Mokanda ya liboso ya Ntango 29:1-30
29 Bongo Mokonzi Davidi alobaki boye na lisangá mobimba: “Mwana na ngai Salomo, moto oyo Nzambe aponi,+ azali elenge mpe ayebi makambo mingi te.*+ Mosala ezali monene, mpo tempelo* yango ezali ya moto te, kasi ya Yehova Nzambe.+
2 Nasali nyonso mpo na kobongisa biloko ya kotongela ndako ya Nzambe na ngai; nabongisi wolo mpo na misala ya wolo, palata mpo na misala ya palata, kwivre mpo na misala ya kwivre, ebende mpo na misala ya ebende,+ mabaya+ mpo na misala ya mabaya, mabanga ya onikisi mpe mabanga oyo bakosangisa na pɔtɔpɔtɔ oyo ekangaka makasi, mabanga mike ya langilangi, mabanga ya ntalo ya ndenge nyonso, mpe mabanga ya albatre ebele mpenza.
3 Mpe lokola nazali kosepela mingi na ndako ya Nzambe na ngai,+ nazwi mpe wolo ná palata na kati ya biloko na ngai ya motuya+ mpe napesi yango mpo na ndako ya Nzambe na ngai, longola biloko nyonso oyo nabongisi mpo na ndako yango mosantu.
4 Napesi talanta* 3 000 ya wolo ya Ofire,+ mpe talanta 7 000 ya palata oyo epɛtolami, mpo na kotya na bifelo ya bandako,
5 wolo mpo na misala ya wolo mpe palata mpo na misala ya palata, mpe mpo na misala nyonso oyo bato ya misala ya mabɔkɔ bakosala. Sikoyo, nani alingi kopesa likabo mpo na Yehova lelo?”+
6 Na yango bankumu ya mabota ya batata, bankumu ya mabota ya Yisraele, bakonzi ya bato nkóto mpe bakonzi ya bato nkama,+ ná bakambi ya misala ya mokonzi+ bandimaki na motema moko.
7 Mpe bapesaki mpo na mosala ya ndako ya Nzambe ya solo: talanta 5 000 ya wolo, darike* 10 000, talanta 10 000 ya palata, talanta 18 000 ya kwivre, mpe talanta 100 000 ya bibende.
8 Moto nyonso oyo azalaki na mabanga ya ntalo apesaki yango mpo etyama na esika ya kobomba biloko ya motuya ya ndako ya Yehova, oyo Yehiele+ moto ya libota ya Gereshone+ azalaki kobatela.
9 Bato basepelaki na ndenge bazalaki kopesa makabo yango ya bolingo, mpo bazalaki kopesa Yehova makabo yango ya bolingo na motema mobimba,+ mpe Mokonzi Davidi asepelaki mingi.
10 Bongo Davidi asanzolaki Yehova na miso ya lisangá mobimba. Alobaki boye: “Sanzolamá, Ee Yehova Nzambe ya Yisraele tata na biso, libela na libela.*
11 Ee Yehova, bonene,+ nguya,+ kitoko, nkembo ná lokumu*+ ezali ya yo, mpo eloko nyonso na likoló mpe na mabele ezali ya yo.+ Bokonzi ezali ya yo, Ee Yehova.+ Yo nde ozali likoló ya nyonso.
12 Bomɛngo mpe nkembo eutaka na yo,+ mpe ozali koyangela eloko nyonso.+ Nguya+ ná makasi+ ezali na lobɔkɔ na yo, mpe lobɔkɔ na yo ekoki kotombola moto+ mpe kopesa moto nyonso makasi.+
13 Bongo sikoyo, Ee Nzambe na biso, topesi yo matɔndi mpe tosanzoli nkombo na yo monene.
14 “Kasi ngai nde nani mpe bato na ngai nde banani, mpo tózwa libaku ya kopesa makabo ya bolingo lokola oyo? Mpo biloko nyonso euti epai na yo, mpe topesi yo kaka biloko oyo euti na lobɔkɔ na yo moko.
15 Mpo liboso na yo, tozali bato oyo bafandi bapaya mpe bato oyo bautá na mboka mosusu, kaka lokola bankɔkɔ na biso nyonso.+ Mpo mikolo na biso na mabele ezali lokola elili,+ elikya ezali te.
16 Ee Yehova Nzambe na biso, ebele ya bomɛngo oyo nyonso tobongisi mpo na kotonga ndako mpo na nkombo na yo mosantu, euti na lobɔkɔ na yo moko mpe nyonso ezali ya yo.
17 Ee Nzambe na ngai, nayebi malamu ete otalatalaka motema+ mpe osepelaka na bosembo.*+ Ezali na motema sembo nde napesi biloko oyo nyonso na bolingo, mpe nazali na esengo mingi komona ndenge bato na yo, oyo bazali awa, bazali kopesa yo makabo ya bolingo.
18 Ee Yehova Nzambe ya Abrahama, ya Yisaka mpe ya Yisraele, bankɔkɔ na biso, salisá bato na yo bábatela mposa mpe makanisi oyo mpo na libela, mpe salá ete mitema na bango ezala kaka epai na yo.+
19 Mpe pesá mwana na ngai Salomo motema mobimba*+ mpo atosa mibeko na yo,+ makundweli na yo, ná malako na yo, mpe asala makambo nyonso oyo mpe atonga tempelo* oyo nabongisi biloko nyonso mpo na yango.”+
20 Bongo Davidi alobaki na lisangá mobimba: “Sikoyo bósanzola Yehova Nzambe na bino.” Mpe lisangá mobimba basanzolaki Yehova Nzambe ya bankɔkɔ na bango, bagumbamaki mpe bafukamaki bilongi na nse liboso ya Yehova mpe liboso ya mokonzi.
21 Mpe bakobaki kopesa Yehova bambeka mpe kopesa Yehova makabo ya kotumba+ tii na mokolo oyo elandaki: bana-ngɔmbɛ 1 000, bampate-mibali 1 000, bana-mpate ya mibali 1 000 mpe makabo ya masanga.+ Bapesaki bambeka ebele mpenza mpo na Yisraele mobimba.+
22 Bakobaki kolya mpe komɛla liboso ya Yehova na mokolo yango mpe bazalaki kosepela makasi.+ Mpe mpo na mbala ya mibale, bakómisaki Salomo mwana ya Davidi mokonzi mpe batyaki ye mafuta liboso ya Yehova mpo azala mokambi,+ mpe Zadoke mpo azala nganga-nzambe.+
23 Mpe Salomo afandaki na kiti ya bokonzi ya Yehova+ lokola mokonzi na esika ya tata na ye Davidi. Azalaki kolonga, mpe Bayisraele nyonso bazalaki kotosa ye.
24 Bankumu nyonso,+ bilombe ya bitumba,+ mpe bana nyonso ya Mokonzi Davidi+ bandimaki kotosa Mokonzi Salomo.
25 Mpe Yehova akómisaki Salomo moto monene mingi mpenza na miso ya Yisraele mobimba mpe apesaki ye lokumu ya bokonzi oyo mokonzi moko te na Yisraele azwaki liboso na ye.+
26 Davidi mwana ya Yese ayangelaki Yisraele mobimba.
27 Boyangeli na ye* na Yisraele eumelaki mbula 40. Na Hebrone ayangelaki mbula 7,+ mpe na Yerusaleme ayangelaki mbula 33.+
28 Mpe akufaki nsima ya kokóma mobange+ mpe kozala na bomoi molai,* na bomɛngo mpe na nkembo; mpe mwana na ye Salomo akómaki mokonzi na esika na ye.+
29 Lisolo ya Mokonzi Davidi, banda na ebandeli tii na nsuka, ekomami na mikanda ya maloba ya Samwele momoni-makambo, ya mosakoli Natane,+ mpe ya Gade+ momoni-bimonaneli.
30 Elobeli boyangeli na ye nyonso, nguya na ye mpe makambo ya ntango wana oyo etalaki ye, Yisraele mpe makonzi nyonso ya zingazinga.
Maloba na nse
^ To, “azali naino makasi te.”
^ To, “ndako makasi.”
^ To, “seko na seko.”
^ To, “bokonzi.”
^ To, “na bosolo.”
^ To, “ya komipesa mobimba.”
^ To, “ndako makasi.”
^ Lil., “Mikolo ya boyangeli na ye.”
^ Lil., “atondi na mikolo.”
