Okanisi nini? Nzambe alingaka bitumba? Soki ɛɛ, na bitumba ya lelo, Nzambe azalaka na ngámbo ya banani? Kozwa biyano na mituna yango ekoki kobongola ndenge oyo otalelaka bitumba. Na ndakisa, soki oyebi ete alingaka bitumba mpe azali na ngámbo ya etuluku moko ya bato oyo yo olingi ete bálonga, na ntembe te, okosepela mpo okondimisama mpenza ete ngámbo na bino nde ekolonga. Kasi, okomiyoka ndenge nini soki oyebi ete Nzambe azali na ngámbo ya banguna na bino? Na ntembe te, okotalela lisusu soki okozala na ngámbo nini.

Kasi, ezali na likambo moko ya ntina mingi. Soki oyebi ndenge Nzambe atalelaka bitumba, ndenge na yo ya kotalela Nzambe ekobongwana. Soki ozali na kati ya bamilio ya bato oyo bitumba esalaka bango mpasi mingi na motema, na ntembe te okolinga koyeba soki Nzambe nde atindaka bato bábunda, andimaka bampasi oyo bitumba ebimisaka to akipaka te bampasi ya bato oyo bazali konyokwama ndenge bato mosusu bakanisaka.

Okoki kokamwa soki omoni ete eyano ya Biblia ekeseni mpenza na makanisi wana nyonso. Lisusu, tii lelo, ndenge oyo Nzambe atalelaka bitumba ebongwani te. Tótalela naino oyo Biblia elobi mpo na ndenge oyo Nzambe azalaki kotalela bitumba na ntango ya kala mpe na siɛklɛ ya liboso, ntango Yesu azalaki awa na mabele. Yango ekosalisa biso tóyeba ndenge Nzambe atalelaka bitumba lelo oyo mpe soki na mikolo ezali koya bato bakokoba kaka kobunda.