Epai ya Bakolose 4:1-18
4 Bankolo, bósalelaka baombo na bino makambo na bosembo mpe na ndenge ebongi, mpo boyebi ete bino mpe bozali na Nkolo na likoló.+
2 Bótingama na mabondeli,+ na nzela na yango bósɛnzɛlaka mpe bópesaka matɔndi.+
3 Wana bozali kosala bongo bóbondelaka mpe mpo na biso,+ ete Nzambe afungolela biso nzela mpo tósakola liloba na ye, mpo na kosakola sekele mosantu oyo etali Kristo, oyo mpo na yango nazali na minyɔlɔlɔ,+
4 mpe nasakola yango polele na ndenge oyo nasengeli mpenza.
5 Bókoba kotambola na bwanya epai ya bato ya libándá, bósalela mpenza malamu ntango na bino.*+
6 Maloba na bino ezala ntango nyonso kitoko, eyeisama elɛngi na mungwa,+ mpo na koyeba ndenge oyo bosengeli kopesa moto mokomoko eyano.+
7 Tishike,+ ndeko na ngai ya bolingo mpe mosaleli* ya sembo mpe moninga moombo na kati ya Nkolo, akoyebisa bino makambo na ngai nyonso.
8 Nazali kotindela bino ye mpo bóyeba ndenge oyo tozali, mpe abɔndisa mitema na bino.
9 Azali koya elongo na Onezime,+ ndeko na ngai ya sembo mpe ya bolingo, oyo azalaki elongo na bino; bakoyebisa bino makambo nyonso oyo ezali koleka awa.
10 Aristarke+ mokangami lokola ngai atindeli bino mbote, ndenge moko mpe Marko,+ ndeko* ya Barnabasi, (oyo bozwaki malako ete bóyamba ye malamu+ soki akómi epai na bino),
11 ná Yesu oyo abengami Yusutusi. Bango bazali na kati ya bato oyo bakatamá ngenga. Kaka bango nde bazali baninga na ngai ya mosala mpo na Bokonzi ya Nzambe, mpe bango nde bakómi libɔndisi mpenza epai na ngai.*
12 Epafrasi,+ moombo ya Kristo Yesu, oyo azalaki elongo na bino, atindeli bino mbote. Azali ntango nyonso koboma nzoto mpo na bino na mabondeli na ye, mpo nsukansuka bózala bato oyo bakoki na nyonso mpe bózala na kondima makasi na makambo nyonso oyo Nzambe akosala.
13 Mpo nazali kotatola mpo na ye ete azali kosala nyonso mpenza mpo na bino, ezala mpe mpo na bandeko ya Laodikia mpe ya Hierapolisi.
14 Luka,+ monganga mpe ndeko ya bolingo atindeli bino mbote, ndenge moko mpe Demasi.+
15 Bópesa mbote na bandeko ya Laodikia, na Nimfa mpe na lisangá oyo ezali na ndako na ye.+
16 Mpe ntango mokanda oyo ekotángama epai na bino, bósala ete etángama mpe+ na lisangá ya bato ya Laodikia mpe ete bino mpe bótánga oyo ya Laodikia.
17 Mpo na kosukisa, bóyebisa Arshipe+ boye: “Batelá na makanisi mokumba* oyo ondimaki ya kozala moyekoli ya Nkolo, mpo okokisa yango na ndenge oyo ebongi.”
18 Oyo ezali mbote na ngai, Paulo, nakomi yango na lobɔkɔ na ngai moko.+ Bókoba kokanisa minyɔlɔlɔ na ngai.+ Boboto monene ezala na bino.
Maloba na nse
^ Lil., “bómisombela ntango oyo ebongi.”
^ To, “ministre.”
^ Mwana ya ndeko moko ya moboti ya Barnabasi.
^ To, “lisalisi oyo ezali kopesa ngai makasi.”
^ Lil., “mosala.”
