Mokanda ya liboso ya Samwele 22:1-23
22 Bongo Davidi alongwaki wana+ mpe akimaki na mobenga ya Adulame.+ Ntango bandeko na ye mpe libota mobimba ya tata na ye bayokaki yango, bakitaki kuna epai na ye.
2 Bongo bato nyonso oyo bazalaki na mikakatano mpe banyongo, ná bato nyonso oyo bomoi ekómelaki bango bololo* balandaki ye, mpe akómaki mokonzi na bango. Bazalaki bato soki 400.
3 Na nsima Davidi alongwaki wana mpe akendaki na Mizipe, na Moabe mpe alobaki na mokonzi ya Moabe:+ “Nabondeli yo, tiká tata na ngai ná mama na ngai báfanda elongo na bino tii ntango nakoyeba oyo Nzambe akosala mpo na ngai.”
4 Na yango, atikaki bango epai ya mokonzi ya Moabe, mpe bafandaki elongo na ye ntango nyonso oyo Davidi alekisaki na esika ya komibomba.+
5 Na nsima, mosakoli Gade+ alobaki na Davidi: “Kotikala te na esika ya komibomba. Longwá wana mpe zongá na mokili ya Yuda.”+ Na yango Davidi alongwaki wana mpe akendaki na zamba ya Herete.
6 Saulo ayokaki ete bamoni Davidi ná bato oyo bazalaki elongo na ye. Saulo azalaki kofanda na Gibea,+ na nse ya nzete ya tamarisi, na mwa ngomba. Azalaki na likɔnga na lobɔkɔ na ye mpe basaleli na ye nyonso batɛlɛmaki zingazinga na ye.
7 Bongo Saulo alobaki na basaleli na ye oyo batɛlɛmaki zingazinga na ye: “Nabondeli bino Babenyamina, bóyoka ngai: Mwana ya Yese+ akopesa bino nyonso bilanga, mpe banzete ya vinyo, ndenge napesá bino? Akotya bino nyonso bakonzi ya bato nkóto mpe bakonzi ya bato nkama?+
8 Bino nyonso bosaleli ngai likita!* Ata moto moko te ayebisi ngai ete mwana na ngai asalaki kondimana na mwana ya Yese!+ Ata moto moko te kati na bino azali koyokela ngai mawa mpe koyebisa ngai ete mwana na ngai moko atindi mosaleli na ngai abombana mpo na kosala ngai mabe, ndenge azali kosala yango sikoyo.”
9 Na yango Doege+ moto ya Edome, oyo azalaki kokamba basaleli ya Saulo, ayanolaki:+ “Namonaki mwana ya Yese ayei na Nobe, epai ya Ahimeleke mwana ya Ahitube.+
10 Atunaki Yehova mpo na ye mpe apesaki ye biloko ya kolya. Kutu apesaki ye mpe mopanga ya Goliate Mofilistia.”+
11 Na mbala moko, mokonzi atindaki bábenga Ahimeleke mwana ya nganga-nzambe Ahitube mpe banganga-nzambe nyonso ya libota mobimba ya tata na ye, oyo bazalaki na Nobe. Mpe bango nyonso bayaki epai ya mokonzi.
12 Bongo Saulo alobaki: “Nabondeli yo, yoká ngai mwana ya Ahitube!” bongo ayanolaki: “Ngai oyo, nkolo na ngai.”
13 Saulo alobaki na ye: “Mpo na nini yo ná mwana ya Yese bosaleli ngai likita? Opesi ye limpa ná mopanga mpe otuni Nzambe mpo na ye, nzokande azali kobundisa ngai mpe kobombana mpo na kosala ngai mabe, ndenge azali kosala yango sikoyo.”
14 Na yango, Ahimeleke ayanolaki mokonzi: “Nani kati na basaleli na yo nyonso abongi kotyelama motema* lokola Davidi?+ Azali bokilo ya mokonzi+ mpe mokonzi ya basoda oyo bakɛngɛlaka yo. Azali mpe moto ya lokumu na ndako na yo.+
15 Ezali mbala ya liboso te natuna Nzambe mpo na ye.+ Nakoki kokanisa ata moke te kosalela yo likita! Tiká ete mokonzi akanisa te ete mosaleli na ye Ahimeleke mpe libota mobimba ya tata na ye basaleli mokonzi mabe, mpo mosaleli na yo ayebaki ata eloko moko te na likambo oyo.”+
16 Kasi mokonzi alobaki: “Ahimeleke, yo ná libota mobimba ya tata na yo,+ bokokufa solo.”+
17 Na yango, mokonzi alobaki na basoda oyo bakɛngɛlaka* ye, oyo batɛlɛmaki zingazinga na ye ete: “Bókende mpe bóboma banganga-nzambe ya Yehova, mpo bakómi na ngámbo ya Davidi! Bayebaki ete azali kokima, kasi bayebisaki ngai te!” Nzokande basaleli ya mokonzi baboyaki kosembola lobɔkɔ na bango mpo na koboma banganga-nzambe ya Yehova.
18 Na nsima, mokonzi alobaki na Doege+ boye: “Kende mpe bomá banganga-nzambe!” Na mbala moko, Doege moto ya Edome+ akendaki mpe ye moko abomaki banganga-nzambe yango. Na mokolo yango, abomaki mibali 85 oyo balataki efode ya lini.+
19 Abomaki mpe na mopanga bato nyonso oyo bafandaka na Nobe,+ engumba ya banganga-nzambe: mobali, mwasi, mwana, ata mpe mwana oyo azali komɛla mabɛlɛ; bakisa mpe ngɔmbɛ, mpunda, mpe mpate.
20 Nzokande, kaka Abiatare,+ mwana mobali moko ya Ahimeleke, mwana ya Ahitube, nde abikaki. Akimaki mpe akendaki epai ya Davidi.
21 Abiatare alobaki na Davidi: “Saulo abomi banganga-nzambe ya Yehova.”
22 Na yango Davidi alobaki na Abiatare: “Mokolo wana,+ ntango namonaki Doege moto ya Edome kuna, nayebaki malamu ete akozanga te koyebisa Saulo. Ya solo, liwa ya moto* nyonso ya libota ya tata na yo ezali na motó na ngai.
23 Fandá elongo na ngai. Kobanga te, soki moto azali koluka koboma yo,* azali mpe koluka koboma ngai;* ngai moko nakobatela yo.”+
Maloba na nse
^ To, “bato nyonso oyo milimo na bango ekómaki bololo.”
^ To, “Bino nyonso boyokani mpo na kosala ngai mabe.”
^ To, “azali moto ya sembo.”
^ Lil., “bapoti-mbangu.”
^ To, “molimo.”
^ To, “aluki molimo na yo.”
^ To, “aluki mpe molimo na ngai.”
