Nzembo 22:1-31
Epai ya mokambi ya nzembo; na ebɛtɛlo ya “Bishe ya ntɔngɔntɔngɔ.”* Mondule ya Davidi.
22 Nzambe na ngai, Nzambe na ngai, mpo na nini osundoli ngai?+
Mpo na nini ozali koya te kobikisa ngai,Mpo na nini ozali te koyoka koganga na ngai ya kolela?+
2 Nzambe na ngai, na moi, nazali se kobelela, kasi ozali koyanola te;+Mpe na butu, nazali kofanda nyɛɛ te.
3 Kasi yo ozali mosantu,+Masanzoli ya Yisraele ezali* zingazinga na yo.
4 Batata na biso batyelaki yo motema;+Batyaki motema, mpe ozalaki kaka kobikisa bango.+
5 Babelelaki yo, mpe babikisamaki;Batyelaki yo motema, mpe bayokaki nsɔni te.+
6 Kasi ngai nazali nkusu, nazali moto te,Bato basɛki ngai mpe batyoli ngai.+
7 Baoyo nyonso bazali komona ngai bazali kosɛka ngai;+Bazali kotyola mpe koningisa mitó na bango na kosɛka:+
8 “Ye atyelaki Yehova motema. Tiká abikisa ye!
Tiká asikola ye, mpo asepeli na ye mingi!”+
9 Yo Moto obimisaki ngai na libumu,+Moto osalaki ete namiyoka ete nabatelami ntango nazalaki na mabɛlɛ ya mama na ngai.
10 Napesamaki na mabɔkɔ* na yo banda ntango nabotamaki;Banda na libumu ya mama na ngai ozalaki Nzambe na ngai.
11 Kozala mosika na ngai te, mpo mpasi ezali pene,+Mpe nazali na mosungi mosusu te.+
12 Ebele ya bana-ngɔmbɛ mibali bazingi ngai;+Bana-ngɔmbɛ mibali ya nguya ya Bashane bazingi ngai.+
13 Bafungoleli ngai mpenza monɔkɔ polele,+Lokola nkɔsi oyo ezali koganga mpe kopasola nyama bitenibiteni.+
14 Nasopami lokola mai;Mikuwa na ngai nyonso ekabwani.
Motema na ngai ekómi lokola mafuta;+Enyangwe na kati na ngai mpenza.+
15 Nguya na ngai ekauki lokola eteni ya mbɛki;+Lolemo na ngai ekangami na misuni ya mino na ngai;+Ozali kokitisa ngai na putulu ya liwa.+
16 Banguna na ngai bazingi ngai lokola bambwa;+Bapusani pene na ngai lokola etuluku ya basali-mabe,+Bazali koswa mabɔkɔ na ngai ná makolo na ngai lokola nkɔsi.+
17 Nakoki kotánga mikuwa na ngai nyonso.+
Bazali kotala ngai, mpe bazali kotalatala ngai.
18 Bakaboli bilamba na ngai kati na bango,Mpe babwaki mbɛsɛ mpo na bilamba na ngai.+
19 Kasi yo, Ee Yehova, kozala mosika te.+
Ozali makasi na ngai; yaká noki kosunga ngai.+
20 Bikisá ngai na mopanga,Bikisá bomoi na ngai ya motuya* na manzaka* ya mbwa;+
21 Bikisá ngai na monɔkɔ ya nkɔsi+ mpe na maseke ya bangɔmbɛ ya zamba;Yanolá ngai mpe bikisá ngai.
22 Nakoyebisa bandeko na ngai nkombo na yo;+Nakosanzola yo na kati ya lisangá.+
23 Bino baoyo bobangaka Yehova, bósanzola ye!
Bino nyonso libota* ya Yakobo, bópesa ye nkembo!+
Bóbanga ye, bino nyonso libota* ya Yisraele.
24 Mpo atyoli te mpe ayoki nsɔmɔ teMpo na mpasi ya moto oyo azali konyokwama;+
Abombeli ye elongi na ye te.+
Ntango alelelaki ye mpo na kosɛnga lisalisi, ayokaki.+
25 Nakosanzola yo na kati ya lisangá monene;+Nakokokisa bilako na ngai liboso ya baoyo babangaka ye.
26 Bato ya komikitisa bakolya mpe bakotonda;+Baoyo balukaka Yehova bakosanzola ye.+
Bósepela* na bomoi mpo na libela.
27 Bansuka nyonso ya mabele ekokanisa Yehova mpe ekozongela ye.
Mabota nyonso ya bikólo ekogumbamela yo.+
28 Mpo bokonzi ezali ya Yehova,+Azali koyangela bikólo.
29 Bato nyonso ya bozwi* oyo bazali na mabele bakolya mpe bakogumbama;Baoyo nyonso bazali kokita na putulu bakofukama liboso na ye;Moto moko te kati na bango akoki kobatela bomoi na ye.
30 Bana* na bango bakosalela ye;Libota oyo ekoya bakoyoka makambo etali Yehova.
31 Bakoya mpe bakoyebisa bato oyo bakobotama nsima misala na ye ya bosembo,
Mpe bakoloba ete asali makambo yango.
Maloba na nse
^ Mbala mosusu lolenge moko ya kobɛta miziki.
^ To, “na kiti na yo ya bokonzi.”
^ Lil., “Babwakaki ngai epai.”
^ Lil., “bomoi na ngai kaka moko,” azali kolobela molimo na ye, to bomoi.
^ Lil., “lobɔkɔ.”
^ Lil., “momboto.”
^ Lil., “momboto.”
^ Lil., “Mitema na bino ezala.”
^ Lil., “mafutamafuta.”
^ Lil., “Momboto.”
