Yosua 24:1-33
24 Na nsima Yosua ayanganisaki mabota nyonso ya Yisraele na Shekeme mpe abengaki bankulutu ya Yisraele, bankumu, basambisi, ná bakapita,+ mpe batɛlɛmaki liboso ya Nzambe ya solo.
2 Bongo Yosua alobaki na bato nyonso boye: “Talá oyo Yehova Nzambe ya Yisraele alobi: ‘Na ntango ya kala, bankɔkɔ na bino,+ kati na bango Tera, tata ya Abrahama mpe tata ya Nahore, bafandaki+ na ngámbo mosusu ya Ebale* mpe bazalaki kosalela banzambe mosusu.+
3 “‘Na nsima, nazwaki nkɔkɔ na bino Abrahama+ na ngámbo mosusu ya Ebale* mpe natambwisaki ye na mokili mobimba ya Kanana mpe nakómisaki libota* na ye bato ebele.+ Napesaki ye Yisaka.+
4 Na nsima, napesaki Yisaka Yakobo ná Esau.+ Nsima na yango, napesaki Esau Ngomba Seire mpo ekóma ya ye;+ mpe Yakobo ná bana na ye bakitaki na Ezipito.+
5 Na nsima, natindelaki bino Moize ná Arona,+ mpe nabɛtaki Ezipito na mpasi oyo nakweiselaki yango,+ na nsima, nabimisaki bino.
6 Ntango nabimisaki batata na bino na Ezipito+ mpe wana bokómaki na mbu, Baezipito ná makalo na bango ya bitumba mpe basoda na bango oyo batambolaka na mpunda, balandaki batata na bino tii na Mbu Motane.+
7 Babandaki kobelela ngai Yehova.+ Bongo natyaki molili kati na bino ná Baezipito mpe nakitiselaki bango mbu mpe ezipaki bango;+ miso na bino moko emonaki makambo oyo nasalaki na Ezipito.+ Na nsima bofandaki bambula* mingi na esobe.+
8 “‘Mpe namemaki bino na mokili ya Baamore oyo bazalaki kofanda na ngámbo mosusu* ya Yordani, mpe babundisaki bino.+ Kasi napesaki bango na lobɔkɔ na bino mpo bózwa mokili na bango, mpe nasilisaki bango nyonso liboso na bino.+
9 Na nsima Balake mwana ya Zipore, mokonzi ya Moabe, atɛlɛmaki mpe abundisaki Yisraele. Bongo abengisaki Balaama mwana ya Beore mpo alakela bino mabe.+
10 Kasi naboyaki koyokela Balaama.+ Yango wana apambolaki bino mbala na mbala,+ mpe nabikisaki bino na lobɔkɔ na ye.+
11 “‘Na nsima bokatisaki Yordani+ mpe bokómaki na Yeriko.+ Mpe bakambi* ya Yeriko, ná Baamore, Baperizi, Bakanana, Bahiti, Bagirigashe, Bahivi ná Bayebusi, babundisaki bino, kasi napesaki bango na lobɔkɔ na bino.+
12 Bongo nasalaki ete bálɛmba nzoto,* yango wana bakimaki liboso na bino,+ ndenge kaka esalemaki mpo na bakonzi mibale ya Baamore. Esalemaki na mopanga na bino te mpe na litimbo na bino te.+
13 Na ndenge yango, napesaki bino mokili oyo bomonelaki mpasi te mpe bingumba oyo botongaki te,+ mpe bofandi kuna. Bozali kolya mbuma ya bilanga ya vinyo mpe ya bilanga ya olive oyo bolonaki te.’+
14 “Yango wana, bóbanga Yehova mpe bósalela ye na bosembo* mpe na bosolo,+ mpe bólongola banzambe oyo bankɔkɔ na bino basalelaki na ngámbo mosusu ya Ebale* mpe na Ezipito,+ mpe bósalela Yehova.
15 Sikoyo soki bomoni ete ezali mabe kosalela Yehova, bópona bino moko lelo nani bokosalela;+ soki bokosalela banzambe oyo bankɔkɔ na bino basalelaki na ngámbo mosusu ya Ebale,*+ to banzambe ya Baamore oyo bozali kofanda na mokili na bango.+ Kasi mpo na ngai ná libota na ngai, tokosalela Yehova.”
16 Na yango bato ya ekólo bayanolaki: “Tokoki kokanisa soki moke te kosundola Yehova mpe kosalela banzambe mosusu.
17 Ezali Yehova Nzambe na biso nde abimisaki biso ná batata na biso na mokili ya Ezipito,+ epai tozalaki baombo.+ Asalaki makamwisi* wana ya minene na miso na biso,+ mpe abatelaki biso na nzela nyonso oyo totambolaki mpe liboso ya bato nyonso ya bikólo oyo tolekaki na mokili na bango.+
18 Yehova abenganaki liboso na biso bato ya bikólo yango nyonso, ata mpe Baamore, oyo bazalaki kofanda na mokili oyo. Yango wana, biso mpe tokosalela Yehova, mpo azali Nzambe na biso.”
19 Bongo Yosua alobaki na bato ya ekólo boye: “Bino bokokoka kosalela Yehova te, mpo azali Nzambe moko mosantu;+ azali Nzambe oyo asɛngaka kokangama kaka na ye.+ Akolimbisa te misala na bino ya kobuka mibeko* mpe masumu na bino.+
20 Soki botiki Yehova mpe bosaleli banzambe ya bapaya, ye mpe akobalukela bino mpe akosilisa bino nyonso, atako asalelaki bino bolamu liboso.”+
21 Kasi bato ya ekólo balobaki na Yosua: “Biso tokosalela nde Yehova!”+
22 Bongo Yosua alobaki na bato boye: “Bino moko bozali batatoli ete boponi kosalela Yehova na likanisi na bino moko.”+ Na yango, balobaki: “Tozali batatoli.”
23 “Soki bongo, bólongola banzambe ya bapaya oyo bazali kati na bino, mpe bóbalusa mitema na bino epai ya Yehova Nzambe ya Yisraele.”
24 Bato balobaki na Yosua: “Tokosalela Yehova Nzambe na biso, mpe tokotosa ye!”
25 Na yango, Yosua asalaki kondimana na bato na mokolo yango mpe atyelaki bango mobeko mpe ekateli moko na Shekeme.
26 Na nsima, Yosua akomaki maloba yango na buku ya Mobeko ya Nzambe+ mpe azwaki libanga moko monene+ mpe atɛlɛmisaki yango na nse ya nzete monene oyo ezali pene na esika mosantu ya Yehova.
27 Yosua alobaki lisusu na bato nyonso ete: “Talá! Libanga oyo ekozala motatoli mpo na biso,+ mpo eyoki maloba nyonso oyo Yehova alobi na biso, mpe ekozala motatoli mpo na bino, mpo bówangana Nzambe na bino te.”
28 Na nsima, Yosua atikaki bato bákende, moto na moto na teritware ya libula na ye.+
29 Nsima ya makambo wana, Yosua mwana ya Nunu, mosaleli ya Yehova, akufaki ntango azalaki na mbula 110.+
30 Bongo bakundaki ye na teritware ya libula na ye na Timinate-sera,+ oyo ezali na etúká ya ngombangomba ya Efraime, na nɔrdi ya Ngomba Gaashe.
31 Yisraele ekobaki kosalela Yehova mikolo nyonso ya Yosua mpe mikolo nyonso ya bankulutu oyo batikalaki na bomoi nsima ya liwa ya Yosua, mpe oyo bayebaki misala nyonso oyo Yehova asalelaki Yisraele.+
32 Mikuwa ya Yozefe,+ oyo Bayisraele babimaki na yango na Ezipito, bakundaki yango na Shekeme, na eteni ya elanga oyo Yakobo asombaki epai ya bana ya Hamore,+ tata ya Shekeme, na mbongo ya ebende 100;+ mpe ekómaki libula ya bana ya Yozefe.+
33 Mpe Eleazare mwana ya Arona akufaki.+ Bongo bakundaki ye na Ngomba moke ya Finehase, mwana na ye,+ oyo bapesaki ye na etúká ya ngombangomba ya Efraime.
Maloba na nse
^ Elingi koloba, Efrate.
^ Elingi koloba, Efrate.
^ Lil., “momboto.”
^ Lil., “mikolo.”
^ Elingi koloba, ngámbo ya ɛsti.
^ To mbala mosusu, “bankolo-mabele.”
^ To mbala mosusu, “yikiyiki, kobanga.”
^ To, “bósalela ye na kozanga mbeba.”
^ Elingi koloba, Efrate.
^ Elingi koloba, Efrate.
^ Lil., “bilembo.”
^ To, “botomboki na bino.”
