Yosua 17:1-18
17 Nsima ya kobwaka mbɛsɛ,+ libula ya libota ya Manase+ ebimaki, mpo azalaki mwana ya liboso ya Yozefe.+ Lokola Makire,+ mwana ya liboso ya Manase, mpe tata ya Gileade, azalaki moto ya etumba, bapesaki ye Gileade mpe Bashane.+
2 Mpe nsima ya kobwaka mbɛsɛ, libula ebimaki mpo na bakitani mosusu ya Manase oyo batikalaki, na kolanda mabota na bango: mpo na bana ya Abi-ezere,+ bana ya Heleke, bana ya Asiriele, bana ya Shekeme, bana ya Hefere mpe bana ya Shemida. Wana ezalaki bakitani ya mibali ya libota ya Manase, mwana ya Yozefe, na kolanda mabota na bango.+
3 Kasi Zelofehade+ mwana ya Hefere, mwana ya Gileade, mwana ya Makire, mwana ya Manase, azalaki na bana mibali te, kaka bana basi. Bankombo ya bana yango ezalaki: Mahala, Noa, Hogla, Milika ná Tireza.
4 Bongo bayaki liboso ya nganga-nzambe Eleazare,+ liboso ya Yosua, mwana ya Nunu mpe liboso ya bankumu, balobi: “Yehova apesaki Moize mitindo ya kopesa biso libula kaka ndenge apesaki bandeko na biso ya mibali.”+ Na yango, na etinda ya Yehova, apesaki bango libula kaka ndenge apesaki bandeko ya tata na bango.+
5 Longola mokili ya Gileade mpe Bashane, oyo ezalaki na ngámbo mosusu* ya Yordani,+ ezalaki mpe na biteni mosusu zomi ya mabele oyo bapesaki Manase nsima ya kobwaka mbɛsɛ,
6 mpo bana basi ya libota ya Manase bazwaki libula elongo na bana mibali ya libota na ye; mpe mokili ya Gileade ekómaki mokili ya bakitani ya Manase oyo batikalaki.
7 Mpe ndelo ya Manase ezalaki banda na Ashere tii na Mikemetate,+ oyo etalani na Shekeme,+ mpe ndelo yango ekendaki na sudi* tii na esika oyo bato ya teritware ya Ene-Tapua bafandi.
8 Mokili ya Tapua+ ekómaki ya Manase, kasi Tapua oyo ezalaki na ndelo ya Manase ezalaki ya bakitani ya Efraime.
9 Mpe ndelo yango ekitaki tii na Lobwaku* ya Kana, na sudi ya lobwaku yango. Bato ya Efraime bazalaki na bingumba mosusu na kati ya bingumba ya Manase,+ mpe ndelo ya Manase ezalaki na nɔrdi ya lobwaku yango, mpe esukaki na mbu.+
10 Na sudi, ezalaki teritware ya Efraime, mpe na nɔrdi ezalaki teritware ya Manase, mpe mbu ezalaki ndelo ya teritware ya Manase.+ Na nɔrdi, teritware ya Manase* ekanganaki na oyo ya Ashere mpe na ɛsti, na oyo ya Isakare.
11 Na teritware ya Isakare mpe ya Ashere, bapesaki Manase Bete-sheane ná basité oyo esimbami na yango,* Ibleame+ ná basité oyo esimbami na yango, bafandi ya Dore+ ná basité oyo esimbami na yango, bafandi ya Ene-dore+ ná basité oyo esimbami na yango, bafandi ya Taanake+ ná basité oyo esimbami na yango, mpe bafandi ya Megido ná basité oyo esimbami na yango, mikili misato ya bangomba.
12 Kasi bakitani ya Manase balongaki te kozwa bingumba yango; Bakanana batingamaki kofanda na mokili yango.+
13 Ntango Bayisraele bakómaki makasi, bakómaki kosalisa Bakanana yango misala ya makasi,+ kasi babenganaki bango nyonso te.*+
14 Bakitani ya Yozefe balobaki na Yosua boye: “Mpo na nini nsima ya kobwaka mbɛsɛ opesi biso* kaka eteni moko ya mabele+ lokola libula? Tozali ebele, mpo Yehova apamboli biso tii sikoyo.”+
15 Yosua ayanolaki bango: “Soki bozali ebele, bókende na zamba, na mokili ya Baperizi+ mpe ya Barefaime,+ mpe bókata yango mpo na bino moko, mpamba te etúká ya ngombangomba ya Efraime+ ezali moke mingi mpo na bino.”
16 Bongo bakitani ya Yozefe balobaki: “Etúká ya ngombangomba ekokoka biso te, mpe Bakanana nyonso oyo bafandi na mokili ya lobwaku* bazali na makalo ya bitumba+ oyo ezali na makwangola na bapine ya ebende,* ezala baoyo bazali na Bete-sheane+ mpe basité oyo esimbami na yango,* ezala mpe baoyo bazali na Lobwaku* ya Yizireele.”+
17 Na yango, Yosua alobaki na bakitani ya Yozefe, bato ya libota ya Efraime mpe ya Manase, boye: “Bozali bato ebele, mpe bozali na nguya mingi. Nsima ya kobwaka mbɛsɛ, bokozwa kaka eteni moko te ya mabele,+
18 kasi etúká ya ngombangomba ekokóma mpe ya bino.+ Atako ezali zamba, bokokata yango, mpe ekokóma esika oyo teritware na bino ekosuka. Mpo bokobengana Bakanana, atako bazali makasi mpe bazali na makalo ya bitumba oyo ezali na makwangola na bapine ya ebende.”*+
Maloba na nse
^ Elingi koloba, ngámbo ya ɛsti.
^ Lil., “na lobɔkɔ ya mobali.”
^ To, “Wadi.” Talá Ndimbola ya maloba.
^ To, “bato ya Manase.”
^ To, “ezali zingazinga.”
^ To, “kasi, babɔtɔlaki mboka na bango nyonso te.”
^ Lil., “ngai.”
^ To, “lobwaku patatalu.”
^ Lil., “makalo ya bibende.”
^ To, “ezali zingazinga.”
^ To, “Lobwaku patatalu.”
^ Lil., “makalo ya bibende.”
