Nzembo 77:1-20
Epai ya mokambi ya nzembo; na Yedutune.* Mondule ya Asafe.+
77 Na mongongo na ngai, nakobelela Nzambe;Nakobelela Nzambe, mpe akoyoka ngai.+
2 Na mokolo ya mpasi na ngai nalukaka Yehova.+
Na butu kozanga kotika nasemboli mabɔkɔ na ngai epai na yo.*
Eloko moko te ekoki kobɔndisa ngai.*
3 Ntango nakanisaka misala ya Nzambe, nakómaka na mposa na ye makasi;+Natungisami mpe makasi na ngai esili.*+ (Sela)
4 Opekisi ngai nakanga miso;*Natungisami mpe nakoki koloba te.
5 Nakanisaka ndenge makambo ezalaki kala,+Bambula oyo eleká kala.
6 Na butu nakanisaka loyembo na ngai;*+Namanyolaka na motema na ngai;+Nasalaka* bolukiluki ya mozindo mpo nakanga ntina.
7 Yehova akobwaka nde biso mpo na libela?+
Akomonisa lisusu ata moke te boboto na ye?+
8 Bolingo na ye ya sembo esili mpo na libela?
Elaka na ye ekokóma eloko mpamba libota na libota?
9 Nzambe abosani nde komonisela biso boboto na ye,+To nkanda na ye elongoli motema mawa na ye? (Sela)
10 Nasengeli nde koloba ntango nyonso ete: “Talá oyo ezali kotungisa ngai:*+
Oyo-Aleki-Likoló abongoli ndenge na ye ya kosalela biso makambo”?*
11 Nakokanisa misala ya Yah;Nakokanisa misala na yo ya kokamwa ya ntango ya kala.
12 Nakomanyola likoló ya mosala na yo nyonsoMpe nakokanisa na mozindo misala na yo.+
13 Ee Nzambe, banzela na yo ezali mosantu.
Nani azali nzambe monene lokola yo, Ee Nzambe?+
14 Yo ozali Nzambe ya solo, oyo asalaka makambo ya kokamwa.+
Omonisaki makasi na yo epai ya bato ya bikólo.+
15 Na nguya* na yo obikisaki* bato na yo,+Bana ya Yakobo mpe ya Yozefe. (Sela)
16 Ee Nzambe, mai emonaki yo;Mai emonaki yo mpe elɛngaki.+
Mpe mai mozindo ekómaki koningana.
17 Mapata esopaki mai.
Likoló oyo etondi na mapata ebimisaki nkake,Mpe makula na yo ezalaki kokende epai na epai.+
18 Lokito ya nkake na yo+ ezalaki lokola bapine ya makalo;Mikalikali engɛngisaki mabele oyo bato bafandi;*+Mabele eninganaki mpe elɛngaki.+
19 Ofungolaki nzela na mbu,+Mpe esika oleki ezali na mai mingi;Kasi moto moko te amonaki matambe ya makolo na yo.
20 Okambaki bato na yo kaka lokola etonga,+Na libateli* ya Moize ná Arona.+
Maloba na nse
^ Talá Ndimbola ya maloba.
^ Lil., “Na butu mabɔkɔ na ngai esembolami mpe esili makasi te.”
^ To, “molimo na ngai.”
^ Lil., “elimo na ngai elɛmbi.”
^ Lil., “Osimbi ntɔkɔ ya miso na ngai.”
^ To, “miziki ya ebɛtɛlo na ngai ya bansinga.”
^ Lil., “Elimo na ngai esalaka.”
^ Lil., “lobɔkɔ na ye ya mobali.”
^ To, “kotɔbɔla ngai.”
^ Lil., “lobɔkɔ.”
^ Lil., “osikolaki.”
^ To, “mabele oyo ebotaka.”
^ Lil., “Na lobɔkɔ.”
