Mokanda ya liboso ya Ntango 13:1-14
13 Davidi asololaki na bakonzi ya bato nkóto mpe bakonzi ya bato nkama mpe bakambi mosusu nyonso.+
2 Na nsima alobaki na lisangá mobimba ya Yisraele boye: “Soki emonani malamu na miso na bino mpe soki endimami na Yehova Nzambe na biso, tótindela bandeko na biso na bitúká nyonso ya Yisraele maloba, ná banganga-nzambe mpe Balevi na bingumba+ na bango oyo ezali na bisika ya koleisa bibwɛlɛ matiti, mpo báya koyangana na biso.
3 Mpe tómema Sanduku+ ya Nzambe na biso tii epai na biso.” Mpo bato batyelaki yango likebi te na mikolo ya Saulo.+
4 Lisangá mobimba endimaki kosala bongo, mpo yango emonanaki malamu epai ya bato nyonso.
5 Na yango Davidi ayanganisaki Yisraele mobimba, banda na ebale* ya Ezipito tii na Lebo-hamate,*+ mpo na komema Sanduku ya Nzambe ya solo oyo ezalaki na Kiriate-yearime.+
6 Davidi ná Yisraele mobimba bamataki na Baala,+ elingi koloba Kiriate-yearime, na teritware ya Yuda, mpo na kozwa Sanduku ya Nzambe ya solo, Yehova, oyo afandi na kiti ya bokonzi likoló* ya bakeruba.+ Liboso ya sanduku yango nde bato babelelaka nkombo na ye.
7 Nzokande, batyaki Sanduku ya Nzambe ya solo na pusu moko ya sika,+ balongwe na yango na ndako ya Abinadabe. Uza ná Ahio bazalaki kotambwisa pusu yango.+
8 Davidi ná Yisraele mobimba bazalaki kosepela liboso ya Nzambe ya solo na makasi na bango nyonso. Bazalaki koyemba, kobɛta nzɛnzɛ ná bibɛtɛlo mosusu ya bansinga, bambonda mike,+ basɛmbalɛ+ ná bakelelo.+
9 Kasi ntango bakómaki na esika ya kotutatuta mbuma na Kidone, Uza asembolaki lobɔkɔ na ye mpe asimbaki Sanduku, mpo bangɔmbɛ elingaki kokweisa yango.
10 Na yango, nkanda ya Yehova engalelaki Uza, mpe abomaki ye mpo asembolaki lobɔkɔ na ye mpe asimbaki Sanduku.+ Uza akufaki wana liboso ya Nzambe.+
11 Kasi Davidi asilikaki* mpo nkanda ya Yehova engalelaki Uza. Mpe bakómá kobenga esika yango Pereze-uza* tii na mokolo ya lelo.
12 Bongo, Davidi akómaki kobanga Nzambe ya solo na mokolo yango, mpe alobaki: “Ndenge nini nakomema Sanduku ya Nzambe ya solo epai na ngai?”+
13 Davidi aboyaki bámema Sanduku epai na ye na Sité ya Davidi, kasi atindaki bálekisa yango na ndako ya Obede-edome moto ya Gate.
14 Sanduku ya Nzambe ya solo efandaki sanza misato na libota ya Obede-edome, na ndako na ye. Mpe Yehova azalaki se kopambola bato ya libota ya Obede-edome mpe nyonso oyo azalaki na yango.+
Maloba na nse
^ To, “banda na Shihore.”
^ To, “ekɔtelo ya Hamate.”
^ To mbala mosusu, “na katikati.”
^ To, “asepelaki te.”
^ Elimboli, “kongalela Uza.”
