Nzembo 68:1-35
Epai ya mokambi ya nzembo. Ya Davidi. Mondule. Loyembo.
68 Tiká Nzambe atɛlɛma, banguna na ye bápalangana,Mpe baoyo bayinaka ye bákima liboso na ye.+
2 Obengana bango ndenge mopɛpɛ ebenganaka milinga;Ndenge mafuta enyangwaka na mɔtɔ,Bato mabe básila liboso ya Nzambe.+
3 Kasi bato ya sembo básepela;+Bázala na esengo makasi liboso ya Nzambe;Bátonda mpenza na esengo.
4 Bóyembela Nzambe; bóyemba mpo na kosanzola* nkombo na ye.+
Bóyembela Ye oyo azali koleka na mikili ya patatalu oyo ekauká.*
Yah* ezali nkombo na ye!+ Bósepela liboso na ye!
5 Tata ya bana oyo batata bakufá mpe mobateli* ya basi oyo mibali bakufá+Ezali Nzambe oyo afandi na esika na ye mosantu.+
6 Nzambe azali kopesa bato oyo bazali kaka bango moko ndako mpo báfanda;+Azali komema bato ya bolɔkɔ tii na esika ya bomɛngo.+
Kasi bato ya motó makasi* basengeli kofanda na mokili oyo ezangá mai.+
7 Ee Nzambe, ntango otambwisaki* bato na yo,+Ntango ozalaki kotambola na mokili ekauká, (Sela)
8 Mabele elɛngaki;+Osalaki ete likoló enɔkisa mbula;*Sinai oyo elɛngaki mpo na Nzambe, Nzambe ya Yisraele.+
9 Ee Nzambe, osalaka ete mbula enɔka makasi;Opesaki bato na yo* makasi ntango balɛmbaki.
10 Bafandaki na kaa na yo ya bahema;+Ee Nzambe, na bolamu na yo okokisaki mposa ya babola.
11 Yehova apesi mitindo;Basi oyo bazali kosakola nsango malamu bazali limpinga moko monene.+
12 Bakonzi ya mampinga bazali kokima,+ bazali kokima!
Mwasi oyo atikali na ndako azwi ndambo ya eloko oyo bapunzi.+
13 Atako bozalaki kolala na mɔtɔ ya kaa,*Bokozwa ebenga oyo mapapu na yango ezipami na palata,Ná nsala ya wolo* oyo epɛtolami.
14 Ntango Mozwi-ya-Nguya-Nyonso apalanganisaki bakonzi na yango,+Nɛjɛ ekweaki* na Zalamone.
15 Ngomba ya Bashane+ ezali ngomba ya Nzambe;*Ngomba ya Bashane ezali na bisika mingi oyo etombwamá.
16 Mpo na nini bino, bangomba oyo ezali na bisika mingi oyo etombwamá, bozali kotala na likunyaEpai ngomba oyo Nzambe aponi* mpo afanda?+
Ɛɛ, Yehova akofanda kuna mpo na libela.+
17 Makalo ya bitumba ya Nzambe ezali bankóto zomi, bankóto na bankóto.+
Yehova auti na Sinai, ayei kokɔta na esika mosantu.+
18 Omati na likoló;+Omemi bakangami;Ozwi makabo oyo ezali bato,+Ɛɛ, ata bato ya motó makasi,+ mpo na kofanda na kati na bango, Ee Yah Nzambe.
19 Yehova asanzolama, ye oyo mokolo na mokolo amemaka mokumba na biso,+Nzambe ya solo ya lobiko na biso. (Sela)
20 Mpo na biso, Nzambe ya solo azali Nzambe oyo abikisaka;+Mpe Yehova Nkolo Mokonzi-Oyo-Aleki-Nyonso abikisaka na liwa.+
21 Ya solo, Nzambe akopanza motó ya banguna na ye,Motó ya moto nyonso oyo azali kotambola na ngambo na ye.+
22 Yehova alobi ete: “Nakozongisa bango uta na Bashane;+Nakozongisa bango uta na bozindo ya mbu,
23 Mpo ozindisa makolo na yo na makila+Mpe lolemo ya bambwa na yo elɛmbɔla makila ya banguna.”
24 Ee Nzambe, bamoni milɔngɔ ya bato na yo oyo bazali kotambola,Milɔngɔ ya bato ya Nzambe na ngai, ya Mokonzi na ngai, bazali kotambola mpo na kokɔta na esika mosantu.+
25 Bayembi bazali kotambola liboso, mpe na nsima na bango babɛti-miziki bazali kobɛta bibɛtɛlo ya bansinga;+Na katikati na bango bilenge basi bazali kobɛta bambonda ya mike.+
26 Na kati ya ebele ya bato oyo bayangani, bósanzola Nzambe;Bósanzola Yehova, bino bato oyo bouti na Liziba ya Yisraele.+
27 Kuna Benyamina,+ mwana-nsuka, azali kotya bango na nse na ye,Bankumu ya Yuda elongo na ebele ya bato oyo bazali koganga,Bankumu ya Zebulone, bankumu ya Nafatali mpe batye bango na nse na bango.
28 Nzambe na yo apesi etinda ete okozala makasi.
Ee Nzambe, monisá makasi na yo, yo oyo osali makambo mpo na bolamu na biso.+
29 Mpo na tempelo na yo na Yerusaleme,+Bakonzi bakoyela yo makabo.+
30 Pamelá nyama ya zamba oyo efandaka na matiti ya ebale,Liyangani ya bangɔmbɛ-mibali+ mpe bana-ngɔmbɛ,Tii bato ya bikólo bakogumbamela yo mpe bakoya na* biteni ya palata.
Kasi palanganisá bato ya bikólo oyo basepelaka na bitumba.
31 Biloko ya bronze ekouta* na Ezipito;+Mokili ya Kushi ekopesa nokinoki makabo epai ya Nzambe.
32 Ee makonzi ya mabele, bóyembela Nzambe,+Bóyemba mpo na kosanzola* Yehova, (Sela)
33 Mpo na ye oyo azali kotambola mosika kuna na likoló banda kalakala.+
Talá! Azali koganga na mongongo na ye ya makasi.
34 Bóndima makasi ya Nzambe.+
Lokumu na ye ezali likoló ya Yisraele,Nzambe amonisaka makasi na ye uta na likoló.*
35 Nzambe azali nsɔmɔ uta na esika na ye* mosantu ya monene.+
Azali Nzambe ya Yisraele,Oyo apesaka bato makasi mpe nguya.+
Nzambe asanzolama.
Maloba na nse
^ To, “bóbɛta miziki mpo na.”
^ To mbala mosusu, “mapata.”
^ “Yah” ezali ebengeli ya mokuse ya nkombo Yehova.
^ Lil., “mosambisi.”
^ To, “batomboki.”
^ Lil., “obimaki liboso ya.”
^ Lil., “etangisa matangá.”
^ Lil., “libula na yo.”
^ To mbala mosusu, “mapango ya bampate.”
^ To, “ya langi ya mai ya mpɔndu ya mwa mosaka.”
^ To, “Ezalaki lokola nde nɛjɛ ezalaki kokwea.”
^ To, “ngomba moko ya monene.”
^ To, “asepeli.”
^ To mbala mosusu, “konyata.”
^ To mbala mosusu, “Baambasadɛrɛ bakouta.”
^ To, “Bóbɛta miziki mpo na.”
^ Lil., “mapata.”
^ Lil., “yo.”
