Mokanda ya liboso ya Ntango 16:1-43
16 Bongo bamemaki Sanduku ya Nzambe ya solo mpe batyaki yango na kati ya hema oyo Davidi atɛlɛmisaki mpo na yango;+ na nsima bapesaki makabo ya kotumba mpe bambeka ya kimya* liboso ya Nzambe ya solo.+
2 Ntango Davidi asilisaki kopesa makabo ya kotumba+ mpe bambeka ya kimya,*+ apambolaki bato na nkombo ya Yehova.
3 Lisusu, akabolelaki Bayisraele nyonso, ezala mobali to mwasi, moto na moto limpa moko ya libungutulu, gato moko ya mbuma ya date, mpe gato moko ya mbuma ya vinyo.
4 Na nsima atyaki Balevi mosusu mpo básalaka liboso ya Sanduku ya Yehova,+ mpo bákumisaka* Yehova Nzambe ya Yisraele, bápesaka ye matɔndi, mpe básanzolaka ye.
5 Asafe+ azalaki motambwisi, mpe Zekaria azalaki kosalisa ye. Yeyele, Shemiramote, Yehiele, Matitia, Eliabe, Benaya, Obede-edome mpe Yeyele+ bazalaki kobɛta bibɛtɛlo ya bansinga ná banzɛnzɛ;+ Asafe azalaki kobɛta basɛmbalɛ,+
6 mpe Benaya ná Yahaziele, oyo bazalaki banganga-nzambe, bazalaki kobɛta bakelelo ntango nyonso liboso ya sanduku ya kondimana ya Nzambe ya solo.
7 Ezalaki na mokolo wana nde mpo na mbala ya liboso Davidi asalaki loyembo mpo na kopesa Yehova matɔndi na nzela ya Asafe+ mpe bandeko na ye:
8 “Bópesa Yehova matɔndi,+ bóbelela nkombo na ye,Bóyebisa bato ya bikólo misala na ye!+
9 Bóyembela ye, bóyemba mpo na kosanzola ye,*+Bókanisa na mozindo* misala na ye nyonso ya kokamwa.+
10 Bómikumisa mpo na nkombo na ye mosantu.+
Mitema ya baoyo bazali koluka Yehova esepela.+
11 Bóluka Yehova+ mpe makasi na ye.
Bóluka elongi* na ye ntango nyonso.+
12 Bókanisa lisusu misala ya kokamwa oyo asalá,+Makamwisi na ye mpe bikateli ya lisambisioyo alobá,
13 Bino libota* ya Yisraele mosaleli na ye,+Bino bana ya Yakobo, baoyo ye aponá.+
14 Ye azali Yehova Nzambena biso.+
Bikateli na ye ya lisambisi etali mabele mobimba.+
15 Bókanisaka kondimana na ye mpo na libela,Elaka oyo apesaki,* mpona mabota nkóto,+
16 Kondimana oyo asalakina Abrahama,+Mpe ndai oyo alapaki epai ya Yisaka,+
17 Oyo atyaki mpo ezala mobeko mpo na Yakobo,+Mpe ezala kondimana oyo ekoumela libela mpo na Yisraele,
18 Ntango alobaki: ‘Nakopesa yo mokili ya Kanana+Mpo ezala libula oyobapesi yo.’+
19 Yango ezalaki ntango bozalaki kaka bato moke,Ɛɛ, moke mpenza, mpe bozalaki bapaya na mokili yango.+
20 Bazalaki kotambolatambola longwa na ekólo moko tii na ekólo mosusu,Longwa na bokonzi moko tii na bato ya ekólo mosusu,+
21 Apesaki moto moko te nzela anyokola bango,+Kutu apamelaki bakonzi mpo na bango,+
22 Alobaki: ‘Bósimba te bato na ngai oyo batyami mafuta,Mpe bósala basakoli na ngai eloko moko te ya mabe.’+
23 Bóyembela Yehova, mabele mobimba!
Mokolo na mokolo, bóyebisa lobiko na ye!+
24 Bósakola nkembo na ye na kati ya bikólo,Misala na ye ya kokamwa na kati ya bato ya bikólo nyonso.
25 Mpo Yehova azali monene mpe abongi kosanzolama mingi mpenza.
Azali nsɔmɔ koleka banzambe mosusu nyonso.+
26 Banzambe nyonso ya bato ya bikólo bazali banzambe ya mpambampamba,+Kasi Yehova nde asalá likoló.+
27 Bonene* mpe nkembo ezali na esika oyo ye azali;+Bokasi mpe esengo ezali na esika oyo afandaka.+
28 Bópesa Yehova oyo ebongi na ye, bino mabota ya bato ya bikólo,Bópesa Yehova oyo ebongi na ye, mpo na nkembo mpe bokasi na ye.+
29 Bópesa Yehova nkembo oyo ebongi na nkombo na ye;+Bómema likabo mpe bókɔta liboso na ye.+
Bógumbamela* Yehova na bilamba ya monzɛlɛ ya bosantu.*+
30 Bólɛnga liboso na ye, mabele mobimba!
Mabele* epikami makasi; ekoki koningana te.*+
31 Likoló esepela, mpe mabele ezala na esengo;+Bósakola na kati ya bikólo ete: ‘Yehova akómi Mokonzi!’+
32 Mbu enguluma lokola nkake mpe biloko nyonso oyo etondi kuna;Esobe ná biloko nyonso oyo ezali kuna esepela.
33 Kaka na ntango yango, banzete ya zamba eganga na esengo liboso ya Yehova,Mpo azali koya* kosambisa mabele.
34 Bópesa Yehova matɔndi, mpo azali malamu;+Bolingo na ye ya sembo ezali seko na seko.+
35 Bóloba: ‘Bikisá biso, Ee Nzambe, mobikisi na biso,+Yanganisá biso mpe sikolá biso na bikólo,Mpo tókumisa nkombo na yo mosantu+Mpe tósanzola yo na esengo.*+
36 Yehova Nzambe ya Yisraele asanzolamaLibela na libela.’”*
Mpe bato nyonso balobaki, “Amen!”* mpe basanzolaki Yehova.
37 Na nsima Davidi atikaki Asafe+ ná bandeko na ye liboso ya sanduku ya kondimana ya Yehova mpo bákoba kosala liboso ya Sanduku,+ na kolanda misala ya mokolo na mokolo.+
38 Atyaki Obede-edome ná bandeko na ye, mibali 68, mpe Obede-edome mwana ya Yedutune ná Hosa bázala bakɛngɛli ya baporte;
39 mpe atikaki nganga-nzambe Zadoke+ ná banganga-nzambe oyo bazalaki kosala ná ye liboso ya tabernakle ya Yehova na esika oyo etombwaná, na Gibeone,+
40 mpo na kopesa Yehova makabo ya kotumba mbala na mbala likoló ya etumbelo ya makabo ya kotumba na ntɔngɔ mpe na mpokwa, mpe mpo na kosala nyonso oyo ekomami na Mobeko ya Yehova, oyo apesaki Yisraele.+
41 Bazalaki ná Hemane, Yedutune+ ná bato mosusu oyo baponamaki mpe batángamaki nkombo, mpo na kopesa Yehova matɔndi,+ mpo “bolingo na ye ya sembo ezali seko na seko”;+
42 Hemane+ ná Yedutune basengelaki kobɛta bakelelo, basɛmbalɛ mpe bibɛtɛlo ya miziki mpo na kosanzola* Nzambe ya solo; mpe bana ya Yedutune+ bazalaki kokɛngɛla na porte.
43 Bongo bato nyonso bazongaki na bandako na bango. Davidi mpe azongaki mpo na kopambola bato ya ndako na ye.
Maloba na nse
^ Talá Ndimbola ya maloba.
^ Talá Ndimbola ya maloba.
^ Lil., “mpo bákundwelaka bato.”
^ To, “bóbɛta miziki mpo na ye.”
^ To mbala mosusu, “Bólobela.”
^ To, “kozala; kondimama.”
^ Lil., “momboto.”
^ Lil., “Liloba oyo apesaki mitindo.”
^ To, “Lokumu.”
^ To mbala mosusu, “mpo na nkembo ya bosantu na ye.”
^ To, “Bósambela.”
^ To, “Mabele oyo ebotaka.”
^ To, “kotengatenga te.”
^ To, “ayei.”
^ To, “tósepela na masanzoli na yo.”
^ To, “Seko na seko.”
^ To, “Ezala bongo!”
^ To, “bibɛtɛlo ya nzembo ya.”
