo ya liwa?
Adama moto ya liboso aumelaki bankama ya bambula. Kasi nsukansuka, anunaki mpe akufaki. Banda wana, bato bameká mayele ndenge na ndenge mpo banunaka te, kasi ata moko te alonga liwa. Mpo na nini? Lokola Adama asalaki lisumu na ndenge atosaki Nzambe te, anunaki mpe akufaki. Tonunaka mpo Adama atikelá biso lisumu mpe etumbu na yango, liwa.—Tángá Ebandeli 5:5; Baroma 5:12.
Mpo tózwa bomoi ya seko, esengeli moto moko asikola biso. (Yobo 33:24, 25) Lisiko ezali motuya oyo bafutaka mpo mokangami azwa bonsomi, biso mpe tozali na mposa ya kosikwama na liwa. (Kobima 21:29, 30) Yesu afutaki motuya yango ntango akufaki mpo na biso.—Tángá Yoane 3:16.
Ndenge nini tokoki kozwa bomoi ya seko?
Moto nyonso te nde akosikwama na maladi mpe bobange. Kutu, baoyo batosaka Nzambe te ndenge Adama asalaki, bakokufa. Kaka baoyo bakolimbisama masumu, nde bakozwa bomoi ya seko.—Tángá Yisaya 33:24; 35:3-6.
Ezali na makambo oyo tosengeli kosala mpo masumu na biso elimbisama. Tosengeli koyekola Biblia, Liloba ya Nzambe mpo tóyeba ye. Biblia eteyaka biso ndenge ya kozala na bomoi ya malamu mpe oyo tokoki kosala mpo Nzambe andima biso mpe tózwa bomoi ya seko.—Tángá Yoane 17:3; Misala 3:19.
Talá mpe...
BIYANO NA MITUNA YA BIBLIA
Osengeli kosala nini mpo ozwa bomoi ya seko?
Biblia elobi ete baoyo basalaka mokano ya Nzambe bakozala na bomoi libela. Talá makambo misato oyo alingi tósala.
LINƆ́NGI YA MOSƐNZƐLI
Okoki kozala na bomoi libela na libela?
Yehova Nzambe, Mopesi-bomoi, akoki kopesa bato bomoi ya seko mpe alaki ete akosala yango.
LINƆ́NGI YA MOSƐNZƐLI
Mpo na nini likabo yango ezali na valɛrɛ mingi?
Makambo nini esalaka ete likabo moko eleka makabo mosusu na valɛrɛ? Kotalela makambo yango ekoki kosalisa biso tómonisa botɔndi makasi mpo na lisiko.
