Masese 27:1-27
27 Komikumisa te mpo na makambo oyo okosala lobi,Mpo oyebi te soki mokolo ekomemela yo nini.*+
2 Moto mosusu akumisa yo, kasi monɔkɔ na yo moko te;Basusu básala* bongo, kasi mbɛbu na yo moko te.+
3 Libanga ezali kilo mpe zɛlo ezali kilo,Kasi motungisi oyo zoba apesaka ezali kilo koleka yango nyonso mibale.+
4 Nkanda makasi ezali mabe mpe ebebisaka lokola mpela,Kasi zuwa ezali mabe koleka yango?+
5 Mpamela ya polele ezali malamu koleka bolingo ya kobombama.+
6 Moninga ya sembo apesaka toli ata soki ekoki komonana mabe,+Kasi mapwɛpwɛ ya monguna ezali ebele.*
7 Moto oyo atondi* aboyaka* mafuta ya nzoi oyo euti na ndako na yango,Kasi mpo na moto ya nzala,* ata eloko oyo ezali bololo ezalaka elɛngi.
8 Lokola ndɛkɛ oyo ezali koyengayenga mosika na zumbu* na yangoMoto oyo azali koyengayenga mosika ya ndako na ye azali mpe bongo.
9 Mafuta mpe mpaka ya malasi esepelisaka motema;Ezali ndenge moko na moninga oyo apesaka yo toli kozanga bokosi.+
10 Kosundola te moninga na yo to moninga ya tata na yo,Mpe kokɔta na ndako ya ndeko na yo te na mokolo ya likama na yo;Moninga oyo azali pene azali malamu koleka ndeko oyo azali mosika.+
11 Zalá na bwanya, mwana na ngai, mpe sepelisá motema na ngai,+Mpo napesa eyano na moto oyo atumolaka ngai.+
12 Moto ya ekɛngɛ amonaka likama mpe amibombaka,+Kasi moto oyo azangi mayele akobaka kokende mpe azwaka mpasi.*
13 Soki moto amipesi ndanga mpo na mopaya, zwá elamba na ye;Soki asali yango mpo na mwasi mopaya, zwá ndanga epai na ye.+
14 Soki moto azali kopambola moninga na ye na mongongo makasi na ntɔngɔntɔngɔ,Bakotángela ye yango lokola elakeli mabe.
15 Mwasi oyo aswanaka* azali lokola nsamba oyo etangaka ntango nyonso na mokolo ya mbula.+
16 Moto nyonso oyo akoki kopekisa ye, akoki mpe kopekisa mopɛpɛMpe kosimba mafuta na lobɔkɔ na ye ya mobali.
17 Kaka ndenge ebende epelisaka ebende,Moto mpe asalisaka moninga na ye akende liboso.*+
18 Moto oyo abatelaka nzete ya figi akolya mbuma na yango,+Mpe moto oyo akɛngɛlaka nkolo na ye akokumisama.+
19 Kaka ndenge okoki komona elongi na yo likoló ya mai,Okoki mpe komimona ntango ozali kotala basusu.
20 Nkunda mpe esika ya libebi* etondaka ata moke te,+Miso ya moto mpe etondaka te.
21 Ndenge nzungu ya kopɛtola ezali mpo na palata mpe mɔtɔ makasi mpo na wolo,+Masanzoli oyo moto azwaka emonisaka ndenge azali.*
22 Ata soki otutituti zoba na motute na kati ya libokaNdenge batutaka mbuma mikemike na kati ya liboka,Akobongwana te.
23 Osengeli koyeba malamu ndenge etonga na yo ezali.
Mpe kobatela malamu* bampate na yo,+
24 Mpo bomɛngo eumelaka libela te,+Mpe motole elandanaka te libota na libota.
25 Matiti ya mobesu elimwe, matiti ya sika ebimi,Mpe milona ya bangomba eyanganisami.
26 Bana-mpate ya mibali ezali mpo na bilamba na yo,Mpe bantaba ya mibali ezali mpo na kosomba elanga.
27 Mpe okozala na miliki ebele ya ntaba mpo na komileisa,Mpo na koleisa bato ya libota na yo, mpe basaleli na yo ya basi.
Maloba na nse
^ Lil., “ekobota nini.”
^ Lil., “Mopaya asala.”
^ To mbala mosusu, “ezali ya solo te; ya kosɛnga na makasi.”
^ To, “Molimo oyo etondi.”
^ Lil., “ekonyatanyata.”
^ To, “molimo oyo ezali na nzala.”
^ To, “zála.”
^ To, “azwaka etumbu.”
^ To, “alobaka mabe ntango nyonso.”
^ Lil., “Moto mpe angɛngisaka elongi ya moninga na ye.”
^ To, “Sheole ná Abadona.”
^ To, “Moto azali na kolanda masanzoli na ye.”
^ To, “Tyá motema na; Tyá likebi na.”
