Ezera 10:1-44
10 Ntango Ezera azalaki kobondela+ mpe koyambola masumu ya bato ya ekólo na ye, azalaki kolela, afukami elongi na nse liboso ya ndako ya Nzambe ya solo, ebele ya Bayisraele, mibali, basi mpe bana, bayanganaki epai na ye, mpe bango nyonso bazalaki kolela mingi.
2 Bongo Shekania mwana ya Yehiele+ moko ya bana ya Elame+ alobaki na Ezera: “Biso tozangi bosembo epai ya Nzambe na biso, na ndenge tobali* basi bapaya, oyo bazali bato ya ekólo oyo.+ Atako bongo elikya ezali naino mpo na Yisraele.
3 Sikoyo, tósala kondimana na Nzambe na biso+ ete tokobengana basi yango nyonso ná bana na bango, na kolanda malako ya Yehova mpe ya baoyo bazalaka na limemya* makasi mpo na mitindo ya Nzambe na biso.+ Tiká tósala ndenge Mobeko elobi.
4 Tɛlɛmá, mpo yo nde ozali na mokumba ya kosilisa likambo oyo, mpe biso tozali elongo na yo. Zalá makasi mpe salá oyo esengeli.”
5 Na yango Ezera atɛlɛmaki mpe asɛngaki bakambi ya banganga-nzambe, Balevi mpe Yisraele mobimba bálapa ndai ete bakosala oyo elobamaki.+ Bongo balapaki ndai.
6 Sikoyo Ezera alongwaki liboso ya ndako ya Nzambe ya solo mpe akendaki na eteni ya ndako* ya Yehohanane mwana ya Eliashibe. Atako akendaki kuna, alyaki eloko te mpe amɛlaki mai te, mpo azalaki na mawa makasi mpo na kozanga bosembo ya bato oyo bautaki na bokangami.+
7 Na nsima babelelaki na Yuda mobimba mpe na Yerusaleme mpo na kosɛnga bato nyonso oyo kala bamemamaki na mboka mopaya báyangana na Yerusaleme;
8 mpe na boyokani na ekateli ya bankumu mpe ya bankulutu, moto nyonso oyo akoya te na kati ya mikolo misato bakobɔtɔla ye biloko na ye nyonso* mpe ye moko akolongolama na lisangá ya baoyo bamemamaki na mboka mopaya.+
9 Bongo na kati ya mikolo misato, mibali nyonso ya Yuda mpe ya Benyamina bayanganaki na Yerusaleme. Ezalaki mokolo ya 20 ya sanza ya libwa. Bato nyonso bafandaki na lopango moko ya ndako ya Nzambe ya solo, bazalaki kolɛnga mpo na likambo yango mpe mpo mbula makasi ezalaki kobɛta.
10 Na nsima nganga-nzambe Ezera atɛlɛmaki mpe alobaki na bango: “Bino bosali makambo na kozanga bosembo epai ya Nzambe na ndenge bobali basi bapaya,+ mpe bobakisi lisusu ngambo ya Yisraele.
11 Sikoyo bóyambola mabe na bino liboso ya Yehova Nzambe ya bankɔkɔ na bino mpe bósala mokano na ye. Bókabwana na bato ya mokili yango mpe na basi wana bapaya.”+
12 Na yango, lisangá mobimba eyanolaki na mongongo makasi ete: “Tokosala kaka ndenge olobi mpo ezali mokumba na biso.
13 Nzokande bato bazali mingi, mpe ezali eleko ya mbula. Tokokoka kotɛlɛma libándá te, mpe likambo yango ekobonga na mokolo moko to mibale te, mpo tozali bato ebele oyo totombokaki na likambo yango.
14 Bongo tobondeli yo, tiká bankumu na biso bázala bamonisi ya lisangá mobimba.+ Mpe na bingumba na biso, tiká mibali nyonso oyo babalá basi bapaya báya na ntango oyo ekotyama, elongo na bankulutu mpe basambisi ya engumba mokomoko, tii ntango tokosala ete nkanda makasi oyo Nzambe na biso ayokeli biso mpo na likambo yango ekita.”
15 Kasi, Yonatane mwana ya Asahele ná Yahazeya mwana ya Tikiva batɛmɛlaki likambo yango, mpe Meshulame ná Shabetai oyo bazali Balevi,+ bapesaki bango mabɔkɔ.
16 Kasi bato oyo kala bamemamaki na mboka mopaya basalaki ndenge balakaki. Bongo nganga-nzambe Ezera ná bankumu ya batata ya mabota ndenge na ndenge, oyo baponamaki na bankombo na bango, basalaki likita kaka bango moko na mokolo ya liboso ya sanza ya zomi mpo na kotalela likambo yango.
17 Na mokolo ya liboso ya sanza ya liboso, basilisaki kotalela likambo ya mibali nyonso oyo babalaki basi bapaya.
18 Mpe eyaki koyebana ete bana mosusu ya banganga-nzambe babalaki mpe basi bapaya.+ Kati na bana ya Yeshua+ mwana ya Yehozadake ná bandeko na ye: Maaseya, Eliezere, Yaribe ná Gedalia.
19 Kasi balakaki ete* bakobengana basi na bango, mpe lokola bazalaki na ngambo, bakopesa mpate moko ya mobali ya etonga lokola likabo mpo na ngambo.+
20 Na kati ya bana ya Imere+ ezalaki Hanani ná Zebadia.
21 Na bana ya Harime:+ Maaseya, Eliya, Shemaya, Yehiele ná Uzia.
22 Na bana ya Pashure:+ Eliyonai, Maaseya, Yishimaele, Netanele, Yozabade ná Eleasa.
23 Na Balevi ezalaki Yozabade, Shimei, Kelaya (elingi koloba, Kelita), Petaya, Yuda ná Eliezere.
24 Na bayembi: Eliashibe. Mpe na bakɛngɛli ya baporte: Shalume, Teleme ná Uri.
25 Mpe na kati ya Yisraele: Na kati ya bana ya Paroshe:+ Ramia, Yizia, Malakiya, Miyamine, Eleazare, Malakiya ná Benaya.
26 Na bana ya Elame:+ Matania, Zekaria, Yehiele,+ Abadi, Yeremote ná Eliya.
27 Na bana ya Zatu:+ Eliyonai, Eliashibe, Matania, Yeremote, Zabade ná Aziza.
28 Na bana ya Bebai:+ Yehohanane, Hanania, Zabai, Atelai.
29 Na bana ya Bani: Meshulame, Maluke, Adaya, Yashube, Sheale ná Yeremote.
30 Na bana ya Pahate-moabe:+ Adena, Kelale, Benaya, Maaseya, Matania, Bezalele, Binui ná Manase.
31 Na bana ya Harime:+ Eliezere, Yishiya, Malakiya,+ Shemaya, Shimeone,
32 Benyamina, Maluke ná Shemaria.
33 Na bana ya Hashume:+ Matenai, Matata, Zabade, Elifelete, Yeremai, Manase ná Shimei.
34 Na bana ya Bani: Maadai, Amirame, Uele,
35 Benaya, Bedeya, Keluhi,
36 Vania, Meremote, Eliashibe,
37 Matania, Matenai ná Yaasu;
38 na bana ya Binui: Shimei,
39 Shelemia, Natane, Adaya,
40 Makenadebai, Shashai, Sharai,
41 Azarele, Shelemia, Shemaria,
42 Shalume, Amaria mpe Yozefe;
43 Na bana ya Nebo: Yeyele, Matitia, Zabade, Zebina, Yadai, Yoele ná Benaya.
44 Bango nyonso wana babalaki basi bapaya,+ mpe babenganaki basi na bango elongo na bana na bango.+
Maloba na nse
^ To, “ndenge totye na bandako na biso.”
^ Lil., “baoyo balɛngaka.”
^ To, “esika ya kolya.”
^ To, “biloko na ye nyonso ekokóma ya ekila.”
^ Lil., “bapesaki mabɔkɔ na bango ete.
