Epai ya Filemo 1:1-25
1 Paulo, moto ya bolɔkɔ+ mpo na Kristo Yesu, mpe Timote,+ ndeko na biso, epai ya Filemo, ndeko na biso ya bolingo mpe moninga ya mosala,
2 mpe epai ya Apia, ndeko na biso ya mwasi, mpe epai ya Arshipe,+ soda lokola biso, mpe epai ya lisangá oyo ezali na ndako na yo:+
3 Boboto monene mpe kimya ya Nzambe Tata na biso mpe ya Nkolo Yesu Kristo ezala na bino.
4 Napesaka ntango nyonso Nzambe na ngai matɔndi ntango natángaka yo na mabondeli na ngai,+
5 na kotalela makambo oyo nazali koyoka, ozali na kondima epai ya Nkolo Yesu, olingaka ye na motema mobimba mpe olingaka basantu nyonso ndenge wana.
6 Nazali kobondela ete kondima oyo yo ná basusu bozali na yango etinda yo oyeba bolamu nyonso oyo tozwi na nzela ya Kristo.
7 Mpo nayokaki esengo mingi mpe nabɔndisamaki mingi ntango nayokaki nsango ya bolingo oyo ozali na yango, mpo mitema* ya basantu elendisami mpo na yo, ndeko na ngai.
8 Yango wana, atako na nkombo ya Kristo nakoki koloba polele mpenza mpe na bosembo mpo na kopesa yo etinda osala oyo ebongi,
9 nakosepela nde kobondela yo na bolingo, ndenge nazali, ngai Paulo mobange, ɛɛ, sikoyo mpe moto ya bolɔkɔ mpo na Kristo Yesu.
10 Nazali kobondela yo omonisela mwana na ngai Onezime+ boboto, oyo nakómi lokola tata na ye+ awa nazali na bolɔkɔ.*
11 Azalaki liboso na ntina te mpo na yo, kasi sikoyo akómi na ntina mpo na yo mpe mpo na ngai.
12 Nazali kozongisela yo ye, ɛɛ, ye, moto oyo nalingaka mingi.*
13 Nalingaki akoba kozala elongo na ngai awa mpo asalela ngai ndenge yo mpe olingaki kosala, wana nazali na bolɔkɔ mpo na nsango malamu.+
14 Kasi nalingi kosala eloko moko te soki opesi ngai nzela te, mpo osala likambo yango ya malamu na kotindikama te, kasi euta nde na motema na yo.+
15 Mbala mosusu ezali mpo na ntina yango nde akimaki mpo na mwa ntango,* mpo ozwa ye lisusu libela na libela,
16 lokola moombo lisusu te+ kasi koleka moombo, lokola ndeko ya bolingo.+ Nalingaka ye mingi mpenza, mpe okolinga ye mingi lokola moombo mpe lokola ndeko na kati ya Nkolo.*
17 Na yango, soki ozwaka ngai moninga,* yambá ye na boboto ndenge olingaki koyamba ngai.
18 Lisusu, soki asalaki yo mabe moko boye to azali na nyongo na yo, tyá yango na motó na ngai.
19 Ngai, Paulo nazali kokoma na lobɔkɔ na ngai moko ete: Nakozongisa nyongo oyo Onezime azali na yango. Kutu oyebi ete ozali na nyongo na ngai, na kotalela bomoi na yo.
20 Ɛɛ, ndeko na ngai, nazali na elikya ete nakozwa lisalisi epai na yo na boyokani na Nkolo. Kitisá ngai motema* mpo na Kristo.
21 Natye motema ete okosala oyo nasɛngi, yango wana nazali kokomela yo, mpo nayebi ete okosala ata koleka makambo oyo nalobi.
22 Kasi longola likambo wana, bongiselá ngai mpe esika, mpo nazali na elikya ete, na nzela ya mabondeli na bino, bakotika ngai mpo na bolamu na bino.+
23 Epafrasi,+ mokangami lokola ngai na bomoko elongo na Kristo Yesu atindeli yo mbote,
24 ná Marko, Aristarke,+ Demasi,+ mpe Luka,+ baninga na ngai ya mosala.
25 Boboto monene ya Nkolo Yesu Kristo ezala na elimo oyo bozali komonisa.
Maloba na nse
^ To, “bolingo ya motema.”
^ Lil., “na kati ya minyɔlɔlɔ.”
^ To, “bolingo na ngai mpenza ya motema.”
^ Lil., “ngonga moko.”
^ Lil., “ezala na nzoto ya mosuni mpe na kati ya Nkolo.”
^ Lil., “moninga na yo ya mosala.”
^ Lil., “Lendisá bolingo na ngai ya motema.”
