Mokanda ya liboso ya Ntango 18:1-17
18 Nsima ya mwa ntango, Davidi alongaki Bafilistia, akómaki kokonza bango, mpe abɔtɔlaki bango engumba Gate+ ná basité oyo esimbami na yango.*+
2 Na nsima, Davidi alongaki Moabe.+ Bongo Bamoabe bakómaki basaleli ya Davidi mpe bazalaki kofuta ye mpako.+
3 Davidi alongaki Hadadezere+ mokonzi ya Soba+ pene na Hamate.+ Na ntango yango, Hadadezere azalaki kokende kotya bokonzi na ye na etúká ya Ebale Efrate.+
4 Davidi akangaki makalo na ye 1 000 mpe batambwisi-mpunda 7 000, ná basoda 20 000 oyo batambolaka na makolo.+ Na nsima, Davidi akataki misisa ya makolo ya bampunda nyonso ya makalo, longola kaka bampunda 100.+
5 Ntango bato ya Siri ya Damasi bayaki kosalisa Hadadezere mokonzi ya Soba, Davidi abomaki basoda ya Siri 22 000.+
6 Na nsima, Davidi atyaki bituluku ya basoda na ye na Siri ya Damasi. Bato ya Siri bakómaki basaleli ya Davidi mpe bazalaki kofuta ye mpako. Yehova azalaki kopesa Davidi elonga* esika nyonso oyo azalaki kokende.+
7 Longola yango, Davidi azwaki banguba ya wolo ya basoda ya Hadadezere mpe amemaki yango na Yerusaleme.
8 Na Tibate mpe Kune, bingumba ya Hadadezere, Davidi azwaki kwivre ebele mpenza. Na kwivre yango nde Salomo asalaki ebombelo monene ya mai oyo ebengami Mbu ya kwivre,+ ná makonzí mpe bisaleli ya kwivre.+
9 Ntango Tou mokonzi ya Hamate ayokaki ete Davidi alongi limpinga mobimba ya basoda ya Hadadezere+ mokonzi ya Soba,+
10 na mbala moko, atindaki mwana na ye Hadorame epai ya Mokonzi Davidi mpo na koyeba soki azali malamu mpe kopesa ye longonya ndenge abundaki na Hadadezere mpe alongaki ye (mpo Hadadezere abundaki mbala na mbala na Tou); amemaki biloko ya ndenge nyonso ya wolo, ya palata, mpe ya kwivre.
11 Mokonzi Davidi asantisaki biloko yango* mpo na Yehova,+ kaka ndenge asalaki na palata mpe wolo oyo azwaki na bikólo nyonso oyo alongaki: na Edome, Moabe, epai ya Baamone,+ Bafilistia,+ mpe Baamaleke.+
12 Abishai+ mwana ya Zeruya+ abomaki Baedome 18 000 na Lobwaku ya Mungwa.+
13 Atyaki bituluku ya basoda na Edome, mpe Baedome nyonso bakómaki basaleli ya Davidi.+ Yehova azalaki kopesa Davidi elonga* esika nyonso oyo azalaki kokende.+
14 Davidi akobaki koyangela Yisraele mobimba;+ azalaki kosambisa mpe kokata makambo ya bato na ye nyonso na bosembo.+
15 Yoabe mwana ya Zeruya azalaki mokonzi ya basoda,+ Yehoshafate+ mwana ya Ahilude azalaki mokomi-makambo.
16 Zadoke mwana ya Ahitube mpe Ahimeleke mwana ya Abiatare bazalaki banganga-nzambe, mpe Shavisha azalaki sɛkrɛtɛrɛ.
17 Benaya mwana ya Yehoyada azalaki mokonzi ya Bakerete+ mpe Bapelete.+ Mpe bana mibali ya Davidi bazalaki na bisika ya lokumu nsima ya mokonzi.
Maloba na nse
^ To, “ezali zingazinga.”
^ To, “lobiko.”
^ To, “atyaki biloko yango pembeni.”
^ To, “lobiko.”
