Mbula oyo elandaki nakómaki kosala bafilme, mbala mingi ngai nde nazalaki mosani ya libosoliboso na bafilme yango. Bapanzi-nsango bazalaki kolinga kolobela istware na ngai, bakangi-fɔtɔ bazalaki kolinga kozwa ngai bafɔtɔ mpe bato bazalaki kolinga nazala na milulu ya kofungola bandako ya sika to mimbongo mpo na kokata eteni ya elamba oyo bakataka mpo na milulu yango. Bamosusu bazalaki kobengisa ngai mpo na kolya. Bato bazalaki kotyela ngai likebi ntango nyonso.

Mokemoke, nayaki komona ete nyonso wana ezalaki kopesa ngai esengo te ndenge nazalaki kokanisa. Bafilme mingi oyo nazalaki kosala ezalaki ya mobulu mpe yango ezalaki likama. Bankolo-filme na Hong Kong bazalaki kosala masano ya likama mingi te ndenge baoyo ya Hollywood bazalaki kosala, yango wana nazalaki kosala masano na ngai moko, na ndakisa kokumba tukutuku likoló ya motuka. Bafilme mingi oyo nazalaki kosala ezalaki kolakisa pite mpe mobulu. Mosusu ezalaki kolakisa makambo ya bademo.

Na 1995, moto moko oyo apesaka mbongo mpo bafilme ebima abalaki ngai. Atako nazalaki na nyonso oyo ekokaki kopesa ngai esengo; na ndakisa lokumu, bomɛngo mpe mobali ya malamu, nazalaki kotungisama na makanisi mpe nazalaki na mawa. Nazwaki ekateli ya kotika kosala bafilme.

Nakómaki kokanisa lisusu mateya oyo bateyaki ngai ntango nazalaki naino mwana moke. Na ntango wana, mikolo nyonso ya pɔsɔ ngai ná yaya na ngai tozalaki kokende kotala libota moko ya Batatoli ya Yehova. Joe McGrath, tata ya libota yango azalaki koyekola na biso mpe bana na ye misato ya basi Biblia. Bazalaki na libota moko ya esengo mpe “nɔkɔ” Joe azalaki kosalela mwasi mpe bana na ye makambo na limemya. Nazalaki mpe kosepela kokende na makita na bango. Na bantango mosusu tozalaki kokende na mayangani ya minene. Ezalaki bantango moko ya esengo. Nazalaki komona ete kozala ná Batatoli ya Yehova ezalaki libateli mpo na ngai.

 Kasi, makambo ya mabe mpenza ekómelaki ngai na ndako na biso moko. Bizaleli mabe ya tata na biso epesaki mama na biso mpasi mingi mpe akómaki konyokwama mingi na makanisi. Ntango nakómaki na mbula soki zomi, mama atikaki kosangana na Batatoli ya Yehova. Nakobaki na mitema mibale kosangana na Batatoli ya Yehova mpe nazwaki batisimo ntango nazalaki na mbula 17. Kasi eumelaki te, nakómaki na bizaleli oyo eyokani te na mateya ya bokristo mpe nalongwaki Motatoli ya Yehova.

Mwa moke nsima ya libala na ngai, bandeko mibali mibale oyo bazali bankulutu na lisangá bayaki kotala ngai. Bamonisaki ngai ndenge nakoki kozongela Yehova Nzambe mpe bazwaki bibongiseli mpo misionɛrɛ moko na nkombo Cindy asalisa ngai. Na ntango wana, nabosanaki mateya mingi oyo nayebaki liboso, yango wana nasɛngaki ye amonisa ngai soki Biblia ezali mpenza Liloba ya Nzambe. Alakisaki ngai mwa bisakweli ya Biblia oyo ekokisamaki. Mokemoke, tokómaki baninga ya motema mpe asɛngaki ayekola na ngai Biblia mpe nandimaki. Mpo na mbala ya liboso, nakómaki komona ete Yehova azali Nzambe ya bolingo oyo alingi ete nazala na esengo.

Ntango nazongelaki kokende makita, namonaki ete kozala elongo na Batatoli ya Yehova ezalaki malamu koleka kozala na bato oyo tozalaki kosala na bango bafilme. Kasi, makambo oyo nakutaná na yango na bomwana esalaki ete natyelaka bato motema mpenza te mpe nazalaki komilinga te. Ndeko moko ya lisangá asalisaki ngai ntango alakisaki ngai na Biblia ndenge ya kolongola makanisi wana mpe nayekolaki ndenge ya kokóma na baninga ya solosolo.

Na 1997, ngai ná mobali na ngai tokendaki kofanda na Hollywood, na Californie, États-Unis. Kuna, namipesaki mingi na kosalisa bato bázwela bwanya ya Liloba ya Nzambe litomba. Koteya basusu Biblia epesi ngai esengo koleka lokumu oyo nazalaki na yango ya kosala bafilme. Na ndakisa, na 2002, nakutanaki na Cheri, moninga moko ya kala oyo tozalaki na ye na Hong Kong. Makambo oyo akutaná na yango na bomoi ekokani na oyo ya ngai. Abimáká miss ya Hong Kong mbula moko liboso na ngai. Kutu, ntango nabimaki miss, ye nde alatisaki ngai motole. Akómaki mpe kosala bafilme mpe na nsima kobimisa yango; azalaki kosala ná bapatrɔ ya lokumu mpenza. Ye mpe akómaki kofanda na Hollywood.

Nayokelaki Cheri mawa mingi ntango nayokaki ete fianse na ye akufaki na maladi ya motema. Lingomba na ye ya Buda ebɔndisaki ye te. Ndenge moko na ngai, ye mpe akómaki na lokumu mingi oyo basusu balukaka, ata bongo, azalaki na esengo te mpe azalaki kokoka kotyela basusu motema te. Nakómaki koyebisa ye makambo oyo nayekolaki na Biblia, kasi lokola akolá na mateya ya Buda, ezalaki mpasi mpo asepela na mateya ya Biblia.

Mokolo moko na 2003, Cheri abengaki ngai na Vancouver, na Canada epai azalaki kobongisa filme moko. Na esengo nyonso ayebisaki ngai ete azalaki kokumba motuka mpe kosepela na bazamba oyo azalaki komona mpe na mbala moko abondelaki Nzambe na mongongo makasi boye: “Yebisá ngai, nani azali Nzambe ya solo? Nkombo na yo nani?” Na ntango yango, akumbaki motuka na ye tii na Ndako ya Bokonzi mpe amonaki nkombo Yehova. Na yango, amonaki ete ezalaki eyano oyo Nzambe apesaki ye mpe ayokaki mposa ya kokutana na Batatoli ya Yehova nokinoki. Nazwaki bibongiseli mpe nsima ya mwa mikolo, akómaki koyangana na makita na lisangá ya monɔkɔ ya Chinois, na Vancouver.

 Cheri ayebisaki ngai boye: “Bato yango bazali mpenza kotyela ngai likebi. Nakoki koyebisa bango ndenge nazali komiyoka na motema.” Nasepelaki ntango ayebisaki ngai bongo mpo ntango Cheri azalaki kosala bafilme, azalaki na baninga te. Cheri akobaki koyangana na makita. Kasi na 2005, asalaki kɔntra moko mpo na kobimisa filme mibale ya minene na Chine, yango esɛngaki azonga na Hong Kong. Likambo ya esengo, na 2006, Cheri apesaki bomoi na ye epai ya Yehova mpe azwaki batisimo, akómaki Motatoli ya Yehova na Hong Kong. Atako mposa na ye ezalaki asalela Yehova mingi koleka kasi mosala na ye ya bafilme esalaki ete ezala mpasi mpo na ye, yango wana azalaki na esengo te.

Na 2009, makambo ya bomoi ya Cheri ebongwanaki mpenza. Azwaki ekateli ya kotika kosala bafilme mpo amipesa mobimba na mosala ya Yehova. Azwaki baninga mingi na lisangá. Akómaki kolekisa bangonga mingi na mosala ya kosakola nsango malamu ya Bokonzi mpe kosepela mpenza kosalisa basusu bákóma na bomoi ya malamu koleka.​—Matai 24:14.

Na nsima, Cheri azwaki ekateli ya koyekola monɔkɔ ya Népalais mpo na kopesa mabɔkɔ na etuluku ya Batatoli ya Yehova oyo balobaka monɔkɔ yango na Hong Kong. Nakoki koloba ete bato mingi ya Népal oyo bafandaka na Hong Kong bakipaka bango mpenza te to bazwaka bango na valɛrɛ te mpo balobaka monɔkɔ ya Anglais to Chinois mingi te mpe mpo mimeseno na bango ekeseni na oyo ya basusu. Cheri ayebisaki ngai ete azalaki kosepela mingi kosalisa bato yango báyeba Biblia malamu. Na ndakisa, ntango azalaki kosakola ndako na ndako, akutanaki na mwasi moko ya Népal oyo ayebaki mwa makambo etali Yesu kasi ayebaki ata eloko te mpo na Yehova, Nzambe ya solo. Cheri asalelaki Biblia mpo na komonisa ye ete Yesu abondelaki Tata na ye ya likoló. Ntango mwasi yango amonaki ete akoki kobondela Nzambe ya solo, oyo nkombo na ye ezali Yehova, andimaki nsango malamu. Eumelaki te, mobali na ye ná mwana na bango ya mwasi bakómaki mpe koyekola Biblia.​—Nzembo 83:18; Luka 22:41, 42.

Ntango namonaki ndenge Cheri azalaki kosepela kolekisa bangonga mingi na mosala ya kosakola, namitunaki soki ‘nini ezali kopekisa ngai nasala lokola ye.’ Na ntango wana, ngai mpe nazongaki kofanda lisusu na Hong Kong. Nazwaki ekateli ya kobongisa lisusu makambo ya bomoi na ngai mpo namipesa mobimba na koteya basusu solo ya Biblia. Namoni ete koyoka bato mpe kosalisa bango báyeba Liloba ya Nzambe malamu epesaka ngai esengo ya solosolo.

Na ndakisa, nayekolaki Biblia na mwasi moko ya Vietnam oyo azalaki ntango nyonso mawamawa mpe mbala mingi azalaki kolela. Lelo oyo akómá kotalela bomoi na ndenge ya malamu mpe asepelaka mpenza koyangana na makita na biso.

Ngai ná Cheri tozwi eloko moko ya malamu koleka lokumu. Atako kosala bafilme ezalaki kosepelisa biso mpe esalaki ete tóyebana mingi, kasi koteya bato makambo ya Yehova Nzambe epesaka biso esengo mingi koleka mpo kosala bongo epesaka ye nkembo. Tomonaki mpenza ete maloba oyo ya Yesu: “Esengo ya kopesa eleki oyo ya kozwa” ezali mpenza solo.​—Misala 20:35.