Epai ya Tito 2:1-15
2 Nzokande, yo kobá koteya makambo oyo ebongi na mateya oyo epesaka litomba.*+
2 Mibange mibali bálekisa ndelo te na bizaleli na bango, bázwa makambo na lisɛki te, bázala na makanisi malamu, makasi na kondima, na bolingo, na ezaleli ya koyika mpiko.
3 Mibange basi mpe bázala na etamboli ya kobanga Nzambe, bákoselaka bato makambo te, bázala baombo ya vinyo te, kasi bázala bateyi ya makambo ya malamu,
4 mpo bápesa bilenge basi toli* ete bálinga mibali na bango, bálinga bana na bango,
5 bázala na makanisi malamu, bázala pɛto, basali misala na ndako,* bato malamu, oyo bamikitisaka liboso ya mibali na bango,+ mpo liloba ya Nzambe efingama te.
6 Kobá mpe kolendisa bilenge mibali bázala na makanisi malamu,+
7 mpe monisá na makambo nyonso ete ozali ndakisa na misala ya malamu. Teyáká oyo ezali pɛto,* na lisɛki te,+
8 salelá maloba oyo epesaka litomba* oyo bato bakoki kolobela yango mabe te,+ mpo batɛmɛli báyoka nsɔni, bázanga likambo ya mabe ya kolobela biso.+
9 Baombo bátosa bankolo na bango na makambo nyonso,+ báluka kosepelisa bango, bázongisa maloba mabe te,
10 báyiba bango te,+ kasi bámonisa ete babongi mpenza kotyelama motema, mpo na makambo nyonso bákómisa kitoko mpenza mateya ya Mobikisi na biso, Nzambe.+
11 Boboto monene ya Nzambe emonisami mpe ezali komema lobiko epai ya bato ya ndenge nyonso.+
12 Elakisaka biso tóboya ezaleli ya kotyola Nzambe, bamposa ya mokili+ mpe tózala na makanisi malamu, na bosembo mpe na ezaleli ya kokangama na Nzambe na mokili oyo,*+
13 wana tozali kozela elikya ya kitoko mpenza+ mpe komonana ya nkembo ya Nzambe monene mpe ya Mobikisi na biso, Yesu Kristo,
14 oyo amipesaki mpo na biso+ mpo alongola biso*+ na makambo ya ndenge nyonso ya kobuka mibeko mpe apɛtola mpo na ye bato oyo bazali bato na ye moko, oyo bazali na molende na misala ya malamu.+
15 Kobá koteya makambo wana, kolendisa mpe kopamela na bokonzi nyonso.+ Moto atyola yo ata moke te.
Maloba na nse
^ To, “mateya ya pɛto.”
^ To, “básalisa bilenge basi bázongela makanisi malamu.”
^ To, “bato oyo babatelaka ndako na bango.”
^ To mbala mosusu, “Teyáká na bopɛto.”
^ To, “maloba ya pɛto.”
^ To, “makambo ya ntango oyo.” Talá Ndimbola ya maloba.
^ Lil., “asikola biso.”
