Mokanda ya mibale ya 22:1-20
22 Yosiya+ azalaki na mbula mwambe ntango akómaki mokonzi, mpe ayangelaki mbula 31 na Yerusaleme.+ Nkombo ya mama na ye ezalaki Yedida, mwana ya Adaya moto ya engumba Bozekate.+
2 Yosiya asalaki makambo oyo ezali malamu na miso ya Yehova. Alandaki ndakisa* ya nkɔkɔ na ye Davidi na makambo nyonso,+ mpe apɛngwaki te mpo na kokende na lobɔkɔ ya mobali to na lobɔkɔ ya mwasi.
3 Na mbula ya 18 ya boyangeli na ye, Mokonzi Yosiya atindaki Shafane oyo azalaki sɛkrɛtɛrɛ, mwana ya Azaliya, mwana ya Meshulame, akende na ndako ya Yehova,+ alobi:
4 “Kende epai ya nganga-nzambe monene Hilikiya,+ mpe yebisá ye asangisa mbongo nyonso oyo ezali komemama na ndako ya Yehova,+ oyo bakɛngɛli ya baporte bazwi epai ya bato.+
5 Bápesa yango bato oyo batyamaki mpo na kotambwisa misala na ndako ya Yehova, mpe bango bakofuta basali-misala na ndako ya Yehova oyo bakobongisa bisika oyo ebebi,*+
6 elingi koloba, bato ya misala ya mabɔkɔ, batongi, mpe bamasɔ; bakosomba mabaya ná mabanga oyo bakatá mpo na kobongisa ndako.+
7 Kasi esengeli te kotuna bango ndenge oyo bazali kosalela mbongo yango, mpo bazali bato oyo babongi kotyelama motema.”+
8 Na nsima nganga-nzambe monene Hilikiya alobaki na Shafane oyo azalaki sɛkrɛtɛrɛ+ ete: “Namoni buku ya Mobeko+ na ndako ya Yehova.” Bongo Hilikiya apesaki Shafane buku yango, mpe Shafane abandaki kotánga yango.+
9 Na nsima Shafane oyo azalaki sɛkrɛtɛrɛ akendaki epai ya mokonzi mpe ayebisaki ye ete: “Basaleli na yo babimisi mbongo oyo ezalaki na tempelo, mpe bapesi yango bato oyo batyamaki mpo na kotambwisa misala na ndako ya Yehova.”+
10 Shafane oyo azalaki sɛkrɛtɛrɛ ayebisaki lisusu mokonzi: “Nganga-nzambe Hilikiya apesi ngai buku moko.”+ Bongo Shafane abandaki kotánga yango liboso ya mokonzi.
11 Ntango kaka mokonzi ayokaki maloba ya buku yango ya Mobeko, apasolaki bilamba na ye.+
12 Na nsima mokonzi apesaki nganga-nzambe Hilikiya, Ahikame+ mwana ya Shafane, Akabore mwana ya Mikaya, Shafane oyo azalaki sɛkrɛtɛrɛ, mpe Asaya mosaleli ya mokonzi mitindo oyo:
13 “Bókende, bótuna Yehova mpo na ngai, mpo na bato ya ekólo, mpe mpo na Yuda mobimba na ntina etali maloba ya buku oyo euti komonana; mpo nkanda makasi ya Yehova oyo epeleli biso ezali monene,+ mpamba te bankɔkɔ na biso batosaki te maloba ya buku oyo, basalelaki te makambo nyonso oyo ekomami mpo na biso.”
14 Na yango nganga-nzambe Hilikiya, Ahikame, Akabore, Shafane, mpe Asaya bakendaki epai ya mosakoli-mwasi Huluda.+ Azalaki mwasi ya Shalume, mokɛngɛli ya esika ya kobomba bilamba, mwana ya Tikiva mwana ya Harase. Azalaki kofanda na Kartye ya mibale na Yerusaleme; mpe kuna nde basololaki na ye.+
15 Alobaki na bango: “Talá oyo Yehova Nzambe ya Yisraele alobi: ‘Bóyebisa mobali oyo atindi bino epai na ngai:
16 “Talá oyo Yehova alobi: ‘Nakoyeisa mpasi na esika oyo mpe na bafandi na yango, ɛɛ maloba nyonso ya buku oyo mokonzi ya Yuda atángi.+
17 Lokola basundoli ngai mpe bazali kobimisela banzambe mosusu milinga ya mbeka+ mpo na kosilikisa ngai na misala na bango nyonso,+ nkanda na ngai ekopelela esika oyo mpe ekosila te.’”+
18 Kasi bóloba boye epai ya mokonzi ya Yuda, oyo atindi bino mpo na kotuna Yehova: “Talá oyo Yehova Nzambe ya Yisraele alobi: ‘Mpo na maloba oyo oyoki,
19 lokola motema na yo ezalaki makasi te mpe omikitisi+ liboso ya Yehova ntango oyoki makambo oyo nalobi mpo na esika oyo mpe bafandi na yango, ete elakeli mabe ekozwa bango mpe bato mosusu bakokóma na nsɔmɔ mpo na makambo oyo ekoyela bango, mpe lokola opasoli bilamba na yo+ mpe oleli liboso na ngai, ngai mpe nayoki yo, yango nde liloba ya Yehova.
20 Yango wana nakoyanganisa yo na bankɔkɔ na yo,* mpe okotyama na lilita na yo na kimya, mpe miso na yo ekomona te mpasi oyo nakoyeisela esika oyo.’”’” Bongo bamemelaki mokonzi eyano yango.
Maloba na nse
^ Lil., “Atambolaki na nzela nyonso.”
^ To, “bisika oyo efelo esali bandelo.”
^ Oyo ezali maloba ya ntoki mpo na kolobela liwa.
