Nakolaki na Santiago, mboka mokonzi ya ekólo Chili, na esika oyo bato bazalaki na momeseno ya komɛla drɔgɛ, mpe kosala mobulu. Babomaki tata na ngai ntango nazalaki na mbula mitano. Na nsima, mama akómaki na mobali moko oyo azalaki mobulu mpenza. Azalaki ntango nyonso kobɛta ngai ná mama. Tii lelo oyo, makambo wana etiká ngai na bampota na motema.

Ntango nazalaki kokóla, makambo wana nyonso esalaki ete nakóma moto ya mobulu mpenza. Nakómaki koyoka miziki babengi heavy-metal, kolangwa masanga mpe na bantango mosusu komɛla drɔgɛ. Mbala mingi nazalaki kobunda na balabala ná bato oyo batɛkaka drɔgɛ oyo bazalaki koluka koboma ngai. Mokolo moko, moto moko ya mobulu oyo azalaki monguna na ngai afutaki moto mosusu mbongo mpo aboma ngai, kasi nakimaki na mpota oyo azokisaki ngai mbeli. Mokolo mosusu, mwa etuluku ya bato oyo batɛkaka drɔgɛ balakisaki ngai mondoki mpe balukaki koboma ngai.

Na 1996, nalingaki mwasi moko na nkombo Carolina, mpe tobalanaki na 1998. Ntango tobotaki mwana na biso ya liboso, nakómaki kobanga ete nakóma lokola mobali ya mama mpe nabebisa libota na ngai mpo na ezaleli na ngai ya mobulu. Na yango, nakendaki koluka lisalisi ya monganga na lopitalo moko oyo esalisaka bato ya mobulu. Nazwaki lisalisi yango, kasi esungaki ngai te. Nakómaki kosilika ata mpo na makambo ya mikemike, mpe moto moko te azalaki kokoka ngai. Nasalaki likambo moko ya bozoba ndenge nalukaki komiboma mpo na kotika koyokisa libota na ngai mpasi. Kasi likambo ya esengo, nalongaki te kosala bongo.

Na boumeli ya bambula mingi nazalaki kondima te ete Nzambe azalaka, kasi nakómaki na mposa nabongola makanisi na ngai. Na yango nakomaki kosambela na lingomba ya Évangélique mpo na mwa ntango. Kaka na ntango yango, Batatoli ya Yehova bakómaki koyekola na mwasi na ngai Biblia. Nazalaki koyina Batatoli ya Yehova, mpe mbala mingi nazalaki kolobela bango maloba mabe. Kasi likambo ya kokamwa, bazalaki koloba na ngai na boboto.

Mokolo moko, Carolina ayebisaki ngai natánga Nzembo 83:18 na Biblia na ngai moko. Vɛrsɛ yango elobi polele ete nkombo  ya Nzambe ezali Yehova. Nakamwaki mpo na lingomba na ngai nayekolaki makambo ya nzambe, kasi ya Yehova te. Na ebandeli ya mobu 2000, Batatoli ya Yehova bakómaki mpe koyekola na ngai Biblia.

Ntango nazalaki kokoba koyekola, motema na ngai ekitaki ntango nayebaki ete Yehova azali Nzambe ya motema mawa mpe alimbisaka. Na ndakisa na Kobima 34:6, 7, Biblia elobi ete Yehova azali “Nzambe ya motema mawa mpe ya ngɔlu, ayokaka nkanda noki te mpe atondi na motema boboto mpe na solo, abatelaka motema boboto mpo na bankóto, alimbisaka libunga ná kobuka mibeko mpe lisumu.”

Atako bongo, kosalela makambo oyo nazalaki koyekola ezalaki pɛtɛɛ te. Nazalaki komona ete nakokoka soki moke te kotika ezaleli na ngai ya mobulu. Mbala nyonso oyo nazalaki kozongela ezaleli yango, na bolingo nyonso Carolina azalaki kolendisa ngai. Azalaki koyebisa ngai ete Yehova amonaka milende oyo nasalaka. Lisungi na ye ezalaki kopesa ngai makasi ya kokoba koluka kosepelisa Yehova, atako nazalaki komona lokola nakokoka te.

Mokolo moko Alejandro oyo azalaki koyekola na ngai Biblia ayebisaki ngai natánga Bagalatia 5:22, 23. Bavɛrsɛ yango elobi ete mbuma ya elimo ya Nzambe ezali “bolingo, esengo, kimya, motema molai, boboto, bolamu, kondima, motema pɛtɛɛ, komipekisa.” Alejandro ayebisaki ngai ete nakokoka te kokóma na bizaleli yango na makasi na ngai moko, kasi kaka na nzela ya elimo santu ya Nzambe. Likambo yango ebongolaki mpenza makanisi na ngai!

Na nsima, nakendaki na liyangani moko ya monene ya Batatoli ya Yehova. Ndenge oyo makambo ezalaki kotambola, bopeto mpe bolingo oyo namonaki kuna, endimisaki ngai ete namoni lingomba ya solo. (Yoane 13:34, 35) Nazwaki batisimo na sanza ya mibale ya mobu 2001.

Yehova asalisi ngai natika mobulu mpe nakóma moto ya kimya. Namonaka lokola nde Yehova alongoli ngai na motambo oyo ekangaki ngai. Bato mingi bayinaki ngai, kasi nazali kopesa bango foti te. Kasi, sikoyo nasepelaka kosalela Yehova na motema ya kokita elongo na mwasi mpe bana na biso mibale ya mibali.

andeko mpe baninga na ngai bakamwaka ndenge nabongwaná mpenza. Yango esalá ete mingi kati na bango bakóma koyekola Biblia. Nazwá mpe libaku ya kosalisa basusu báyeba Yehova. Nayokaka mpenza esengo ntango namonaka ndenge Biblia ebongolá mpe bomoi na bango!