Masese 13:1-25
13 Mwana azalaka na bwanya ntango disiplini ya tata ezali,+ kasi motyoli nde moto ayokaka mpamela te.+
2 Na mbuma ya monɔkɔ na ye, moto akolya oyo ezali malamu,+ kasi molimo ya bakosi nde mobulu.+
3 Ye oyo abatelaka monɔkɔ na ye azali kobatela molimo na ye.+ Ye oyo afungolaka mbɛbu na ye polele—akozwa libebi.+
4 Moto ya gɔigɔi azali komonisa ete azali na mposa mingi, kasi molimo na ye ezali na eloko te.+ Nzokande, molimo ya bato ya etingya ekokóma mafutamafuta.+
5 Moyengebene ayinaka liloba ya lokuta,+ kasi bato mabe basalaka makambo ya nsɔni mpe bamisambwisaka.+
6 Boyengebene ebatelaka moto oyo azali na mbeba te na nzela na ye,+ kasi mabe ekweisaka mosumuki.+
7 Moto mosusu amilakisaka ete azali mozwi nzokande azali ata na eloko te;+ moto mosusu amilakisaka ete azali moto oyo akelelá nzokande azali na biloko mingi ya motuya.
8 Lisiko mpo na molimo ya moto nde bomɛngo na ye,+ kasi moto oyo akelelá ayoká mpamela te.+
9 Pole ya bayengebene ekosepela;+ kasi mwinda ya bato mabe—yango ekobomama.+
10 Na lofundo, moto abimisaka kaka etumba,+ kasi bwanya ezali epai ya baoyo bapesanaka makanisi.+
11 Biloko ya motuya oyo euti na makambo ya mpamba ekómaka moke,+ kasi moto oyo ayanganisaka na lobɔkɔ nde akolisaka yango.+
12 Eloko ya kozelisazelisa ebɛlisaka motema,+ kasi eloko oyo moto azali na mposa na yango ezali nzete ya bomoi soki ezwami mpenza.+
13 Ye oyo atyoli liloba,+ bakozwa ndanga epai na ye mpo na nyongo; kasi moto oyo abangaka mitindo, bakopesa ye mbano.+
14 Mobeko ya moto ya bwanya ezali liziba ya bomoi,+ mpo na kolongola moto na mitambo ya liwa.+
15 Mayele mingi ya kososola esalaka ete moto andimama,+ kasi nzela ya bakosi ezalaka mabakumabaku.+
16 Moto nyonso ya ekɛngɛ akosala na boyebi,+ kasi moto oyo azali zoba akopalanganisa bozoba.+
17 Momemi-nsango oyo azali mabe akokwea na mabe,+ kasi motindami ya sembo nde nkisi oyo ebikisaka.+
18 Ye oyo atalaka disiplini na bopɔtu akokóma na bobola mpe na nsɔni,+ kasi ye oyo atosaka mpamela akokumisama.+
19 Mposa ntango ekokisami ezalaka elɛngi mpo na molimo;+ kasi kotika mabe nde eloko oyo bazoba bayiná.+
20 Ye oyo atambolaka na bato ya bwanya akokóma na bwanya,+ kasi ye oyo azalaka na boyokani na bazoba akosuka mabe.+
21 Mpasi elandaka basumuki,+ kasi malamu epesaka bayengebene mbano.+
22 Moto oyo azali malamu akotikela bana ya bana na ye libula, mpe bozwi ya mosumuki nde eloko oyo ebombami malamu mpo na moyengebene.+
23 Mabele ya bato oyo bakelelá oyo etimolami ebotaka bilei mingi,+ kasi moto mosusu alongolami mpo bosembo ezali te.+
24 Moto oyo aboyeli mwana na ye fimbo azali koyina ye,+ kasi moto oyo alingi ye alukaka ye mpenza na disiplini.+
25 Moyengebene alyaka tii molimo na ye ekotonda,+ kasi libumu ya bato mabe ekozala na eloko te.+
