Bato balingaka kozala na kimya na basusu, kozala sembo mpe boboto. Kasi, mpo na nini mbala mingi tomonaka makambo ya mobulu, ya kozanga bosembo mpe ya mabe mpenza? Bansango ya nsɔmɔ mpenza ekómi mingi. Ezali na moto oyo atindaka bato básala mabe?​—Tángá 1 Yoane 5:19.

Nzambe asalá bato na mposa ya kosala mabe? Te, Yehova Nzambe akelaki bato na elilingi na ye, na mposa ya komekola bolingo ya Nzambe. (Ebandeli 1:27; Yobo 34:10) Kasi Nzambe apesá bato lokumu ndenge apesá biso bonsomi ya kopona. Ntango baboti na biso ya liboso baponaki kosala mabe, baboyaki kolanda ndakisa ya Nzambe mpe bakómaki bato ya masumu. Batikelá biso ezaleli wana ya kosala masumu.​—Tángá Kolimbola Mibeko 32:4, 5.

Nzambe alingi ete tótɛmɛla bizaleli na biso ya mabe. (Masese 27:11) Yango wana ateyaka biso ndenge ya koboya kosala mabe mpe ndenge ya kozwa esengo ya solosolo. Ata bongo, mwaye ya komekola lelo bolingo ya Nzambe na ndenge ya kokoka ezali te.​—Tángá Nzembo 32:8.

Atako mabe etondi lelo, Nzambe atiki yango mpo na mwa ntango mpo biso nyonso tómona makambo oyo yango ezali kobimisa. (2 Petro 3:7-9) Kasi, mosika te, mabele ekotonda na bato ya esengo oyo batosaka Nzambe.​—Tángá Nzembo 37:9-11.