Balevi 11:1-47
11 Mpe Yehova alobaki na Moize mpe na Arona, ayebisaki bango ete:
2 “Lobá na bana ya Yisraele: ‘Talá ekelamu ya bomoi oyo bokoki kolya+ kati na banyama nyonso oyo ezali na mabele:
3 Ekelamu nyonso, kati na banyama, oyo sabo na yango ekabwaná na mibale mpe enyamutaka lisusu biloko oyo ebimi na libumu, ezali yango nde bokoki kolya.+
4 “‘Kasi talá oyo bosengeli kolya te kati na banyama oyo enyamutaka lisusu biloko oyo ebimi na libumu ná banyama oyo sabo na yango ekabwaná: kamela, mpo yango enyamutaka lisusu biloko oyo ebimi na libumu, kasi sabo na yango ekabwaná te. Ezali mbindo mpo na bino.+
5 Ná simbiliki ya mabanga,+ mpo yango enyamutaka lisusu biloko oyo ebimi na libumu kasi sabo na yango ekabwaná te. Ezali mbindo mpo na bino.
6 Ná simbiliki,+ mpo yango enyamutaka lisusu biloko oyo ebimi na libumu kasi ezali te na sabo oyo ekabwaná. Ezali mbindo mpo na bino.
7 Ná ngulu,+ mpo sabo na yango ekabwaná na mibale, kasi yango ebimisaka biloko na libumu te mpo enyamuta yango lisusu. Ezali mbindo mpo na bino.
8 Bosengeli kolya mosuni na yango ata moke te, mpe bosengeli kosimba ebembe na yango te.+ Ezali mbindo mpo na bino.+
9 “‘Talá oyo bokoki kolya kati na eloko nyonso oyo ezali na mai:+ Eloko nyonso oyo ezali na binyanyeli mpe mposo+ na mai, na mbu mpe na mikɛli, oyo wana bokoki kolya yango.
10 Mpe eloko nyonso na mbu mpe na mikɛli oyo ezali na binyanyeli te mpe na mposo te, na ekelamu nyonso ya mai oyo etondanaka mpe na molimo nyonso ya bomoi oyo ezali na mai, yango ezali biloko ya mpii mpo na bino.
11 Ɛɛ, yango ekokóma biloko ya mpii mpo na bino. Bosengeli kolya mosuni na yango ata moke te,+ mpe bokoyokela bibembe na yango mpii.
12 Eloko nyonso na mai oyo ezali na binyanyeli te mpe na mposo te ezali eloko ya mpii mpo na bino.
13 “‘Mpe talá oyo bokoyokela mpii kati na bikelamu oyo epumbwaka.+ Yango esengeli kolyama te. Yango ezali biloko ya mpii: mpongo+ ná mpongo oyo ekangaka mbisi ná engondo ya moindo,
14 ná kombekombe ya motane mpe kombekombe ya moindo,+ na motindo na yango,
15 yanganga+ nyonso, na motindo na yango,
16 maligbanga,+ esulungutu, libata ya mbu ná kombekombe ya matɔnɔmatɔnɔ, na motindo na yango,
17 esulungutu ya moke, lingongo ná esulungutu ya matoi milai,+
18 libata ya mai, libeki, engondo,+
19 nkɔngi, punzebale, na motindo na yango, ná hupu mpe ngembo.+
20 Ekelamu nyonso ya mapapu oyo etondanaka, oyo etambolaka na makolo minei, ezali eloko ya mpii mpo na bino.+
21 “‘Kasi talá oyo bokoki kolya kati na bikelamu nyonso ya mapapu oyo etondanaka, oyo etambolaka na makolo minei, oyo ezali na makolo ya kopumbwa likoló ya makolo na yango, oyo epumbwaka na yango na mabele.
22 Talá oyo kati na yango bokoki kolya: liyoyo oyo esalaka mibembo,+ na motindo na yango, ná liyoyo oyo balyaka,+ na motindo na yango, ná likelele, na motindo na yango, mpe likɔnkɔ,+ na motindo na yango.
23 Mpe ekelamu mosusu nyonso ya mapapu oyo etondanaka, oyo ezali na makolo minei, ezali eloko ya mpii+ mpo na bino.
24 Yango ekoki kokómisa bino mbindo. Moto nyonso oyo akosimba bibembe na yango, akozala mbindo tii na mpokwa.+
25 Mpe moto nyonso oyo akomema eloko moko ya bibembe na yango, akosukola+ bilamba na ye, mpe asengeli kozala mbindo tii na mpokwa.
26 “‘Bongo nyama nyonso oyo sabo na yango ekabwaná, kasi na mibale te mpe ezali te nyama oyo enyamutaka lisusu biloko oyo ebimi na libumu, yango ezali mbindo mpo na bino. Moto nyonso oyo akosimba yango, akozala mbindo.+
27 Mpo na ekelamu nyonso oyo etambolaka na makolo na yango kati na bikelamu nyonso ya bomoi oyo etambolaka na makolo minei, yango ezali mbindo mpo na bino. Moto nyonso oyo akosimba bibembe na yango, akozala mbindo tii na mpokwa.
28 Mpe ye oyo akomema bibembe+ na yango, akosukola bilamba+ na ye, mpe asengeli kozala mbindo tii na mpokwa. Ezali mbindo mpo na bino.
29 “‘Mpe talá oyo ezali mbindo mpo na bino kati na bikelamu oyo etondanaka oyo ezali kotondana na mabele:+ motomba ná mpoko+ ná mbambe, na motindo na yango,
30 ná monselekete babengi jeko ná mbambe ya monene ná monselekete ya mai ná monselekete ya zɛlo mpe mongingima.
31 Ezali mbindo mpo na bino kati na bikelamu nyonso oyo etondanaka.+ Moto nyonso oyo akosimba yango, soki yango ekufi, akozala mbindo tii na mpokwa.+
32 “‘Sikoyo soki moko na yango ekufi, eloko nyonso oyo yango ekokwela, eloko yango ekozala mbindo, ezala esaleli ya libaya+ to elamba to loposo+ to ngɔtɔ.+ Mbɛki nyonso oyo basalelaka ekotyama na kati ya mai, mpe yango esengeli kozala mbindo tii na mpokwa mpe na nsima ekozala pɛto.
33 Kasi mbɛki+ nyonso ya mabele oyo moko na yango ekokwea na kati, eloko nyonso oyo ezali kati na mbɛki yango ekozala mbindo, mpe bosengeli kobuka yango.+
34 Lolenge nyonso ya biloko oyo ekoki kolyama, oyo ekozwa mai oyo euti na mbɛki yango, ekozala mbindo, mpe eloko nyonso ya komɛla, oyo ekoki komɛlama na mbɛki yango nyonso, ekozala mbindo.
35 Mpe eloko nyonso oyo ebembe na yango ekoki kokwela, ekozala mbindo. Ezala etumbelo ya mampa to etɛlɛmiselo ya elokó, yango ekobukama. Ezali mbindo, mpe ekokóma mbindo mpo na bino.
36 Kasi liziba ná libulu oyo babombaka mai ekokoba kozala pɛto, nde moto nyonso oyo akosimba bibembe na yango, akozala mbindo.
37 Mpe soki ebembe na yango ekweli moko ya mboto ya molona moko oyo ekolonama, yango ezali pɛto.
38 Kasi soki mai etyami likoló ya momboto mpe soki ebembe na yango ekweli yango, yango ezali mbindo mpo na bino.
39 “‘Sikoyo soki nyama nyonso oyo bokoki kolya ekufi, ye oyo akosimba ebembe na yango akozala mbindo tii na mpokwa.+
40 Mpe ye oyo akolya+ ebembe na yango, akosukola bilamba na ye, mpe asengeli kozala mbindo tii na mpokwa; mpe ye oyo akomema ebembe na yango, akosukola bilamba na ye, mpe asengeli kozala mbindo tii na mpokwa.
41 Mpe ekelamu nyonso oyo etondanaka, oyo ezali kotondana na mabele, ezali eloko ya mpii.+ Yango esengeli kolyama te.
42 Ekelamu nyonso oyo etambolaka na libumu+ mpe ekelamu nyonso oyo etambolaka na makolo minei to na makolo mingi kati na bikelamu oyo etondanaka, oyo ezali kotondana na mabele, bosengeli kolya yango te, mpo yango ezali eloko ya mpii.+
43 Bókómisa milimo na bino mpii te na ekelamu nyonso oyo etondanaka, oyo ezali kotondana, mpe bosengeli te komikómisa mbindo na nzela na yango mpe kokóma mpenza mbindo na nzela na yango.+
44 Mpo ngai nazali Yehova Nzambe na bino;+ mpe bosengeli komisantisa mpe bosengeli kozala basantu,+ mpamba te ngai nazali mosantu.+ Bongo, bosengeli te kokómisa milimo na bino mbindo na ekelamu nyonso oyo etondanaka, oyo ezali kotambola na mabele.
45 Mpo ngai Yehova moto nazali kobimisa bino na mokili ya Ezipito mpo namonisa ete nazali Nzambe na bino;+ mpe bosengeli kozala basantu,+ mpamba te ngai nazali mosantu.+
46 “‘Wana ezali mobeko mpo na nyama ná ekelamu oyo epumbwaka ná molimo nyonso ya bomoi oyo etambolaka na kati ya mai+ mpe mpo na molimo nyonso oyo etondanaka na mabele,
47 mpo na kokesenisa+ oyo ezali mbindo ná oyo ezali pɛto mpe ekelamu ya bomoi oyo ekoki kolyama ná ekelamu ya bomoi oyo esengeli kolyama te.’”
