Mokanda ya liboso ya Samwele 24:1-22
24 Ntango kaka Saulo azongaki, nsima ya kolanda Bafilistia, bayebisaki ye ete: “Talá! Davidi azali na esobe ya Ene-gedi.”+
2 Na yango Saulo aponaki mibali 3 000 na kati ya limpinga ya Yisraele mpe akendaki koluka Davidi ná bato na ye na mwa ngomba ya mabangamabanga, esika bantaba ya ngomba ezalaka.
3 Saulo akómaki na mapango ya bampate oyo esalemi na mabanga, oyo ezalaki pembeni ya nzela, mpe mobenga moko ezalaki kuna. Akɔtaki kuna mpo akende kabinɛ,* nzokande, Davidi ná bato na ye bafandaki na kati mpenza ya mobenga yango.+
4 Bato ya Davidi balobaki na ye: “Lelo ezali mokolo oyo Yehova alobi na yo ete: ‘Talá! Napesi yo monguna na yo na lobɔkɔ na yo,+ mpe okoki kosala ye nyonso oyo olingi.’” Na yango Davidi atɛlɛmaki mpe akataki na malɛmbɛ nsɔngɛ ya kazaka ya Saulo oyo ezangá mabɔkɔ.
5 Kasi nsima na yango, motema* ya Davidi ekómaki kobɛta makasi+ mpo akataki nsɔngɛ ya kazaka ya Saulo oyo ezangá mabɔkɔ.
6 Alobaki na bato na ye: “Nakoki kokanisa ata moke te kosala nkolo na ngai likambo ya mabe boye, mpo azali moto oyo Yehova atye mafuta. Mpo Yehova akosepela te soki nasemboleli ye lobɔkɔ na ngai, mpo azali moto oyo Yehova atye mafuta.”+
7 Na maloba yango, Davidi apekisaki* bato na ye mpe apesaki bango nzela te ete básala Saulo mabe. Kasi Saulo atɛlɛmaki, alongwe na mobenga yango mpe asimbaki nzela akei.
8 Na nsima, Davidi atɛlɛmaki, abimaki na mobenga yango mpe abelelaki Saulo: “Nkolo na ngai, mokonzi!”+ Ntango Saulo atalaki na nsima, Davidi agumbamaki elongi na nse mpe afukamaki.
9 Davidi alobaki na Saulo: “Mpo na nini ozali koyoka maloba ya bato oyo bazali koloba ete: ‘Talá! Davidi azali koluka kosala yo mabe’?+
10 Na mokolo ya lelo, miso na yo moko emoni ndenge Yehova apesaki yo na lobɔkɔ na ngai. Ntango ozalaki na mobenga, moto moko alobaki na ngai naboma yo,+ kasi nayokelaki yo mawa mpe nalobaki: ‘Nakosembolela nkolo na ngai lobɔkɔ na ngai te, mpo azali moto oyo Yehova atye mafuta.’+
11 Sikoyo, Ee tata na ngai! Talá nsɔngɛ ya kazaka na yo oyo ezangá mabɔkɔ yango oyo na lobɔkɔ na ngai! Mpo ntango nazalaki kokata nsɔngɛ ya kazaka yango, nakokaki mpe koboma yo. Sikoyo okoki komona ete nakani kosala yo mabe te mpe kotombokela yo te, nasaleli yo lisumu mpe te,+ atako yo ozali koluka koboma ngai.*+
12 Tiká ete Yehova akata likambo kati na ngai ná yo,+ mpe tiká ete Yehova azongisela yo mabe oyo osali ngai,+ kasi ngai nakosala yo mabe te.+
13 Kaka ndenge lisese moko ya kala elobá: ‘Mabe eutaka na bato mabe,’ kasi ngai nakosala yo mabe te.
14 Mokonzi ya Yisraele abimi mpo na kobundisa nani? Ozali kolanda ngai? Nazali kaka lokola mbwa ekufá, nsili ya mpamba!+
15 Tiká Yehova azala mosambisi, mpe asambisa ngai ná yo. Akotalela likambo, mpe akokata likambo na ngai,+ akosambisa ngai mpe akobikisa ngai na lobɔkɔ na yo.”
16 Ntango kaka Davidi asilisaki koloba na Saulo maloba wana, Saulo alobaki: “Oyo mongongo na yo, mwana na ngai Davidi?”+ Bongo Saulo abandaki kolela na mongongo makasi.
17 Alobaki na Davidi: “Ozali sembo koleka ngai, mpo yo osaleli ngai malamu, kasi ngai nazongiseli yo mabe.+
18 Ya solo, omonisi ngai lelo makambo malamu oyo osaleli ngai: obomaki ngai te ntango Yehova akabaki ngai na lobɔkɔ na yo.+
19 Soki moto akutani na monguna na ye, akotika ye akende na kimya? Yehova akozongisela yo malamu,+ mpo na bolamu oyo osaleli ngai na mokolo ya lelo.
20 Talá! Nayebi ete ya solo okokóma mokonzi,+ mpe ete bokonzi ya Yisraele ekoumela mpenza na lobɔkɔ na yo.
21 Sikoyo, lapelá ngai ndai na nkombo ya Yehova+ ete nsima ya liwa na ngai, okosilisa bakitani* na ngai te mpe okolongola nkombo na ngai te na libota ya tata na ngai.”+
22 Bongo Davidi alapelaki Saulo ndai mpe nsima na yango, Saulo akendaki na ndako na ye.+ Kasi Davidi ná bato na ye bamataki na esika ya komibomba.+
Maloba na nse
^ Lil., “mpo na kozipa makolo na ye.”
^ To, “lisosoli ya Davidi ekómaki kotungisa ye.”
^ To mbala mosusu, “azongisaki.”
^ To, “koluka molimo na ngai.”
^ Lil., “momboto.”
