Masese 17:1-28
17 Eteni ya limpa ekauká esika moko na kimya ezali malamu+ koleka ndako oyo etondi na bambeka esika moko na koswana.+
2 Mosaleli oyo amonisaka mayele ya kososola akoyangela mwana oyo asalaka makambo ya nsɔni,+ mpe akozwa libula na kati ya bandeko.+
3 Nzungu ya kopɛtola ezali mpo na palata mpe litumbu mpo na wolo,+ kasi Yehova nde moto oyo atalaka mitema malamumalamu.+
4 Mosali-mabe atyaka likebi na mbɛbu oyo eyokisaka mpasi.+ Mokosi atyaka matoi na lolemo oyo ebimisaka mikakatano.+
5 Ye oyo azali kotyola moto oyo akelelá asambwisi Mokeli na ye.+ Ye oyo asepelaka na likama ya moto mosusu akozanga kozwa etumbu te.+
6 Motole ya mibange ezali bana ya bana,+ mpe kitoko ya bana ezali batata na bango.+
7 Mpo na moto nyonso ya zoba, mbɛbu ya kolongobana ebongi te.+ Ekozala boni mbɛbu ya lokuta mpo na moto ya lokumu!+
8 Na miso ya nkolo na yango monene, likabo ezali libanga oyo etindaka ete andimama.+ Epai nyonso abalukaka, alongaka.+
9 Ye oyo azali kozipa likambo oyo ebuki mibeko azali koluka bolingo,+ kasi ye oyo azali se kolobaloba likambo azali kokabola baninga ya motema.+
10 Mpamela ekɔtaka makasi na kati ya moto oyo azali na mayele+ koleka kobɛta zoba mbala nkama moko (100).+
11 Moto mabe alukaka kaka botomboki,+ mpe momemi-nsango oyo batindeli ye azali na mawa te.+
12 Malamu moto akutana na urse oyo ebungisi bana na yango+ na esika akutana na moto moko ya zoba na bozoba na ye.+
13 Mpo na moto nyonso oyo azongisi mabe mpo na malamu,+ mabe ekolongwa na ndako na ye te.+
14 Ebandeli ya kowelana ezali lokola ntango moto azali kofungola mai;+ na bongo liboso koswana ebima, bendá nzoto.+
15 Moto nyonso oyo azali kotánga moto mabe moyengebene+ mpe moto nyonso oyo azali kotánga moyengebene moto mabe+—ɛɛ, bango mibale bazali eloko moko oyo Yehova ayiná.+
16 Mpo na nini na lobɔkɔ ya zoba eloko ya kozwa bwanya ezali,+ nzokande ye azali na motema te?+
17 Moninga ya solosolo alingaka ntango nyonso,+ mpe azali ndeko oyo abotami mpo na ntango ya mpasi.+
18 Moto oyo azali na motema te apesaka lobɔkɔ mpo na koyokana na moto,+ azali komipesa ndanga liboso ya moninga na ye.+
19 Moto nyonso oyo azali kolinga likambo oyo ebukaka mibeko azali kolinga kowelana.+ Moto nyonso oyo azali kotombola esika na ye ya kokɔta azali koluka kokwea.+
20 Ye oyo motema etɛngamá akomona bolamu te,+ mpe ye oyo azali na lolemo ya bongolabongola akokwea na mpasi.+
21 Tata nyonso oyo aboti mwana ya zoba—mawa na ye;+ mpe tata ya mwana oyo azali bolole asepelaka te.+
22 Motema oyo ezali na esengo esalaka malamu lokola eloko oyo ebikisaka,+ kasi elimo oyo elɛmbi ekaukisaka mikuwa.+
23 Moto mabe akozwa kanyaka oyo euti na ntolo+ mpo na kotɛngisa banzela ya bosembo.+
24 Bwanya ezali liboso ya elongi ya moto ya mayele,+ kasi miso ya zoba ezali na nsuka ya mabele.+
25 Mwana ya zoba azali motungisi mpo na tata na ye+ mpe ayokisaka mama oyo abotaki ye bololo.+
26 Lisusu, kofutisa moyengebene lomande ezali malamu te.+ Kobɛta bato ya lokumu eyokani te na makambo oyo elongobani.+
27 Moto nyonso oyo apekisaka maloba na ye azali na boyebi,+ mpe moto ya bososoli azali na elimo ya kimya.+
28 Ata zoba, ntango afandi nyɛɛ, akomonana lokola moto ya bwanya;+ moto nyonso oyo azali kokanga mbɛbu na ye, akomonana lokola azali na mayele.
