Ruta 2:1-23
2 Bongo Naomi azalaki na ndeko moko na ngámbo ya mobali na ye, mpe moto yango azalaki na bomɛngo mingi; nkombo na ye ezalaki Boaze+ mpe azalaki moto ya libota ya Elimeleke.
2 Ruta Momoabe alobaki na Naomi boye: “Nabondeli yo, tiká nakende na bilanga mpo na kolɔkɔta+ mitó ya mbuma oyo etikali na elanga ya moto nyonso oyo nakondimama na miso na ye.” Bongo Naomi alobaki na ye: “Kende, mwana na ngai.”
3 Na yango, akendaki mpe abandaki kolɔkɔta mbuma oyo babuki-mbuma batikaki na bilanga. Kozanga kokana, akómaki na elanga ya Boaze,+ oyo azalaki moto ya libota ya Elimeleke.+
4 Kaka na ntango yango, Boaze autaki na Beteleme mpe akómaki wana. Alobaki na babuki-mbuma boye: “Yehova azala na bino.” Mpe bango bazongisaki: “Yehova apambola yo.”
5 Na nsima, Boaze atunaki elenge mobali oyo azalaki kapita ya babuki-mbuma boye: “Elenge mwasi oyo azali ya nani?”
6 Elenge mobali yango ayanolaki: “Elenge mwasi yango azali Momoabe+ oyo ayaki elongo na Naomi ntango autaki na mokili ya Moabe.+
7 Alobaki na ngai: ‘Nabondeli yo, nakoki kolɔkɔta+ mpe kosangisa mitó ya mbuma* oyo babuki-mbuma batiki?’ Mpe banda ayaki ntɔngɔ azalaki kaka kosala mosala na ye. Afandi kaka sikoyo na mwa ndako ya matiti mpo na kopema mwa moke.”
8 Bongo Boaze alobaki na Ruta: “Mwana na ngai, yoká: kokende kolɔkɔta mbuma na elanga mosusu te, mpe kokende epai mosusu te; zalá penepene na basaleli na ngai ya basi.+
9 Miso na yo ezala na elanga oyo bazali kobuka mbuma, mpe kende elongo na bango. Napesi basaleli ya mibali mitindo ete básimba* yo te. Soki oyoki mposa ya mai, kende esika bambɛki ya mai ezali mpe mɛlá mai oyo basaleli ya mibali batoki.”
10 Na yango Ruta afukamaki, atyaki elongi na nse mpe alobaki na ye: “Ndenge nini nandimami na miso na yo, mpe mpo na nini otyeli ngai likebi, nzokande nazali mopaya?”+
11 Boaze ayanolaki: “Bayebisaki ngai mpenza makambo nyonso oyo osalelaki mama-bokilo na yo nsima ya liwa ya mobali na yo, mpe ndenge otikaki tata na yo ná mama na yo mpe mokili ya bandeko na yo mpo na koya epai ya bato oyo oyebaki liboso te.+
12 Tiká Yehova azongisela yo bolamu mpo na oyo osali.+ Tiká ete ozwa lifuti ya kokoka* oyo euti epai ya Yehova Nzambe ya Yisraele, mpo oyei kobombana na nse ya mapapu na ye.”+
13 Na yango Ruta alobaki: “Tiká nandimama na miso na yo, nkolo na ngai, mpo obɔndisi ngai mpe okitisi ngai motema na maloba na yo,* atako nazali te moko ya basaleli na yo ya basi.”
14 Na ntango ya kolya, Boaze alobaki na ye: “Yaká awa, mpe lyá mwa ndambo ya limpa mpe zindisá eteni na yo ya limpa na vinɛgrɛ.” Bongo Ruta afandaki pembeni ya babuki-mbuma. Na nsima Boaze apesaki ye mbuma oyo batumbi mpe alyaki, atondaki, mpe mosusu etikalaki.
15 Ntango atɛlɛmaki mpo na kolɔkɔta+ mbuma oyo etikalaka, Boaze apesaki basaleli na ye ya mibali mitindo ete: “Bótika ye alɔkɔta ata mitó ya mbuma na milona* oyo bokati, mpe bósala ye mabe te.+
16 Bosengeli mpe kokatela ye maboke ya mitó ya mbuma, mpe kotika yango na nsima mpo alɔkɔta yango. Bópekisa ye te kolɔkɔta mbuma.”
17 Na yango, akobaki kolɔkɔta mbuma na elanga tii na mpokwa.+ Ntango abɛtabɛtaki mbuma oyo alɔkɔtaki, ebimisaki soki efa moko* ya ɔrje.
18 Bongo azwaki yango mpe akendaki na engumba, mpe mama-bokilo na ye amonaki biloko oyo alɔkɔtaki. Ruta abimisaki mpe biloko ya kolya oyo etikalaki+ ntango alyaki, mpe apesaki ye yango.
19 Na nsima mama-bokilo na ye atunaki ye: “Olɔkɔtaki mbuma wapi lelo? Osalaki wapi? Tiká ete moto oyo atyelaki yo likebi apambwama.”+ Bongo ayebisaki mama-bokilo na ye epai ya nani asalaki, mpe alobaki: “Mobali oyo nasalaki epai na ye lelo nkombo na ye Boaze.”
20 Na yango Naomi alobaki na mwasi ya mwana na ye: “Apambwama na Yehova, oyo atiki te komonisa bolingo na ye ya sembo epai ya bato ya bomoi mpe bakufi.”+ Naomi alobaki lisusu boye: “Mobali yango azali ndeko na biso.+ Azali moko ya basikoli na biso.”*+
21 Bongo Ruta Momoabe alobaki boye: “Ayebisaki ngai mpe: ‘Zalá penepene na basaleli na ngai ya mibali tii ntango bakosilisa kobuka mbuma nyonso ya bilanga na ngai.’”+
22 Naomi alobaki na Ruta, mwasi ya mwana na ye boye: “Mwana na ngai, eleki malamu okende elongo na basali na ye ya basi, na esika ete bato bátungisa yo na elanga mosusu.”
23 Bongo atikalaki penepene na basali ya Boaze ya basi mpe akobaki kolɔkɔta mbuma tii ntango eleko ya kobuka ɔrje+ mpe eleko ya kobuka blé ekómaki na nsuka. Mpe akobaki kofanda ná mama-bokilo na ye.+
Maloba na nse
^ To mbala mosusu, “maboke ya matiti ya mbuma ya ɔrje.”
^ To, “bátungisa.”
^ To, “mbano monene.”
^ Lil., “olobi na motema.”
^ To mbala mosusu, “maboke ya matiti ya mbuma ya ɔrje.”
^ To, “moko ya bandeko na biso oyo azali na lotomo ya kosikola biso.”
