Mokanda ya liboso epai ya Bakorinti 8:1-13
8 Sikoyo, mpo na bilei oyo epesami na bikeko:+ biso nyonso tozali na boyebi mpo na likambo yango.+ Boyebi ekómisaka moto lolendo, kasi bolingo etongaka.+
2 Soki moto akanisi ete ayebi likambo moko boye, ayebi yango naino te ndenge asengeli mpenza koyeba yango.
3 Kasi soki moto alingaka Nzambe, Nzambe ayebi moto yango.
4 Sikoyo, mpo na likambo oyo etali kolya bilei oyo epesami na bikeko: toyebi ete ekeko ezali nzambe ya solo te,+ mpe ete Nzambe azali kaka moko.+
5 Atako baoyo babengami “banzambe” bazalaka, ezala na likoló to na mabele,+ ndenge “banzambe” bazali mingi mpe “bankolo” bazali mingi,
6 mpo na biso, Nzambe azali kaka moko,+ Tata.+ Biloko nyonso euti epai na ye, mpe tozali na bomoi mpo na ye.+ Mpe mpo na biso Nkolo azali kaka moko, Yesu Kristo. Biloko nyonso eyei na nzela na ye,+ mpe tozali na bomoi na nzela na ye.
7 Nzokande, bato nyonso te nde bakangaka ntina na yango.+ Bamosusu, liboso bazalaki kosambela bikeko. Na yango soki balei bilei oyo epesamaki na ekeko,+ batalelaka yango lokola nde ezali na boyokani na ekeko yango. Yango wana lisosoli na bango, lokola ezali makasi te, etungisaka bango.+
8 Kasi bilei ekosala te ete tópusana penepene ya Nzambe.+ Soki tolei te, tokozanga eloko te, mpe, soki tolei, tokozwa litomba moko te.+
9 Bókeba ete lotomo na bino ya kopona na lolenge moko to mosusu ekóma te eloko oyo ezali kobɛtisa baoyo bazali makasi te libaku.+
10 Ata soki oyebi ete bikeko yango ezali na ntina te, soki moto oyo lisosoli na ye ezali makasi te amoni yo ozali kolya bilei na tempelo ya ekeko moko boye, okanisi te ete yango ekoki kotinda ye alya bilei oyo epesami na bikeko?
11 Ata soki oyebi ete ezali na yango mabe te kolya bilei wana, ozali kobebisa kondima ya moto wana oyo azali makasi te. Kobosana te, azali ndeko na yo oyo Kristo akufelaki.+
12 Kasi ntango bozali kosalela bandeko na bino lisumu na ndenge wana mpe kozokisa lisosoli na bango oyo ezali makasi te,+ bozali kosalela Kristo lisumu.
13 Na yango, soki eloko moko ya kolya ezali kobɛtisa ndeko na ngai libaku, nakolya lisusu mosuni ya nyama soki moke te, mpo nabɛtisa ndeko na ngai libaku te.+
