Yobo 26:1-14
26 Bongo Yobo ayanolaki mpe alobaki ete:
2 “Wana nde lisalisi ya solosolo opesi moto oyo asili nguya!Obikisi mpenza lobɔkɔ oyo ezangi makasi!+
3 Opesi mpenza moto oyo azangi bwanya+ toli,Mpe osali ete ebele ya bato báyeba bwanya!
4 Oyebisi maloba oyo na nani,Mpe mpema ya nani ebimi epai na yo?
5 Baoyo bazangi makasi kati na liwa bazali se kolɛngaNa nse ya mai mpe ya biloko oyo efandaka kuna.+
6 Nkunda* ezali bolumbu liboso na ye,+Mpe esika ya libebi ezipami te.
7 Atandi nɔrdi na esika oyo ezali mpamba,+Akakisi mabele na eloko moko te;
8 Azingi mai na kati ya mapata na ye,+Bongo mapata ezali kopasuka te na nse na yango;
9 Azipi liboso ya kiti ya bokonzi,Atandi lipata+ na ye likoló na yango.
10 Asalá zolongano na etando ya mai,+Kino na esika oyo pole esukaka na kati ya molili.
11 Makonzí ya likoló ezali kolɛnga,Mpe ekamwe mpo na mpamela na ye.
12 Na nguya na ye, atombokisi mbu,+Mpe na mayele na ye, abukibuki+ eloko oyo enyokolaka.+
13 Na mopɛpɛ na ye akómisi likoló sɛlisɛli,+Lobɔkɔ na ye etɔbɔli nyoka oyo esɛlimwaka.+
14 Talá! Wana nde ebandeli ya banzela na ye,+Mpe oyo nde mwa nungunungu ya likambo bayoki mpo na ye!Kasi nkake na ye ya nguya, nani akomonisa ete akangi ntina na yango?”+
Maloba na nse
^ To, “Sheole.” Talá Ap 4.
